Արցախի ուսհաստատություններն անորոշ ժամանակով փակվում են

PanARMENIAN.Net - Արցախի դպրոցներն ու բուհերը որոշ ժամանակով փակվում են։ Այդպիսի հանձնարարկան է տվել նախագահ Արայիկ Հարությունյանը, ֆեյսբուքյան էջում գրել է ԱՀ ԱԺ նախագահ Արթուր Թովմասյանը։

«Արցախի Հանրապետության Գերագույն գլխավոր հրամանատար Արայիկ Հարությունյանը հանձնարարել է հայտարարել Արցախում ուսումնական հաստատությունների՝ անորոշ ժամանակով փակվելու մասին։ Սիրելի՛ հայրենակիցներ, խուճապի չմատնվեք, այս ամենն ձեր իսկ ապահովության համար է արվում։ Հաղթելու ենք»,- ասվում է գրառման մեջ։

Ադրբեջանը սեպտեմբերի 27-ի վաղ առավոտյան Արցախի ուղղությամբ սկսել է օդային և հրթիռային հարձակում՝ թիրախավորելով թե ռազմական օբյեկտներ, թե քաղաքացիական ենթակառուցվածքներ, այդ թվում՝ Ստեփանակերտում։ Հայկական կողմը խոցել է հակառակորդի երկու ուղղաթիռ, 3 տանկ, 4 անօդաչու թռչող սարք, որոնցից 1-ը՝ Տավուշում։ Արցախում երկու քաղաքացիական է զոհվել՝ 1 կին և 1 երեխա, կա 2 քաղաքացիական վիրավոր։

ՊԲ հրամանատար, գեներալ-մայոր Ջալալ Հարությունյանը հայտնել է, որ սեպտեմբերի 27-ի առավոտյան ադրբեջանական բանակը հրթիռահրետանային նախապատրաստությունից ու ԱԹՍ հարվածներից հետո հարձակման է անցել շփման գծի ամբողջ երկարությամբ: Այս պահին ՊԲ ստորաբաժանումները, հակառակորդին մեծաթիվ կորուստներ պատճառելով, հաջողությամբ խափանում են նրա ծրագրերը: