Արցախի հետ շփման գծում պատ կառուցելու Ադրբեջանի որոշումն ընդամենը քարոզչության մաս է: Այդ մասին Երևանում կայացած մամլո ասուլիսում հայտարարել է Արցախի ԱԳ նախկին նախարար Արման Մելիքյանը: Ըստ նրա, այդ քայլով Ադրբեջանը փորձում է կրկնել Իսրայելի փորձը, որը պաշտպանական պատ կառուցեց պաղեստինցիներից պաշտպանվելու համար: Ընդ որում, նա նշել է, որ այդ երկու դեպքը չի կարելի համեմատել: «Սակայն, ես չեմ կարծում, որ այդ պատը կկառուցվի Արցախի ու Ադրբեջանի ԶՈւ շփման ողջ գծի երկայնքով»,-ասել է Մելիքյանը:

Իր հերթին ՀՀԿ խորհրդարանական խմբակցության պատգամավոր Լեռնիկ Ալեքսանյանը չի կարծում, թե պատի կառուցումը լոկ քարոզչական բնույթ է կրում: Չի բացառվում, ըստ նրա, որ այդպիսով ադրբեջանական կողմը ցանկանում է թաքցնել իր դիպուկահարներին:

Ադրբեջանը պաշտպանական պատ է կառուցում Արցախի հետ շփման գծում: Ինչպես հայտնում են ադրբեջանական ԶԼՄ-ները, Չրաղլի գյուղի մոտ, որը սահմանակից է ԼՂՀ Մարտակերտի շրջանին արդեն կառուցվել է 700 մ երկարությամբ և 3 մետր բարձրությամբ պատ: «Պատի կառուցումը կապահովի խաղաղ բնակչության անվտագնությունը, հնարավորություն կտա մարդկանց վերադառնալ իրենց տները: Դա մեծ խնդիր է, քանի որ գյուղի 78 տներից 24-ում ոչ ոք չի ապրում, քանի որ այն մշտապես գնդակոծվում է: Իսկ եթե պաշտպանություն լինի գնդակներից , մարդիկ կկարողանան այնտեղ ապրել»,-հայտարարել է Աղդամի շրջանի Չրաղլի գյուղի գյուղապետ Գաբիլ Աբբասովը:

«Հայ դիպուկահարներից պաշտպանվելու համար» շփման գծում պատ կառուցելու գաղափարը քննարկվում է Ադրբեջանում 2006 թվականից: