Իշխան Սաղաթելյանն ընտրվել է ԱԺ փոխնախագահ

PanARMENIAN.Net - «Հայաստան» խմբակցության կողմից առաջադրված թեկնածու Իշխան Սաղաթելյանը երրորդ քվեարկությունից հետո ընտրվել է Ազգային ժողովի փոխնախագահ։

Հաշվիչ հանձնախմբի նախագահ Նարեկ Բաբայանը հայտարարել է, որ քվեարկությանը մասնակցել է 103 պատգամավոր։ Կողմ է քվեարկել 64 պատգամավոր, դեմ՝ 37, 2 քվեաթերթիկ ճանաչվել է անվավեր։

Մինչ այդ 2 անգամ Սաղաթելյանը ընտրվել է ԱԺ փոխնախագահ։ Առաջին քվեարկության ժամանակ Սաղաթելյանի թեկնածությանը կողմ էր քվեարկել 53 պատգամավոր, դեմ՝ 50-ը, 1 քվեաթերթիկ անվավեր էր ճանաչվել։

Երկրորդ քվեարկության ժամանակ անվավեր է համարվել 5 քվեաթերթիկ։ Քվեարկությանը մասնակցել է 103 պատգամավոր՝ կողմ է քվեարկել 49-ը, դեմ՝ 49։

«Հայաստան» խմբակցության 3 անդամ չի մասնակցում քվեարկությանը, քանի որ Մխիթար Զաքարյանն ու Արթուր Սարգսյանը կալանավորված են, իսկ Դավիթ Սեդրակյանը, բացակա է «հարգելի պատճառով», ինչպես ասել են խմբակցության անդամները։

Ըստ օրենքի պահանջի՝ ԱԺ 3 փոխնախագահից մեկը պետք է լինի ընդդիմության ներկայացուցիչ։ Մինչ առաջին քվեարկությունը ԱԺ նախագահ Ալեն Սիմոնյանը կարծիք էր հայտնել, թե ճիշտ կլիներ, որ ԱԺ ընդդիմադիր փոխնախագահը լիներ «Պատիվ ունեմ» խմբակցությունից։ Ավելի վաղ ԱԺ-ն խորհրդարանի փոխնախագահներ էր ընտրել իշխանական «Քաղաքացիական պայմանագիր» խմբակցության թեկնածուներ Ռուբեն Ռուբինյանին և Հակոբ Արշակյանին։