Հայաստանի նախագահի ու Ամենայն Հայոց կաթողիկոսի մասնակցությամբ գործարկվեց աշխարհի ամենաերկար ճոպանուղին

16 հոկտեմբերի 2010 - 14:25 AMT

PanARMENIAN.Net - Հոկտեմբերի 16-ին Սյունիքի մարզում մեկնարկում է «Տաթևի վերածնունդ» ծրագիրը, որը նշանավորվեց աշխարհում ամենաերկար հետադարձելի ճոպանուղու գործարկմամբ: Ճոպանուղու առաջին ուղևորները դարձան ՀՀ նախագահ Սերժ Սարգսյանը, Ն.Ս.Օ.Տ.Տ. Գարեգին Բ Ծայրագույն Պատրիարք և Ամենայն Հայոց Կաթողիկոսը, Հայաստանի ազգային մրցունակության հիմնադրամի գործադիր տնօրեն Բեկոր Փափազյանը և մերձակա գյուղերի 7 երեխաներ: Միջոցառումը Տաթև է բերել հարյուրավոր հյուրերի աշխարհի տարբեր երկրներից, որոնցից շատերը ծրագրի բարերարներն են: 2008 թվականին տարբեր ազգության և կրոնական պատկանելիության մարդիկ միավորվեցին Տաթևի վանական համալիրի վերածննդի գաղափարի շուրջ' մոսկվաբնակ հայ գործարար Ռուբեն Վարդանյանի և Վերոնիկա Զոնաբենդի գլխավորած «Տաթև» հիմնադրամի շրջանակներում: «Տաթևի վերածնունդ» ծրագրի իրագործումը վստահվել է Հայաստանի ազգային մրցունակության հիմնադրամին, որը գործում է պետական և մասնավոր հատվածների համագործակցության սկզբունքով:

«Տաթևի թևեր» անունը կրող ճարտարագիտական այս հրաշքը, որը 5.7 կմ ձգվում է Որոտան գետի խոր և գեղատեսիլ կիրճի վրայով, կապում է Հալիձոր և Տաթև գյուղերի մոտակայքում տեղակայված երկու կայանները ճիշտ այնպես, ինչպես «Տաթևի վերածնունդ» ծրագիրը կամրջում է Տաթևի անցյալի ժառանգությունը շրջանի խոստումնալից ապագայի հետ:

Ճոպանուղու կառուցումը տևեց 11 ամիս: Այն կառուցվել է շվեյցարա-ավստրիական «Garaventa Doppelmayer» ընկերության կողմից, որն աշխարհում հասանելիություն ապահովող ընկերությունների առաջատարն է: 13 մլն եվրո արժողությամբ ճոպանուղին 9-րդ դարի Տաթևի վանական համալիրը այցելուների համար հասանելի դարձրեց շուրջ տարի: Այժմ այն ոչ միայն անվճար կծառայի հարակից գյուղերի բնակիչներին, այլև կգրավի բազմաթիվ զբոսաշրջիկների աշխարհի տարբեր անկյուններից:

Ճոպանուղու հետ մեկտեղ միջոցառումը նաև ի ցույց կդնի պետական և մասնավոր հատվածների համագործակցության կարևոր արդյունքը' ապացուցելով այս մոդելի գործունակությունն ու արդյունավետությունը նման մեծածավալ նախաձեռնություններում: Այսպես, Երևանի մայրուղուց Տաթև տանող 26 կմ ճանապարհը «Տաթևի վերածնունդ» ծրագրի շրջանակներում վերակառուցվեց ՀՀ կառավարության կողմից:

Միջոցառումը նաև կներկայացնի արդեն ավարտված կամ մեկնարկած որոշ նախաձեռնություններ, այդ թվում' 17-րդ դարի ձիթհանը, ազգային խոհանոցի վերածննդի ծրագիրը, էկոտուրիզմի զարգացման ծրագիրը և այլն:

ՅՈՒՆԵՍԿՈ-յի համաշխարհային ժառանգության հավակնորդ Տաթևի համալիրը Հայաստանի հնագույն և ամենահեղինակավոր վանքերից է և աննախադեպ կարևորություն ունեցող կրթական կենտրոն: Իր ճարտարապետական, պատմական և բնական արժեքների շնորհիվ այն նաև միջոց է' շրջանում զբոսաշրջության զարգացմանը զարկ տալու համար: 50 մլն ԱՄՆ դոլար արժողությամբ «Տաթևի վերածնունդ» ծրագիրը նպատակ ունի համադրել համալիրի վանական և զբոսաշրջային արժեքը' շրջանը գրավիչ զբոսաշրջային ուղղություն դարձնելու համար, ինչը հիմք կլինի համայնքի բարգավաճման համար:

Ծրագիրը կազմված է մի քանի բաղադրիչներից. վանական համալիրի պահպանում, դրա վանական և գիտական ավանդույթների վերականգնում, զբոսաշրջային արդյունքի մշակում հարակից կիրճում և շրջակա վեց համայնքներում, ինչպես նաև զբոսաշրջային ենթակառուցվածքների ստեղծում: