Հաքերները գրոհել են Ru դոմենների խոշորագույն ռուսական գրանցողի Ru-Center-ի DNS սերվերները: Այդ մասին հայտնել է ընկերության հասարակայնության հետ կապերի տնօրեն Անդրեյ Վորոբյովը, հայտնում է ՌԻԱ Նովոստին:
Մեկ շաբաթվա ընթացքում գրանցվել են առանձնակի ուժգնության DDoS-հարձակումներ, որ ուղղված են ընկերության DNS սերվերների դեմ: Ըստ նրա, Ru-Center-ն արդեն դիմել է իրավապահ մարմիններին ու աշխատում է գործընկերների հետ գրոհներից պաշտպանվելու համար:
DNS սերվերների անջատման դեպքում կայքերը դադարում են աշխատել:
Ru-Center ընկերության DNS սերվերները սպասարկում են մոտ 500 հազար ինտերնետ-ռեսուրսներ: Ըստ Անդրեյ Վորոբյովի, սերվերները պաշտպանված են DDoS-հարձակումներից, ուստի դրանց «անջատման հավանականությունը զուտ հիպոթետիկ է»: