ՉԻ ԲԱՑԱՌՎՈՒՄ, ՈՐ ԱԴՐԲԵՋԱՆԻ ՔԱԶԱՔՑԻՆԵՐԸ ՆՈՐ ՏԱՐԻՆ ԴԻՄԱՎՈՐԵՆ ՄՈՄԵՐԻ ԼՈՒՅՍԻ ՏԱԿ

PanARMENIAN.Net - Բաքվի թերթերի հաղորդագրությունների համաձայն, Ադրբեջանի մայրաքաղաքում հովհարային անջատումներ կլինեն նաեւ այս ձմեռ: Որոշ ԶԼՄ-ներ այդ կապակցությամբ կանխագուշակում են մի իրավիճակ, որի իրականացման դեպքում երկրի քաղաքացիները ստիպված կլինեն նոր տարին դիմավորել մոմերի լույսի տակ: Ադրբեջանը, որ առասպել էր ստեղծել իր ընդերքում ածխաջրածնային հումքի անհամար պաշարների մասին, իրականում ընդունակ չէ ապահովելու էներգակիրների նույնիսկ սեփական պահանջարկը: Չնայած Իրանից էներգակիրների շարունակվող առաքումներին եւ վերջերս ռուսական ՌԱՈ «ԵԷՍ» ընկերության հետ կնքած պայմանագրին երեք միլիարդ կՎտ/ժամ էլեկտրաէներգիայի ներմուծման մասին` մասնագետները կասկածում են , որ չեն կարողանա կատարել նախագահի անցյալ տարվա « Էներգակիրներով բնակչության եւ տնտեսության ապահովման բարելավման միջոցառումների մասին» հրամանագիրը: Ներկայումս Ադրբեջանի էներգահամակարգի փաստացի հզորությունը կազմում է մոտ երեք հազար մեգավատ, ընդ որում էլեկտրաէներգիայի իրական պահանջը մոտենում է չորս հազարին: Ելնելով դրանից` «Ազերէներժի» ընկերությունը մշակել է հանրապետության բոլոր սպառողներին էլեկտրաէներգիայի սահմանափակ մատակարարաման ժամկետացուցակ:



Լրատվության արտատպելու, կամ օգտագործելու դեպքում հղումը "PanARMENIAN.Net -ի վրա պարտադիր է: