Մոտ 40 երկիր և միավորում շահագրգռված է ԵՏՄ հետ առևտրի ազատ գոտի ունենալ

29 դեկտեմբերի 2014 - 10:42 AMT

PanARMENIAN.Net - Եվրասիական տնտեսական միությունը (ԵՏՄ) բաց է այլ պետությունների համար: Մոտ 40 երկիր և միավորում շահագրգռված է ԵՏՄ հետ առևտրի ազատ գոտի ունենալ: Այդ մասին հայտնում է ՌԴ ԱԳ նախարարությունն՝ ամփոփելով տարին:

Ռուսաստանի ԱԳՆ հայտարարության մեջ ասվում է, որ մայիսի 29-ին Աստանայում ստորագրված ԵՏՄ մասին պայմանագիրը, որն ուժի մեջ է մտնում հունվարի 1-ից, ամուր հիմք է ստեղծում լիարժեք միջազգային կազմակերպություն ստեղծելու համար, որը կունենա անհրաժեշտ իրավասուբյեկտություն: Ավարտվել են պայմանագրի վավերացման աշխատանքները Հայաստանի հետ, որը միավորման լիիրավ անդամ կդառնա արդեն հունվարի 2-ից:

«Բազմաշերտ էին կապերը Ղազախստանի հետ, որոնց հետագա առաջխաղացմանը կնպաստի ՌԴ և Ղազախստանի միջև 21-րդ դարում բարիդրացիության ու դաշինքի մասին պայմանագիրը: Փաստաթուղթն հարմարեցված է այսօրվա իրողություններին, եվրասիական ինտեգրման պայմաններին, միտված է վերջին տարիներին առաջացած նոր մարտահրավերներին ու սպառնալիքներին համատեղ ուժերով դիմագրավելուն: Դեկտեմբերի 22-ին պետությունների ղեկավարները ստորագրեցին Վավերացման մասին փաստաթղթերի փոխանակման վերաբերյալ արձանագրությունը»,-նշում են Ռուսաստանի ԱԳՆ-ում:

Նաև ՌԴ արտաքին գերատեսչությունը հիշեցնում է, որ ԱՊՀ ազատ առևտրի գոտու մասին պայմանագրի գործողության տարածքն ընդլայնվել է Ուզբեկստանի միանալու շնորհիվ, որը դարձավ այդ համաձայնագրի 9-րդ մասնակիցը:

ՀՀ Ազգային ժողովը դեկտեմբերի 4-ի նիստում վավերացրել է Հայաստանի՝ Եվրասիական տնտեսական միությանը միանալու մասին պայմանագիրը: Կողմ է քվեարկել 103 պատգամավոր, դեմ՝ 7, ևս 1-ը ձեռնպահ է մնացել: Խորհրդարանական խմբակցություններից դեմ էր միայն «Ժառանգությունը»:

Պայմանագիրը վավերացրել են նաև Ռուսաստանը, Բելառուսն ու Ղազախստանը:

Հայաստանը կստանա ԵՏՄ մաքսային տուրքերի 1,13 տոկոսը:

Եվրասիական տնտեսական միությանը Հայաստանի անդամակցման գործընթացը

Հոկտեմբերի 10-ին Մինսկում ընթացող Բարձրագույն տնտեսական խորհրդի նիստում ստորագրվել է Եվրասիական տնտեսական միության մասին պայմանագրին Հայաստանի միանալու մասին պայմանագիրը:

Ինտրիգը պահպանվեց մինչև վերջ. Մաքսային միությանն անդամակցելու մտադրության մասին Հայաստանը հայտարարեց 2013-ի սեպտեմբերին: Նախատեսվում էր, որ արդեն 2014-ի մայիսին Երևանը ՌԴ, Բելառուսի և Ղազախստանի հետ կստորագրի ԵՏՄ մասին պայմանագիրը: Սակայն Հայաստանի անդամակցումը միությանը ձգձգվում է Հայաստանի ու ԼՂՀ միջև մաքսային հսկողության հարցի պատճառով: Այդ մասին խոսեց նաև Ղազախստանի նախագահ Նուրսուլթան Նազարբաևը մայիսի 29-ին Աստանայում Բարձրագույն եվրասիական տնտեսական խորհրդի նիստում: Նազարբաևն առաջարկեց Հայաստանին միանալ Եվրասիական միությանն առանց Լեռնային Ղարաբաղի, ՄԱԿ-ի ճանաչած սահմաններում և հայտնեց, որ Ղազախստանի, Բելառուսի և Ռուսաստանի նախագահները նամակ են ստացել Իլհամ Ալիևից համապատասխան խնդրանքով: Արդյունքում պայմանագրի ստորագրումը մի քանի անգամ հետաձգվեց:

Պայմանագիրն ուժի մեջ կմտնի 2015-ի հունվարի 1-ին՝ Հայաստանում, Ռուսաստանում, Բելառուսում և Ղազախստանում վավերացվելուց հետո: