Արցախում գազատարի վերականգնումը կմեկնարկի տարածքի ականազերծումից հետո

PanARMENIAN.Net - Արցախի ներքին գործերի նախարարության արտակարգ իրավիճակների պետական ծառայության սակրավորները մարտի 9-ի առավոտից սկսել են Ադրբեջանի վերահսկողության տակ գտնվող Շուշի-Լիսագոր-Բերձոր հատվածում վթարված գազատարի տարածքում ականազերծման աշխատանքները, որից հետո կմեկնարկեն գազատարի վերականգնման աշխատանքները:

Այդ մասին հայտնել է Արցախի ՆԳՆ ԱԻ պետական ծառայության հասարակայնության հետ կապերի բաժնի պետ Հունան Թադևոսյանը, տեղեկացնում է Արմենպրեսը։

«Ռուս խաղաղապահների հետ բանակցությունները, կարծես, արդյունք են տվել, և հիմա սակրավորները դեպքի վայրում են՝ ականազերծման աշխատանքներ իրականացնելու նպատակով»,-ասաց նա՝ հավելելով, որ այդ աշխատանքներից հետո նոր կմեկնարկեն վերականգնողական աշխատանքները:

«Հայաստան» խմբակցության պատգամավոր Գեղամ Մանուկյանը ՀՀ ԱԺ արտահերթ նիստում հայտարարել է, որ հրատապ կարգով ԱԺ-ում պետք է քննարկվեր իրավիճակը, որը ստեղծվել է Արցախում, որտեղ մարդիկ արդեն երկրորդ օրն է ջեռուցում չունեն։ «Գնդակոծվում է Խրամորթ գյուղը, գյուղատնտեսական աշխատանքները ուշանում են, իսկ դրա վերաբերյալ պաշտոնական Երևանից որևէ հայտարարություն չկա, փոխարենը ԱԳ նախարարությունը շարունակում է խաղաղության պայմանագրի և խաղաղության դարաշրջանի արհեստական թեզի կրկնումը»,-ասել է նա։

Մարտի լույս 8-ի գիշերը, ժամը 01:00-ի սահմաններում, Հայաստանից Արցախ մատակարարվող գազի խողովակաշարում Շուշիի շրջանի հատվածում տեղի ունեցած վթարի հետևանքով խափանվել է ամբողջ Արցախի գազամատակարարումը:

ԱՀ ազգային անվտանգության ծառայության կողմից նույնպես միջոցներ են ձեռնարկվում խափանման պատճառները պարզելու, այդ թվում Ադրբեջանի զինված ուժերի կողմից հնարավոր դիվերսիոն կամ վնասարար դրսևորումները և հանցավոր արարքները վեր հանելու ուղղությամբ: