Արցախում հակառակորդի կրակոցից զինվոր է զոհվել

PanARMENIAN.Net - ՊԲ արևելյան ուղղությամբ տեղակայված զորամասերից մեկի պահպանության տեղամասի մարտական հենակետում հակառակորդի կողմից մահացու հրազենային վիրավորում է ստացել զինծառայող, 1995-ին ծնված Արսեն Աբրեստի Կարապետյանը:

Դեպքի մանրամասները պարզելու համար կատարվում է քննություն, տեղեկացնում է ԼՂՀ ՊՆ մամուլի ծառայությունը:

ՊԲ օպերատիվ տվյալների համաձայն, մարտի 2-ին և լույս 3-ի գիշերը ղարաբաղա-ադրբեջանական հակամարտ զորքերի շփման գծում հակառակորդի կողմից հրադադարի պահպանման ռեժիմը խախտվել է մոտ 200 անգամ, որի ընթացքում, տարբեր տրամաչափի հրաձգային զինատեսակներից, ինչպես նաև 60 մմ ականանետերից ու ՌՊԳ-7 տիպի նռնականետերից հայ դիրքապահների ուղղությամբ արձակվել է ավելի քան 3000 կրակոց:

ՊԲ առաջապահ ստորաբաժանումները ձեռնարկել են համապատասխան միջոցառումներ նշված ժամանակահատվածում հակառակորդի ակտիվությունը ճնշելու ուղղությամբ և շարունակում են շփման գծի ամբողջ երկայնքով վերահսկել օպերատիվ-մարտավարական իրադրությունը:

Փետրվարի 28-ին ՊԲ հյուսիսարևելյան ուղղությամբ տեղակայված զորամասերից մեկի պահպանության տեղամասի մարտական հենակետերի ուղղությամբ հակառակորդը ձեռնարկել էր դիվերսիոն հետախուզական ներթափանցման փորձ: ՊԲ առաջապահ ստորաբաժանումները ժամանակին հավաստանշել են հակառակորդի հատուկ ջոկատայինների առաջխաղացումը և վերջիններիս կորուստներ պատճառելով, հետ շպրտել ելման դիրքեր, տեղեկացնում է ՊՆ մամուլի ծառայությունը:

Մարտերի ժամանակ զոհվել էին զինծառայողներ Արտակ Աղեկյանը և Հայկ Բարոյանը: ՔԿ զինվորական քննչական գլխավոր վարչության վարույթում ՀՀ ՔՕ 104-րդ հոդվածի 2-րդ մասի 1-ին և 13-րդ կետերով հարուցվել էրքրգործ` հակառակորդի կողմից ազգային, ռասայական կամ կրոնական ատելության կամ կրոնական մոլեռանդության շարժառիթով երկու անձի սպանության դեպքի առթիվ, կատարվում է նախաքննություն։

2015 թվականին պաշտոնական տվյալներով հակառակորդի գնդակից զոհվածները`

Վանիկ Գուրգենի Ղուկասյանի (բնակիչ), փետրվարի 5

Շեքսպիր Մխիթարի Հակոբյան 1990թ., փետրվարի 4 լույս 5-ի գիշեր

Արտակ Վաղարշակի Սարգսյան, հունվարի 23

Կարեն Արարատի Գալստյան, հունվարի 23

Արման Ռաշիդի Ուդումյան, հունվարի 21

Նահապետ Արտակի Ասատրյան, 1982թ., հունվարի 20-ին լույս 21-ի գիշերը

Սուրեն Խաչիկի Փիլոսյան,1995թ., հունվարի 20

Արման Ալիկի Հարությունյան, հունվարի 17

Սերյոժա Նիկոլայի Սարգսյան (բնակիչ, 1935 թ. ), հունվարի11

Վարդան Մարտիկի Մկրտչյան, հունվարի 2-ի լույս 3-ի գիշերը

Կարեն Սամվելի Գրիգորյան, հունվարի 2-ի լույս 3-ի գիշերը

Տիգրան Սամվելի Սիմոնյան (1991թ.), փետրվարի 10-ին

Արտակ Սեդրակի Աղեկյան, 1979թ., փետրվարի 28-ին

Հայկ Գրիգորի Բարոյան, 1995թ., փետրվարի 28-ին

Ոչ պաշտոնական տվյալներով այս տարի եղել է ևս երկու զոհ: