«Ռոսիա 1»-ը ֆիլմ կցուցադրի լեգենդար հետախույզ Գոհար Վարդանյանի մասին

24 հունիսի 2017 - 14:03 AMT

PanARMENIAN.Net - Հունիսի 25-ին 01:30-ին ռուսական «Ռոսիա 1» հեռուստաալիքը կցուցադրի «Անիտա» ծածկանունով» հեռուստաֆիլմը: Ֆիլմի սցենարիստն է Լյուդմիլա Ռոմանենկոն, ռեժիսորը՝ Անդրեյ Կուրենկովն է: Ֆիլմն անսովոր կառուցվածք ունի: Հայտնի հետախույզ, ոչ լեգալ հետախուզության լեգենդ, Խորհրդային Միության հերոս Գևորգ Վարդանյանի կնոջ և զինակցի՝ Գոհար Վարդանյանի հետ բոլոր զրույցները վարում է ՌԴ Արտաքին հետախուզության ծառայության տնօրեն Սերգեյ Նառիշկինը, հայտնում է Rg.ru-ն:

Գոհար Վարդանյանը, թերթելով լուսանկարների ալբոմը, հիշում է հետախույզի իր կյանքը: Եվ եթե «Թեթև հեծելազոր» խմբի այն ժամանակ տակավին պատանի անդամների մասին, որոնք օգնեցին ձերբակալել Աբվերի դիվերսանտներին և կանխել Ստալինի, Ռուզվելտի և Չերչիլի դեմ մահափորձը, լավ է հայտնի, ապա անլեգալ Վարդանյանների հետագա գործունեությունը մինչ օրս փակ է: Ֆիլմը թույլ է տալիս մի փոքր բացել գաղտնիության քողը:

16 տարեկանում Գոհարը գիտակցաբար ընտրել է Հայրենիքին անմնացորդ նվիրվելու ճանապարհը` դառնալով իր ապագա ամուսնու և զինակից ընկերոջ Գևորգ Վարդանյանի հակաֆաշիստական խմբի անդամ:

Գոհար և Գևորգ Վարդանյաններն աշխատել են Եվրոպայի երկրներում, որոնցից մեկը կոնկրետ նշվում է: Դա Իտալիան էր, որտեղից հետախույզները հաճախ այլ երկրներ են մեկնել: Գոհար Վարդանյանը մինչ օրս հստակ թիվը չի նշում՝ ասելով «բազում»:

Հենց Իտալիայում է նրանց հետ պատահել դեպքը, որը կարող էր վերջ դնել հետախույզների կարիերային: 1978-ի մայիսին «Կարմիր բրիգադների» կողմից Իտալիայի վարչապետ Ալդո Մորոյի առևանգումից, և ինչպես հետո պարզվեց, սպանությունից հետո, ոստիկանությունն ուշացումով սկսեց ահաբկիչների որոնումները: Կանգնեցրին և ստուգեցին նաև «Անիտայի» և «Անրիի»՝ Գևորգի մեքենան: Հասկանալի է, ոչինչ չգտան: Երկրորդ անգամ կանգնեցրին և խուզարկեցին և հմարտական զենք գտան փամփուշտներով: Ի՞նչ է: Սադրա՞նք: Թե ոստիկանությունը բացահայտե՞լ է անլեգալներին: «Անիտան» և «Անրին» լիակատար հանգստություն պահպանեցին՝ արժանապատվորեն պատասխանելով բոլոր հարցերին, ինչում ասես նրանց չէին մեղադրում: Եվ պարզվեց, որ դա զուտ ոստիկանության թափթփվածության արդյունք էր՝ առաջին անցակետում, որտեղ կանգնեցրել էին իրենց մեքենան, զննություն անցկացնող ոստիկանը մեքենայի բեռնախցում էր թողել իր զենքը: Թե ինչի կարող էր հանգեցնել այդ պատահարը Իտալիայի վարչապետի առևանգողներին որոնելու ժամերին, դժվար է պատկերացնել:

Ֆիլմում ևս մի քանի նման դրվագ կա: Այդպես, վերդառնալով մոսկովյան արձակուրդից (այո, անլեգալներն էլ են արձակուրդ ունենում), «Անիտան» օտար երկրի իր խոհանցում սկսում է երգել այն ժամանակ շատ սիրված «Երեք հրացանակիրները» ֆիլմից մի մեղեդի...և նույն պահին նկատում է «Անրիի» քննադատող հայացքը: Մանրուք, դատարակ բան, ի՞սկ եթե տանը հանկարծ կողմնակի մեկը լիներ: Այդ դեպքից հետո Գոհար Վարդանյաննն արտերկրում խորհրդային երգեր չէր երգում:

Պարբերականը ևս մեկ դրվագ է ներկայացնում ֆիլմից՝ Սերգեյ Նառիշկինը Գոհար Վարդանյանին է հանձնում փակ հանդիսության №1 հրավիրատոմսը, որը կայանալու է առաջիկա օրերին: Իսկ 91-ամյա «Անիտան» ընդունում է հրավերը: Անշուշտ՝ նա ներկա կլինի անլեգալ հետախուզության ստեղծման 95-ամյակին նվիրված միջոցառմանը:

Հետախուզական վերջին գործուղումից Վարդանյանները վերադարձել են 1986-ին։ Մի քանի ամիս անց Գոհար Վարդանյանն անցել է թոշակի, իսկ Գևորգ Վարդանյանն իր ծառայությունը շարունակել է մինչև 1992-ը:

Գոհար Վարդանյանն օպերտիվ աշխատանք է կատարել ավելի քան 30 տարի, իսկ ընդհանուր աշխատանքային ստաժը 47 տարուց ավելի է: Թոշակի անցնելով` Գոհար Վարդանյանը շարունակում է մեծ աշխատանք կատարել երիտասարդ մասնագետների պատրաստման գործում` փոխանցելով նրանց իր հարուստ փորձը:

Հղումներ թեմայով.

Rg.ru: Сергей Нарышкин расскажет о нелегале Гоар Вартанян на канале "Россия 1"