EuFoA. Հայաստանն ու Հունգարիան միմյանց կարիքն ունեն և պետք է հաշտվեն

6 սեպտեմբերի 2012 - 18:13 AMT

PanARMENIAN.Net - «Հայաստանի եվրոպացի բարեկամներ» ՀԿ-ն (EuFoA) ողջունում է եվրոպական կառույցների կողմից Ադրբեջանում հակահայկական այլատյացության դրսևորման քննադատությունը:

Կազմակերպությունը կոչ է արել ԵՄ-ին վերջապես ճանաչել, որ Ադրբեջանը պահանջում է առավել քննդատական մոտեցում, քան մյուս երկրները: «Մենք տեղեկություններ ունենք, որ ԵՄ երկրների ԱԳ նախարարները մտադիր են քննարկել Սաֆարովի ներումը, իսկ Եվրախորհրդարանը կքննարկի համապատասխան բանաձևի ընդունման հնարավորությունը»,-ասվում է EuFoA հայտարարության մեջ:

«Ինչո՞ւ է ԵՄ-ն համատեղ ծրագրեր ֆինանսավորում նավթով հարուստ և ոչ ժողովրդավարական Ադրբեջանի հետ՝ միաժամանակ պատժամիջոցներ կիրառելով Բելառուսի դեմ: Դա հնարավոր չէ բացատրել եվրոպացի ընտրողներին: Իսկ Հայաստանին մենք կարող ենք զգուշացնել, որ նա խուսափի Ադրբեջանի լարած թակարդից: Ես կիսում եմ Ադրբեջանի հանդեպ խիստ միջոցներ կիրառելու պահանջը, սակայն Հայաստանը պետք է վարվի խելացի շախմատիստի պես՝ առաջնորդվելով հեռահար նպատակներով»,-հայտարարել է EuFoA գլխավոր քարտուղար Մայքլ Քամբեկը:

Կազմակերպությունը նաև հորդորել է Հայաստանին որոշակի քայլեր ձեռնարկել Հունգարիայի հետ հարաբերությունները կարգավորելու համար: «Թեև Սաֆարովին արտահանձնելու որոշումը շատ միամիտ էր, Հայաստանն ու Հունգարիան բազմադարյա կապեր ունեն և Ադրբեջանի կեղտոտ խաղը չպետք է փչացնի դրանք:

Հունգարիան կամուրջ է Արևմուտքի և Արևելյան Եվրոպայի միջև և Հայաստանի կարիքն ունի դա ամրապնդելու համար: Պետք է որոշակի աշխատանք տանել դժվարությունները հաղթահարելու համար»,-ասվում է EuFoA հայտարարության մեջ:

Գուրգեն Մարգարյան

2004-ի փետրվարի 19-ին ադրբեջանցի սպա Ռամիլ Սաֆարովը գիշերը կացնահարել է հայ Գուրգենի Մարգարյանին, երբ նա քնած էր: Երկուսն էլ մասնակցում էին Բուդապեշտում ՆԱՏՕ-ի «Գործընկերություն հանուն խաղաղության» ծրագրի շրջանակում կազմակերպված անգլերենի դասընթացներին: Սաֆարովն առաջին հարցաքննության ժամանակ իր արարքի պատճառներն այսպես է բացատրել. «Ափսոսում եմ, որ ոչ մի հայ մինչ այժմ չեմ սպանել... Բանակն ինձ գործուղեց այս դասընթացներին, և այստեղ իմացա, որ մեզ հետ դասընթացներում նաև երկու հայ կա: Ասեմ, որ իմ մեջ ատելություն ծագեց հայերի հանդեպ: Սկզբում բարևում էինք, այսինքն` նրանք էին բարևում, ես չէի պատասխանում: Սպանության պատճառն այն է, որ նրանք անցան մեր մոտով և ժպտացին մեր երեսին: Այդ պահին որոշեցի սպանել նրանց, այսինքն՝ լուսադեմին կտրել գլուխները»:

2006-ի ապրիլի 13-ին Բուդապեշտի առաջին ատյանի դատարանը դատապարտել է Սաֆարովին ցմահ բանտարկության առանց ներման իրավունքի 30 տարվա ընթացքում: 2007-ի փետրվարին Վճռաբեկ դատարանը դատավճիռն ուժի մեջ է թողել:

2012-ի օգոստոսի 31-ին Հունգարիան Ռամիլ Սաֆարովին արտահանձնել է Ադրբեջանին, որտեղ նրան որպես հերոս են դիմավորել: Նախագահ Իլհամ Ալիևը նրան ներելու մասին հրամանագիր է ստորագրել, վճարել 8 տարվա աշխատավարձն ու բարձրացրել զինվորական կոչումը:

Ավելի ուշ Հայստանի ԱԳՆ-ն Հունգարիայի արտգործնախարարությանը տեղեկացրել է երկու պետությունների միջև դիվանագիտական հարաբերությունները կասեցնելու` ՀՀ կառավարության որոշման մասին։