Ընտանեկան բռնություն, գարդասիլ ու ծխելու արգելք

Ընտանեկան բռնություն, գարդասիլ ու ծխելու արգելք

2017-ի ամենահնչեղ 10 հասարակական իրադարձությունը

Անցնող 2017-ը լի էր հասարակական տարբեր ոլորտներում բեկումնային նշանակություն ունեցող օրենսդրական նախագծերով, որոշումներով, միջադեպերով, ինչպես նաև բնակչության սոցիալական վիճակի վրա անմիջական ազդեցություն ունեցող գործընթացներով: Դրանց մեծ մասը հիմնականում դժգոհություն է հարուցել հասարակության շրջանում:

PanARMENIAN.Net - 25 օր հացադուլից հետո՝ մարտի 16-ին, մահացավ ՊՊԾ գունդը գրաված «Սասնա ծռեր» խմբին սնունդ հասցրած Արթուր Սարգսյանը՝ «Հաց բերողը»: Նրա մահը դատական համակարգի նկատմամբ քննադատության մեծ ալիք բարձրացրեց սոցցանցերում: «Հաց բերողի» մահվանը հաջորդած օրերին հարյուրավոր քաղաքացիներ բողոքի հավաքներ, երթեր իրականացրեցին:

Կտրուկ միջոցներ ծխելու դեմ

2017-ի մայիսին ՀՀ առողջապահության նախարար Լևոն Ալթունյանը հայտարարեց երկրում ծխելու դեմ պայքարի ռազմավարության մասին, որով հասարակական վայրերում ծխելու արգելք է նախատեսվում սահմանել: Պայքարի այս ձևը հասարակության մի ստվար հատված համարեց կտրուկ և ոչ արդյունավետ, իսկ ծխողները դժգոհեցին, որ ոտնահարվում են իրենց իրավունքները: Օգոստոսին գործադիրն ընդունեց ՀՀ ԱՆ-ի ներկայացրած ծխելու դեմ պայքարի ռազմավարությունը։

Ամառային հրդեհներ

Օգոստոսին մի քանի օր շարունակ այրվեց «Խոսրովի անտառ» պետական արգելոցը: Հրդեհը տարածվեց արգելոցի 2,500-3000 հա տարածքի վրա՝ ոչնչացնելով հարյուրավոր ծառեր, բույսեր և կենդանիներ: Հրդեհաշիջման աշխատանքներին ուժային կառույցներից զատ մասնակցեցին նաև կամավորներ, օգնության հասավ ռուսական ԻԼ-76 հրշեջ ինքնաթիռը: Հրդեհի բռնկումից չորս օր անց միայն հաջողվեց մարել հիմնական օջախները: Հրդեհներ բռնկվեցին նաև Հայաստանի մի շարք անատառներում և «Նաիրիտ» գործարանում:

Պայքար՝ հանուն անտառների ոչնչացման

Սեպտեմբերին Տավուշի մարզի Հաղարծին, Թեղուտ, Գոշ համայնքների մոտ 1000 բնակիչ մի քանի անգամ փակեց միջպետական ճանապարհը. բնապահպանության նախարարությունից պահանջում էին վերացնել «Դիլիջան» ազգային պարկում ծառահատում անելու արգելքը: Գյուղացիները ծառահատումները պատճառաբանում էին ձմեռվա համար վառելափայտ կուտակելու անհրաժեշտությամբ և գազի բարձր սակագներով:

Փրկություն արջերին

Հոկտեմբերին արտերկրի լրատվամիջոցները գրեցին հայաստանյան ժամանցի վայրերում «անմարդկային» պայմաններում պահվող արջերի մասին: Սոցցանցերում բարձրացավ կենդանիների պաշտպանների և մտահոգ քաղաքացիների հերթական բողոքի ալիքը: Արդյունքում սկսվեց կենդանիներին հատուկ ապաստարաններ տեղափոխելու գործընթացը:

Տարկետումը վերացվեց

Նոյեմբերին օրենսդիրն ընդունեց «Զինծառայության և զինծառայողների կարգավիճակի մասին» օրենքի նախագիծը, որով վերացվում է պարտադիր զինվորական ծառայությունից տարկետման իրավունքը: Մինչև այդ ստեղծվել էր «Հանուն գիտության զարգացման» ուսանողական նախաձեռնությունը, որը մի քանի օր շարունակ դասադուլ հայտարարեց բուհերում, իրականացրեց ցույցեր օրենսդիր և գործադիր մարմինների շենքերի դիմաց: Նախաձեռնության համակարգողները հանդիպեցին և բանակցեցին վարչապետի և բարձրաստիճան այլ պաշտոնյաների հետ, սակայն չգալով ընդհանուր հայտարարի երկու անգամ հացադուլ հայտարարեցին:

«Գարդասիլն» ու դավադրությունների տեսությունը

Դեկտեմբերին Հայաստանում ներդրվեց արգանդի վզիկի քաղցկեղի առաջացման հիմնական պատճառներից պապիլոմավիրուսային վարակի դեմ պատվաստանյութը (ՄՊՊ), որը հայտնի է նաև «Գարդասիլ» անվամբ: Պատվաստումներ իրականացվեցին 13 տարեկան աղջիկների շրջանում: Չնայած ՄՊՎ-ի մասնագեները նշում էին, որ պատվաստման դրական ազդեցությունը նախաքաղցկեղային վիճակների և արգանդի պարանոցի քաղցկեղի կանխարգելման հարցում ակնառու է, ոչ մասնագետները կասկածամտություն էին հայտնում դրա վերաբերյալ՝ հայտարարելով, որ այն վնասում է վերարտադրողականությանը և սպառնում ազգային անվտանգությանը:

Ընտանեկան բռնությունը կպատժվի օրենքով

Անցնող տարվա դեկտեմբերին ԱԺ-ն ընդունվեց հասարակական որոշ շրջանակներում աղմուկ բարձրացրած ընտանեկան բռնության կանխարգելման մասին օրենքը: Նախագծի ընդունմամբ ակնկալվում է ապահովել ընտանեկան բռնության կանխարգելման կազմակերպաիրավական հիմքերը, ընտանեկան բռնության ենթարկված անձանց պաշտպանությունն ու անվտանգությունը, արդարադատության մատչելիությունը, նրանց տրամադրել անհրաժեշտ հոգեբանական, իրավաբանական, սոցիալական, համապատասխան դեպքերում` նաև ժամանակավոր նյութական աջակցություն: Օրինագծի հակառակորդները պնդում են, որ օրենքը խարխլելու է հայ ընտանիքի հիմքերը, թույլ է տալու այլոց խլել ծնողներից երեխաներին:

Աջ ղեկով մեքենաների ներմուծման արգելքը

Դեկտեմբերին հանրային քննարկման ներկայացվեց աջ ղեկով տրանսպորտային միջոցների հետագա ներմուծումն և շահագործումն արգելող որոշումների նախագիծ: Ստեղծվեց նախագծի դեմ պայքարող «Աջղեկ» նախաձեռնությունը, որ ավտոերթ կազմակերպեց դեպի ՀՀ տրանսպորտի, կապի և տեղեկատվական տեխնոլոգիաների նախարարության շենք: Նախաձեռնությունը խոստանում է շարունակել պայքարը որոշման դեմ ու տապալել որոշման ընդունումը:

2019-ից նոր տարուն հայաստանցիները երեք օրով քիչ կհանգստանան

Դեկտեմբերին գործադիրը հաստատեց «Տոների և հիշատակ օրերի մասին» օրենքում փոփոխությունների նախագիծը, որով առաջարկվում է ոչ տոնական դարձնել հունվարի 3-ը, 4-ըև 5-ը։ Փոփոխություններն ուժի մեջ կմտնեն 2019 թվականի հունվարի 1-ից:

Նանե Մանասյան/ PanARMENIAN.Net
 Ամենաընթերցվողը բաժնում
7 գիրք, որ առաջարկում է Ջեֆ Բեզոսը
Ամերիկյան երազանքի հայկական տարբերակը
Facebook-ի հիմնադրի գրադարանից
Ինչ դիտել շաբաթ-կիրակի
 Ուշադրության կենտրոնում
Մերկելը տնային կարանտինում է. Նրան պատվաստած բժիշկը կորոնավիրուսով էր վարակված

Մերկելը տնային կարանտինում է. Նրան պատվաստած բժիշկը կորոնավիրուսով էր վարակված Գերմանիայի կանցլերն առաջիկա օրերին պարբերաբար կորոնավիրուսի թեստ կհանձնի

 Բաժնի այլ նյութերը
Ինչ դիտել շաբաթ-կիրակի 10 տեսանյութ, որ կլցնեն ձեր հանգստյան օրերը
Մտածիր ինչպես Մասկը 7 գիրք, որ կերտեցին SpaceX-ի ու Tesla-ի հիմնադրին
Աղետներ նկարողը Տեսախցիկը դեպի տառապողն ու խոցելին ուղղելիս ուզում ես կարեկցանք դնել գործիդ մեջ