Ռուսաստանյան MTC ընկերությունը վստահ է, որ հաղթելու է «ԱրմենՏել»-ի` հունական OTE-ին պատկանող բաժնետոմսերի վաճառքի մրցույթում, որի արդյունքները, ըստ MTC-ի ներկայացուցչի, հայտնի կդառնան մինչեւ շաբաթավերջ: «Փորձագետների վստահությունը, որ MTC-ը կհաղթի, հիմնված է այն փաստի վրա, որ MTC ընկերությունը Ռուսաստանի բջջային շուկայի առաջատարն է, ուստի բավարար շանսեր ունի այդ մրցույթում հաղթելու համար: Հենց այդ պատճառով էլ մասնակցում ենք մրցույթին», - «Ազատություն» ռադիոկայանին ասաց MTC ընկերության մամուլի քարտուղար Կիրիլ Ալյարդինը: Ալյարդինը նաեւ «ասեկոսեներ» որակեց ռուսաստանյան որոշ լրատվամիջոցների` երեկ տարածած տեղեկատվությունը, թե «ԱրմենՏել»-ի մրցույթը շահել է արաբական Emirates Telecommunications Corporation (ETISALAT)/IStithmar PJSC/Emergent Telecom Ventures (ETV) կոնսորցիումը: «Պաշտոնապես մրցույթի կազմակերպիչները արդյունքները հայտարարելու են շաբաթվա վերջին», - ասաց Ալյարդինը: