ՌԴ ԱԳՆ-ն հորդորում է չբարդացնել ղարաբաղյան կարգավորումը ռազմատենչ հռետորաբանությամբ 9 հուլիսի 2014 - 13:45 AMT PanARMENIAN.Net - Ռուսաստանի ԱԳ նախարարությունում գտնում են, որ ռազմատենչ հռետորաբանությունը, ում կողմից էլ կիրառվի, բարդացնում է ղարաբաղյան կարգավորումը: «Ելնում ենք նրանից, որ ռազմատենչ հռետորաբանությունը, ումից էլ այն բխի, չի նպաստում խաղաղ կարգավորմանը, այլ հակառակը, բարդացնում է նրա լուծումը: Դա համանախագահ երկրների ընդհանուր դիրքորոշումն է»,-ասվում է ՌԴ ԱԳՆ Տեղեկատվության ու մամուլի դեպարտամենտի հայտարարությունում Հայաստանի Հանրային հեռուստառադիոընկերության հարցմանն ի պատասխան, որտեղ ասվում էր Ադրբեջանի իշխանությունների կողմից հակահայկական հռետորաբանության թեժացման մասին: «Այդ առնչությամբ հիշեցնում ենք, որ Ռուսաստանի, ԱՄՆ և Ֆրանսիայի նախագահների Լոխ Էռնի համատեղ հայտարարությունում կոչ է արվում կողմերի ղեկավարներին՝ ժողովուրդներին պատրաստել խաղաղության, այլ ոչ՝ պատերազմի, և ձեռնպահ մնալ այնպիսի գործողություններից և հայտարարություններից, որոնք կարող են տարածաշրջանում լարվածությունն ուժգնացնել և հանգեցնել հակամարտության սրմանը: Հուսով ենք, որ նման մոտեցումը կգերակայի: Այս կապակցությամբ լիահույս ենք, որ Հայաստանի և Ադրբեջանի նախագահների միջև կշարունակվի ուղղակի երկխոսությունը, ինչպես նրանք պայմանավորվել էին անցյալ տարեվերջին Վիեննայում», ասվում է ՌԴ ԱԳՆ հայտարարության մեջ, հայտնում է ԱՌԿԱ-ն: Նոյեմբերի 19-ին Վիեննայում տեղի ունեցավ ՀՀ նախագահ Սերժ Սարգսյանի ու Ադրբեջանի նախագահ Իլհամ Ալիևի հանդիպումը, որը սկսվեց առանձնազրույցով, ապա նրանց միացան ԵԱՀԿ ՄԽ համանախագահներն ու երկու երկրների արտգործնախարարները: Հանդիպումից հետո համանախագահները հանդիպման արդյունքներով հաղորդագրություն են տարածել, որտեղ ասվում է, թե առանձնազրույցի, ապա դրան հաջորդած համանախագահների և նախարարների հետ աշխատանքային հանդիպման ընթացքում նախագահները քննարկել են ղարաբաղյան հիմնախնդրի կարգավորմանը վերաբերող հարցերի լայն շրջանակ: Նախագահները համաձայնել են թափ հաղորդել հետագա բանակցություններին՝ ուղղված խաղաղ կարգավորման ձեռքբերմանն և հանձնարարել են իրենց արտաքին գործերի նախարարներին՝ համանախագահների հետ միասին, արվածի հիման վրա շարունակել աշխատանքը՝ խաղաղ գործընթացի ակտիվացման նպատակով: Նրանք պայմանավորվել են կրկին հանդիպել առաջիկա ամիսներին: Օգտվելով լիակատար անպատժելիությունից՝ Ադրբեջանի նախագահ Իլհամ Ալիևը, ինչպես նաև մյուս պաշտոնյաները տարիներ շարունակ պատերազմով են սպառնում Հայաստանին ու Լեռնային Ղարաբաղին: Ռազմատենչ հայտարարություններին զուգահեռ ադրբեջանական բանակը մշտապես խախտում է հրադադարի ռեժիմն Արցախի ԶՈւ հետ շփման գծում և Հայաստանի հետ սահմանին՝ գնդակոծելով ոչ միայն մարտական դիրքերը, այլ նաև սահմանամերձ գյուղերը, ինչպես նաև պարբերաբար դիվերսիոն գործողությունների փորձեր է ձեռնարկում, որոնց հետևանքով զոհեր են լիում: Հուլիսի սկզբին ադրբեջանական կողմը 10 օր շարունակ մշտապես գնդակոծել է Տավուշի մարզի դիրքերն ու սահմանամերձ գյուղերը, հայտնում է «Ազատություն» ռադիոկայանը: Ըստ Պառավաքարի գյուղպետ Ռոլանդ Մարգարյանի, հուլիսի 4-ի առավոտյան գյուղում կրկին կրակոցներ էին լսվում: Բարեբախտաբար, տուժողներ չեղան: «Առավոտյան կրկին կրակում էին, այն ժամանակ, երբ մարդիկ աշխատում էին այգիներում: Արդեն 10 օր է ամեն օր կրակում են»,-ասել է գյուղապետը: Պառավաքար գյուղում հունիսի 28-ին հակառակորդի կողմից արձակած գնդակից հրազենային վիրավորում էր ստացել 16-ամյա Արմեն Բրուտյանը: Տղան այդ ժամանակ աշխատում էր խաղողի այգում: Գնդակոծվել է նաև Չինարի գյուղը: Ըստ գյուղապետ Սամվել Սաղոյանի, գյուղացիները չեն կարողանում հողագործությամբ զբաղվել: «Արդեն 5 օր շարունակ կրակում են: Հենց որ մարդիկ գնում են գյուղի հողատարածքներում աշխատելու, նրանք խանգարում են, չեն թողնում, որ մարդիկ աշխատեն: 2-3 դիպուկահար անընդհատ կրակում են: Կրակի տակ են գյուղի կենտրոնական ճանապարհն ու ծայրամասերը: Մարդիկ արդեն գիտեն ինչպես պաշտպանվել: Ամենավտանգավորն առաջին կրակոցն է, որից հետո բոլորը մեծից փոքր գիտեն, թե որտեղ է պետք թաքնվել»,-ասել է Սաղոյանը: Կրակոցները սովորական են դարձել նաև սահմանամերձ Այգեպարում: Գյուղի դպրոցն ու մանկապարտեզը հակառակորդի նշանառության տակ են գտնվում, մի քանի հարյուր մետր հեռավորության վրա սահմանից: Դպրոցի ու մանկապարտեզի անվտանգության համար Հայ օգնության ֆոնդի «Այո» հիմնադրամը նախաձեռնել է պաշտպանիչ պատի կառուցում: Այդ նպատակով մեկ ամիս առաջ դրամահավաք է սկսվել: «Ամբողջ ծրագրի համար հարկավոր է մոտ 16 հազար դոլար, որը ներառում է 70 մ երկարությամբ և 3 մ բարձրությամբ պատի կառուցում»,-ասել է «Այո» տնօրեն Արմեն Անմեղիկյանը: Կառավարությունը նաև ծրագրում է պատով սահմանազատել Այգեպարի մանկապարտեզն ու դպրոցը: Ադրբեջանական կողմը հունիսի 27-ին երեկոյան 22:15-ից հետո խոշոր տրամաչափի զենքերով գնդակոծել է Տավուշի մարզի Այգեպար, Բարեկամավան, Մովսես, Ներքին Կարմիրաղբյուր և Չորաթան գյուղերը: Այգեպար գյուղի ուղղությամբ հակառակորդը կանաչ գույնի լուսավորող հրթիռ է բաց թողել ու մի քանի կողմից ավերել գյուղը: Գյուղապետ Անդրանիկ Այդինյանը նշել է, որ հակառակորդը կրակել է խոշոր չափերի զենքերով, իսկ հայկական կողմը հակահարվածը սկսել է ժամը 23-ին: Կրակոցները շարունակվել են մինչև 1:30-ը: ԱՄՆ Պետքարտուղարության պաշտոնական ներկայացուցիչ Ջեն Փսակին մեկնաբանել է լրագրողների խնդրանքով հաղորդակցությունները երկու հանրապետությունների սահմանին իրավիճակի սրման, մասնավորապես ադրբեջանական ստորաբաժանումների կողմից հայկական սահմանամերձ գյուղերի գնդակոծությունների մասին: «Ես չունեմ այդ կոնկրետ հաղորդագրությունների հաստատումը, սակայն, անկասկած, խաղաղ կարգավորումը բխում է երկու կողմի շահերից»,-ասել է ամերիկացի դիվանագետը: Նա նշել է, որ ԱՄՆ-ն, որպես ԵԱՀԿ Մինսկի խմբի անդամ «հավատարիմ է Երևանին և Բաքվին աջակցելու հարցում», որի արդյունքում հնարավոր կլինի ելք գտնել ստեղծված իրավիճակից»,-ասել է նա: Ղարաբաղա-ադրբեջանական հակամարտությունը Ղարաբաղա-ադրբեջանական հակամարտությունը սկսվեց 1988 թվականին: Ի պատասխան Լեռնային Ղարաբաղի ինքնավար մարզի (ԼՂԻՄ) բնակչության 80% կազմող հայերի խաղաղ պահանջներին, Ադրբեջանը ագրեսիա ծավալեց խաղաղ բնակչության դեմ: 1991-1994թթ. ազգային-ազատագրական պատերազմի արդյունքում հռչակվեց Լեռնային Ղարաբաղի Հանրապետությունը: ԼՂՀ պաշտպանության բանակը նաեւ ԼՂՀ շուրջ անվտանգության գոտի ստեղծեց, որը 7 շրջաններ է ներառում: 1994թ. մայիսի 11-ին հրադադարի մասին համաձայնություն ձեռք բերվեց (Բիշկեկյան արձանագրություն): Ներկայումս հակամարտության կարգավորմամբ զբաղվում են ԵԱՀԿ Մինսկի խմբի համանախագահները` Ֆրանսիան, ԱՄՆ-ն եւ Ռուսաստանը: Ուշագրավ
Նրանք նաև կոչ են արել դադարեցնել Ադրբեջանին ցանկացած ռազմական օգնության Որպես օրինակ մատնանշում են 2023–ի սեպտեմբերի 19-ին Երևանում կազմակերպված բողոքի ակցիայի իրադարձությունները Հանդիպումը տեղի կունենա, եթե Հայաստանը ևս տա իր համաձայնությունը Այս գերեզմանատանն են ամփոփված այնպիսի նշանավոր հայերի մարմինները, ինչպիսինք են Վիլյամ Սարոյանն ու Սողոմոն Թեհլերյանը Ամենաընթերցվողը բաժնում | Իրանն ու Ադրբեջանն առաջիկայում Արաքս գետի վրա ՀԷԿ կբացեն Կառուցման աշխատանքներն ավարտվել են ԻՆԳՈ-ն ապահովագրել է Career Сity Fest 2K24-ը և ներկայանում է շուկայում առաջին՝ միջոցառումների ապահովագրման պրոդուկտով Ապահովագրության պայմաններն ընտրվում են՝ հաշվի առնելով յուրաքանչյուր իրադարձության առանձնահատկությունները Ակբա բանկ․ ՀՀ-ում առաջին անգամ թողարկվում են UnionPay International-ի քարտեր Ակբա բանկը քարտերը տրամադրում է ռեզիդենտ և ոչ ռեզիդենտ ֆիզիկական և իրավաբանական անձանց Վարչապետ․ ՀԱՊԿ-ն ուզում էր ՀՀ գալ ոչ թե որպես դաշնակից, այլ` խաղաղապահ Նա հավելել է, որ դա էր ՀԱՊԿ-ի հետ հայկական կողմի ամենամեծ խնդիրը |