Մամիջանյան․ «Լույսի ռուբիլնիկը» տալիս ենք Ադրբեջանին

PanARMENIAN.Net - Ազգային ժողովի «Պատիվ ունեմ» խմբակցության ղեկավար Հայկ Մամիջանյանը խորհրդարանում անդրադարձել է Հայաստանի և Ադրբեջանի էներգետիկ համակարգերի սպասվող միացմանը՝ գնահատելով այն որպես խիստ վտանգավոր քայլ, հայտնում է Sputnik Արմենիան:

Վարչապետ Նիկոլ Փաշինյանը հայտարարել է, որ Հայաստանը և Ադրբեջանը էներգահամակարգերը միանալու են կողմերն օգտվելու են ներմուծման ու արտահանման հավասար պայմաններից։

«Կարո՞ղ է՝ մի օր էլ բանակները միացնի, ասի՝ ծախսերն օպտիմալ կազմակերպելու համար եկեք Հայաստանի և Ադրբեջանի զինված ուժերը միացնում իրար։ Նույն տրամաբանությունն է։ Ես հիմա պետք է բացատրե՞մ՝ ինչ ստրատեգիական կարևորություն ունի էներգետիկ համակարգը, ինչքան վտանգավոր է դա։ Սիրելի՛ քաղաքացիներ, դուք համաձա՞յն եք ձեր լույսի ռուբիլնիկը տալ Ադրբեջանին»,- նշել է պատգամավորը։

2026 թվականի հունվարի 14-ին հրապարակվել է «Թրամփի ուղի՝ հանուն միջազգային խաղաղության և բարգավաճման» նախագծի (TRIPP) իրականացման շրջանակը։

ՀՀ վարչապետ Նիկոլ Փաշինյանն ու Ադրբեջանի նախագահ Իլհամ Ալիևը 2025 թվականի օգոստոսի 8-ին Վաշինգտոնում ստորագրել են 7 կետից բաղկացած համատեղ հռչակագիր, որով նախատեսվում է Սյունիքի մարզով ռազմավարական նշանակության տարանցիկ ճանապարհի ստեղծում՝ «Թրամփի ուղի» (TRIPP) անվանմամբ։ Այն պետք է ապահովի Ադրբեջանի առևտրային մուտքը Նախիջևան։

ՀՀ վարչապետը սեպտեմբերի 11-ին հավելել էր, որ Հայաստանը ամերիկյան կողմին հող չի վարձակալեցնում 99 տարով, այլ տրամադրում է կառուցապատման իրավունք։