Ֆրանսիայի դեսպանին Ադրբեջանի ԱԳՆ են կանչել Մակրոնի հայտարարությունների պատճառով

PanARMENIAN.Net - Ադրբեջանում Ֆրանսիայի դեսպան Անն Բուայոնին ԱԳՆ են կանչել, որպեսզի նա պարզաբանումներ տա նախագահ Էմանուել Մակրոնի հայտարարությունների վերաբերյալ, որոնք նա արել է Մարսելում հայ համայնքի ներկայացուցիչների հետ հանդիպմանը։

Բուայոնն ասել է, որ չի տիրապետում տեղեկատվության այդ հարցի շուրջ։

Նրան ասվել է նաև, որ ադրբեջանական կողմը պաշտոնական Փարիզից ակնկալում է Մակրոնի անունից արտահայտած կարծիքների հաստատում կամ հերքում, հայտնում է Haqqin.az-ը։

Ադրբեջանի ԱԳՆ-ն նաև հայտարարություն է տարածել՝ Մակրոնին անվանելով «հայկական լոբբիի գործիք» և նշելով, թե նա «մշտապես հանդես է գալիս հակաադրբեջանական հայտարարություններով»։

Ֆրանսիայի նախագահ Էմանուել Մակրոնը Մարսել եռօրյա այցի շրջանակում տեղի հայ համայնքի հետ հանդիպմանը, որին ներկա էր նաև ԱԺ պատգամավոր Սաբրինա Ակրեսթի-Ռուպաշը, ասել է, որ չկասկածեն Արցախի և ընդհանրապես Հայաստանի գծով իր վճռականությանը։ Այն դիտարկմանը, որ իրենից ավելի գործնական, ոչ միայն բարոյական քայլեր են ակնկալվում, Մակրոնն ասել է, որ Ադրբեջանի նախագահ Իլհամ Ալիևի վրա նույնիսկ ավելի շատ ճնշում է գործադրում, քան ՀՀ վարչապետ Նիկոլ Փաշինյանը: