Դե Վաալ. Անտեսել ԼՂ հակամարտությունն անհնար է` կամ լուրջ բանակցություններ, կամ պատերազմի սպառնալիք13 հուլիսի 2016 - 14:14 AMT PanARMENIAN.Net - Ապրիլյան սրացումը բռնության ամենալուրջ բռնկումն էր Ղարաբաղում 1994-ից ի վեր: Դա ադրբեջանական բանակի լայնածավալ հարձակում չէր, թեև Բաքուն պարբերաբար հայտարարում էր, որ չի բացառում զինուժի կիրառումը տարածքներ վերադարձնելու համար: Ավելի շուտ դա սահմանափակ մասշտաբի գործողություն էր, որի նպատակն էր սաստկացնել ճնշումը Հայաստանի վրա և ԼՂ հարցը կրկին բերել միջազգային օրակարգ: Այս մասին իր հոդվածում գրում է Վաշինգտոնի Քարնեգիի հիմնադրամի Կովկասի գծով փորձագետ Թոմաս դե Վաալը: PanARMENIAN.Net ը ներկայացնում է Carnegie.ru-ում հրապարակված «Կովկասյան գերիները. Ինչպես հանգուցալուծել անվտանգության երկընտրանքը Ղարաբաղում» հոդվածը որոշ կրճատումներով: Փորձագետը նշում է, որ ԵԱՀԿ շրջանակում կազմված խաղաղության ծրագիրը ենթադրում է, որ հայկական կողմը կհրաժարավի ԼՂ մերձակա տարածքներից (բացառությամբ Ղարաբաղը Հայաստանի հետ կապող Լաչինի միջանցքը)` Ղարաբաղի հայերի համար ինքնակառավարման երաշխիքների դիմաց, հետագայում Լեռնային Ղարաբաղի անկախության ճանաչման հեռանկարով: Սակայն ապրիլյան իրադարձություններից հետո կողմերի դիրքորոշումները կոշտացան: Շարքային հայերը շատ ավելի հաճախ են Ղարաբաղին մերձակա տարածքները ազատագրված անվանում: Օրինակ, ըստ լրագրող Անդրանիկ Կասպարյանի, «այդ ազատագրված տարածքները ռազմավարական նշանակություն ունեն` դրանք թույլ են տալիս հեռու պահել Ադրբեջանին Ղարաբաղի հիմնական բնակավայրերից և տարածքային կապ են ստեղծում Ղարաբաղի և Հայաստասնի միջև: Ընդ որում այդ հողերը հիմնականում պատմական հայկական հողեր են»: Բաքվում, հակառակը, խոսում են ոչ թե հայերի համար ինքնավարության, այլ այդ տարածքներն ուժով գրավելու մասին: Նախորդ տարվա վերջում Ադրբեջանի ՊՆ ղեկավարը սպառնում էր, որ 2016-ին «Ղարաբաղի հողն այրվելու է հայ զավթիչների ոտքերի տակ»: Այս դիլեման անհնար է հանգուցալուծել առանց հուսալի միջազգային պայմանավորվածությունների: Սակայն, այսօր միակ եղած մեխանիզմը` 1994թ. խաղաղ համաձայնագրերն են, որոնք դիտարկվում էին որպես ժամանակավոր և չէին նախատեսում խաղաղապահ ուժերի տեղակայում: Այն ժամանակ Հայաստանի, Ադրբեջանի և Լեռնային Ղարաբաղի զորքերի հրամանատարները պայմանավորվեցին, որ 30-օրյա ժամկետում մշակելու են ռազմատեխնիկական հարցերը` ներառյալ միջազգային խաղաղապահ ուժերի և ԵԱՀԿ դիտորդական առաքելության փոխգործակցությունը: Սակայն ոչ մի փաստաթուղթ արդյունքում չստորագրվեց: Հակամարտության զսպման համար նախատեսված ԵԱՀԿ ամբողջ կառույցը փլուզման եզրին է: Եվ եթե Հայաստանի և Ադրբեջանի նախագահները չհամաձայնվեն քաղաքական փոխզիջման, պատերազմի վտանգ է առաջանում: Այստեղ տարբեր սցենարներ են հնարավոր: Օրինակ, հակամարտությունը կարող է բորբոքվել հրադադարի կոպիտ խախտման պատճառով: Կամ ադրբեջանական կողմը, չտեսնելով քաղաքական կարգավորման հեռանկարներ, կարող է նոր գործողություն սկսել, ավելի մեծ տարածք գրավելու և իր օգտին իրավիճակը փոխելու հույսով: ՀՀ խորհրդարանը կարող է կատարել իր սպառնալիքն ու ճանաչել ԼՂ անկախությունը: Դա կզրկի Երևանին բանակցելու հնարավորությունից և վերջ կտա խաղաղ գործընթացին: Մի բան պարզ է. մարտական գործողությունների նոր փուլն ավելի դժվար կլինի կանգնեցնել: Միանգամայն հավանական է, որ մարտերի աշխարհագրությունն այդ դեպքում կընդլայնվի, ավելի հզոր տեխնիկա գործի կդրվի և ավելի շատ արյուն կհեղվի: Եվ Բաքուն, և Երևանն, այդ դեպքում, կարող են դիմել ռազմական օգնության մասին իրենց պայմանագրերին` Թուրքիայի և ՌԴ հետ համապատասխանաբար, փորձելով ներքաշել Մոսկվային և Անկարային պատերազմի մեջ: Այս ամենը և տարածաշրջանային, և միջազգային դերակատարներին «կովկասյան գերիների» է վերածում Պուշկինի հայտնի պոեմից: Ստեղծված վակուումը կարելի է հաղթահարել միայն համակարգված միջազգային ջանքերի միջոցով: Մասնավորապես, պետք է ակտիվորեն խաղաղապահ գործողության պլան կազմել, որը կորոշի Ղարաբաղում տեղակայվելիք ապագա խաղաղապահ ուժերի բնույթը, քանակն ու կազմը: Առանց դրա հայկական կողմը հազիվ թե համաձայնվի դուրս բերել զորքերը, իսկ ադրբեջանցի փախստականները չեն կարողանա վերադառնալ: Երկու երկրների նախագահներից պահանջել, որ նրանք քաղաքական համաձայնագիր կնքեն առանց հասկանալու, թե ինչ երաշխիքներ է այն տալիս, միևնույն է, ինչ տուն կառուցել առանց հատակի: Սակայն խաղաղապահ առաքելության պլանավորումն առնվազն 3 խոչընդոտի կարող է հանդիպել: Առաջինը` միջազգային հոգնածությունն է Ղարաբաղի հարցից: Խաղաղապահ ուժերի կազմավորման դեպքում հարկ կլինի հաշվի առնել ՀՀ և Ադրբեջանի դիրքորոշումները, որոնք կցանկանային զգալի ռազմական ներկայություն պահպանել հակամարտության գոտում: Երկրորդը` ԵԱՀԿ-ն չունի խաղաղապահ առաքելությունների կառավարման փորձ, ոչ էլ համապատասխան բյուջե: Երրորդ բարդությունը` ՌԴ մշուշոտ մտադրություններն են: 1994թ. Մոսկվան ակտիվորեն, թեև անհաջող, փորձում էր գլխավորել այդ ուժերը: Երբ խաղաղ կարգավորումը քննարկվում էր 2001-ին Քի Ուեսթում, ՌԴ-ն համաձայնեց, որ խաղաղապահ ուժերում չպետք է լինեն «հարևան երկրներն ու համանախագահները»: Դա բացառում է հնարավոր մասնակիցների թվից ինչպես Ռուսաստանին, այնպեսլ էլ Թուրքիային: Սակայն, գուցե Մոսկվան չի հրաժարվել նախկին հավակնություններից: 2006-ին ՌԴ ՊՆ ղեկավար Սերգեյ Իվանովի կանխատեսմամբ, «տեսանելի ապագայում ռուս խաղաղապահներն, այնուամենայնիվ, կտեղակայվեն ղարաբաղյան հակամարտության գոտում»: Շատերը կարծում են, որ Ռուսաստանը շահագրգռված է ստատուս քվոն պահպանելու հարցում` ոչ խաղաղություն, ոչ պատերազմ: Սակայն, դա գնալով ավելի դժվար է դառնում: 1991-1994-ին ռուս զինծառայողները կռվում էին երկու կողմից: ՌԴ-ն ռազմական դաշինքի մեջ է ՀՀ հետ և բավականին սերտ հարաբերություններ ունի Ադրբեջանի հետ: Ավելին, որպես ՄԽ համանախագահ ՌԴ-ն բավականին արդյունավետ է համագործակցում ֆրանսիացի և ամերիկացի համանախագահների հետ: ՌԴ-ն շահագրգռված է պահպանել իր ազդեցությունը տարածաշրջանում, սակայն չի կարող նոր պատերազմ թույլ տալ` այդ դեպքում Մոսկվան ստիպված կլինի աջակցել Հայաստանին և կորցնել այն ամենն, ինչին հասել է Ադրբեջանի հետ հարաբերություններում: Մոսկվան կարող է պահպանել իր ազդեցությունը, եթե առաջարկի կարգավորման փուլային տարբերակ, որի իրականացումը տարիներ կպահանջի և թույլ կտա վերսկսել տրանսպորտային հաղորդակցությունն Իրանի հետ` ՀՀ և Ադրբեջանի տարածքով: Որոշ փորձագետներ կարծում են, որ Ղրիմից հետո, Մոսկվան փորձում է վերադարձնել այն ազդեցությունը, որ ուներ Ղարաբաղում 1990-ականների կեսին և ռազմական ներկայություն ապահովել Հարավային Կովկասում: Սակայն նույնիսկ եթե ՌԴ-ն շահագրգռված է դրանում, նրա ներուժը խիստ սահմանափակ է: Հայաստանն ու Ադրբեջանը կասեցրին ռուսական նախաձեռնությունները 1994-ին և 2011-ին, իսկ Ֆրանսիան ու ԱՄՆ-ն ՄԽ-ում վետոյի իրավունք ունեն: 2016-ի ապրիլին միջազգային խաղացողները լուրջ մարտահրավերի առջև են կանգնել. հարկավոր է մոդիֆիկացնել խաղաղ գործընթացը` թույլ չտալու համար, որ հակամարտությունը վերաճի լայնածավալ պատերազմի: Դրա համար պետք է համոզել ՀՀ և Ադրբեջանի նախագահներին մի շարք քաղաքական ու ռազմական միջոցներ ձեռնարկել: Դրանք պետք է լինեն այնպիսի միջոցներ, որոնց ընդունելի լինելը Ալիևն ու Սարգսյանը կկարողանան ներկայացնել իրենց քաղաքացիներին: Նման կարգավորման միակ իրական ձևաչափը` ԵԱՀԿ ՄԽ համանախագահությունն է: Սակայն, կարևոր է, որ մյուս երկրները ևս իրենց ավանդը կարողանան ունենալ…Շահագրիռ երկրների թվում է Վրաստանը, որի վրա կարող է անդրադառնալ ՀՀ և Ադրբեջանի միջև հակամարտությունը, Իրանը, որը սահմանակից է հակամարտության գոտուն և ավելի քիչ պարտավորություններ ունի հակամարտության կողմերի առջև, քան Թուրքիան ու ՌԴ-ն: Նույնիսկ Չինաստանը, որն ակտիվ ներդրումներ է անում Կովկասում, ԵԱՀԿ գործող նախագահը` 2016-ին դա Գերմանիան է: Խաղաղ համաձայնագրի քաղաքական ու տեխնիկական ասպեկտների մշակման համար հարկավոր են դիվանագիտական ջանքեր բարձր մակարդակով ԵԱՀԿ ՄԽ համանախագահների և ԵԱՀԿ նախագահի կողմից: Խորհրդակցություններ են անհրաժեշտ ՄԱԿ, ԵՄ և չեզոք երկրների հետ, որոնք կարող են խաղաղապահներ տրամադրել: Պետք է պարզել` իրոք Մոսկվան սեփական խաղաղապահ ուժերն է մտադիր Ղարաբաղում տեղակայել: Եվ եթե կարգավորման ծրագիրը հավանություն ստանա միջազգային մակարդակով, ներկայացնել այն հակամարտության կողմերին: Դրա համար ճիշտ կլիներ գումարել ԵԱՀԿ ՄԽ կոնֆերանս: Շատ ավելի լավ է հիմա ջանքեր գործադրել, քան սպասել, թե երբ նոր բռնկում կլինի, որը հղի է լուրջ ռազմավարական և տնտեսական հետևանքներով և մարդկային կորուստներով, գրում է դե Վաալը: Ղարաբաղա-ադրբեջանական հակամարտությունը Ղարաբաղա-ադրբեջանական հակամարտությունը սկսվեց 1988 թվականին: Ի պատասխան Լեռնային Ղարաբաղի ինքնավար մարզի (ԼՂԻՄ) բնակչության 80% կազմող հայերի խաղաղ պահանջներին, Ադրբեջանը ագրեսիա ծավալեց խաղաղ բնակչության դեմ: 1991-1994թթ. ազգային-ազատագրական պատերազմի արդյունքում հռչակվեց Լեռնային Ղարաբաղի Հանրապետությունը: ԼՂՀ պաշտպանության բանակը նաեւ ԼՂՀ շուրջ անվտանգության գոտի ստեղծեց, որը 7 շրջաններ է ներառում: 1994թ. մայիսի 11-ին հրադադարի մասին համաձայնություն ձեռք բերվեց (Բիշկեկյան արձանագրություն): Ներկայումս հակամարտության կարգավորմամբ զբաղվում են ԵԱՀԿ Մինսկի խմբի համանախագահները` Ֆրանսիան, ԱՄՆ-ն եւ Ռուսաստանը: Ուշագրավ
Նրանք նաև կոչ են արել դադարեցնել Ադրբեջանին ցանկացած ռազմական օգնության Որպես օրինակ մատնանշում են 2023–ի սեպտեմբերի 19-ին Երևանում կազմակերպված բողոքի ակցիայի իրադարձությունները Հանդիպումը տեղի կունենա, եթե Հայաստանը ևս տա իր համաձայնությունը Այս գերեզմանատանն են ամփոփված այնպիսի նշանավոր հայերի մարմինները, ինչպիսինք են Վիլյամ Սարոյանն ու Սողոմոն Թեհլերյանը Ամենաընթերցվողը բաժնում | ԻՆԳՈ-ն ապահովագրել է Career Сity Fest 2K24-ը և ներկայանում է շուկայում առաջին՝ միջոցառումների ապահովագրման պրոդուկտով Ապահովագրության պայմաններն ընտրվում են՝ հաշվի առնելով յուրաքանչյուր իրադարձության առանձնահատկությունները Ակբա բանկ․ ՀՀ-ում առաջին անգամ թողարկվում են UnionPay International-ի քարտեր Ակբա բանկը քարտերը տրամադրում է ռեզիդենտ և ոչ ռեզիդենտ ֆիզիկական և իրավաբանական անձանց Վարչապետ․ ՀԱՊԿ-ն ուզում էր ՀՀ գալ ոչ թե որպես դաշնակից, այլ` խաղաղապահ Նա հավելել է, որ դա էր ՀԱՊԿ-ի հետ հայկական կողմի ամենամեծ խնդիրը Փաշինյան. Ցեղասպանության զոհերի ցուցակագրման օրակարգ իշխանության օրակարգում երբեք չի եղել Նա նշել է, որ այդ մասին ավելի վաղ էլ է հայտարարվել |