Արյունալի պատմությունը` System of a Down-ի շրջագայության շրջանակում. Ականատեսն ենք ցեղասպանությունների

9 հունվարի 2015 - 16:14 AMT

PanARMENIAN.Net - «Արյունալի պատմությունը` System of a Down-ի շրջագայությունների շրջանակում». Rolling Stone կայքը հրապարակել է լրագրող Քորի Գրոուին հարցազրույցը System of a Down խմբի մենակատար Սերժ Թանկյանի հետ: Հեղինակը նաև մի քանի տողով անդրադարձել է 1915 թվականի իրադարձություններին՝ նշելով, որ SOAD-ի բոլոր անդամներն այդ ցեղասպանությունը վերապրածների սերունդներ են:

Քորի Գրոուի հարցին, թե ինչու է խումբը հանդես գալիս այս թեմայով, և ինչու է որոշել Ցեղասպանության հարյուրերորդ տարելիցին նվիրված գործունեությունը շրջագայության տեսքով պլանավորել, Թանկյանը պատասխանել է. «Մենք ուզում ենք, որպեսզի 20-րդ դարի առաջին ցեղասպանության ճանաչումը հանգեցնի նրան, որ մարդկությունը դադարի ինքն իրեն սպանել: Ես սա ժպտալով եմ ասում, քանի որ սա ծիծաղելի երևույթ է:Մենք դեռ ականատեսն ենք ցեղասպանությունների: Մամուլում կարդացի, որ սիրիական Դեր Զորում Իսլամական պետության կողմից սպանվածների զանգվածային գերեզմանոց է հայտնաբերվել: Սա ինձ հիշեցրեց Դեր Զորի ավազներում՝ ճիշտ նույն վայրում, 20-րդ դարի առաջին ցեղասպանության զոհերի ոսկորների մասին: Եթե սա սիմվոլիզմ չէ, ապա ի՞նչ կարող է լինել»,- ասել է նա:

System Of A Down (SOAD) ռոք խումբը հայտարարել է համաշխարհային նոր շրջագայության մասին, որի առաջին համերգը կայացել է դեկտեմբերի 13-ին Լոս Անջելեսի The Forum համերգասրահում:

2015-ի ապրիլի 10-ից 20-ը խումբը համերգներ կունենա Մեծ Բրիտանիայում (10-ին), Գերմանիայում (13-ին), Ֆրանսիայում (14-ին), Բելգիայում (16-ին), Նիդերլանդներում (17-ին) ու Ռուսաստանում (20-ին):Իսկ ապրիլի 23-ին` Հայոց Ցեղասպանության 100-ամյա տարելիցի նախօրեին, խումբը բացօթյա համերգ կտա Երևանում` Հանրապետության հրապարակում: Համերգային շրջագայությունը կանցկացվի Wake up the souls (արթնացրեք հոգիները) խորագրով:

ՀՀ նախագահի աշխատակազմի ղեկավար Վիգեն Սարգսյանը հաստատել է, որ համերգը տեղի կունենա Հայոց ցեղասպանության միջոցառումները համակարգող պետական հանձնաժողովի հրավերով. համերգ-ակցիան ուղղված է Ցեղասպանության 100-րդ տարելիցի ոգեկոչմանը:

Հարցին, թե արդյոք խումբը երբևէ ելույթ ունեցել է Թուրքիայում, Թանկյանը պատասխանել է. «Ոչ: Մենք ուզում էինք Թուրքիան էլ ներառել մեր Wake up the Souls շրջագայության մեջ: Մեզ թույլտվություն էր անհրաժեշտ կառավարությունից, քանի որ բացեիբաց խոսում ենք ցեղասպանության մասին և հանդես ենք գալիս թուրքական կառավարության գործողությունների քննադատությամբ: Սակայն մենք թուրքական կողմից պատասխան չստացանք »:

Ըստ Թանկյանի՝ շատ հնարավոր է, որ Թուրքիան ճանաչի Հայոց ցեղասպանությունը: «Կարծում եմ՝ դա շատ հավանական է: Ես վերջերս կարդացել եմ, որ մի նոր օրինագիծ կա, որը ճանաչելու է անցյալի բոլոր հանցանքները, ներառյալ հայոց ցեղասպանությունը: Այն թուրքական խորհրդարանին է ներկայացրել քրդական փոքրամասնության ներկայացուցիչ Սեբահաթ Թունջելը: Չնայած, ես համոզված եմ, որ նրանք չեն հավաքի մեծամասնության ձայները՝ օրինագիծն ընդունելու համար: Այնուամենայնիվ, նրանց կողմից քաջ քայլ է՝ նման առաջարկով հանդես գալը, բացի այդ, դա խոսում է այն մասին, որ ժամանակները կարող են փոխվել, իսկ դա դրական տեղաշարժ է»,- նշել է Թանկյանը:

Թուրքիայի «Ժողովուրդների դեմոկրատական կուսակցության» (ԺԴԿ-HDP) կին պատգամավոր Սեբահաթ Թունջելըխորհրդարան է ներակայացրել աղմկահարույց մի օրինագիծ-առաջարկ: Թունջելն օրենսդիր մարմնին առաջարկում է ընդունելՀայոց ցեղասպանության համար երկրի նախագահ Ռեջեփ Էրդողանի` հայերից ներողություն խնդրելու մասին առաջարկը: Ընդ որում ներողությունը նա պետք է խնդրի պաշտոնապես ամբողջ Թուրքիայի Հանրապետության անունից:

Թանկյանը նաև պատմել է իր տատիկի և պապիկի պատմությունները, թե ինչպես են կարողացել վերապրել Ցեղասպանությունն ու անցնելով Դեր Զորով` հաստատվել Սիրիրայում: Նա նշում է, որ իր պապիկի կենդանության օրոք հասցրել են նկարահանել նրա պատմությունը, որը հետագայում օգտագործել են «Ճչացողները» ֆիլմում: Թանկյանը նաև նշել է, որ Հայաստանում SOAD-ին ոչ մեկի հետ չեն համեմատում. հավասարը չունեն, և հավելել, որ ոգևորությամբ է սպասում յուրաքանչյուր հաջորդ համերգին:

System of a Down (հաճախ կոչվում են "S.O.A.D" կամ "System") մետալ խումբ է, որը ստեղծվել է 1994 թ.-ին Լոս-Անջելեսում (Կալիֆորնիա, ԱՄՆ): Խումբը ներկայացնում են Սերժ Թանկյանը (վոկալ, ստեղնաշարային գործիքներ), Ջոն Դոլմայանը (հարվածային գործիքներ), Դարոն Մալաքյանը (Տարոն Մալախյան) (կիթառ, վոկալ) և Շավո Օդաջյանը (Շավարշ Օդաջյան) (բասս կիթառ): Նրանք ընտրեցին System Of A Down անվանումը, որը հիմնված էր Դարոն Մալակյանի գրած պոեմի վրա, որը նա կոչել էր Victims Of A Down: Շուտով նրանց երաժշտությամբ հետաքրքրվում է համաշխարհային ճանաչում ունեցող պրոդյուսեր Ռիք Ռուբինը։ Տեսնելով, որ տղաներին մեծ ապագա է սպասում, նա որոշում է աջակցել նրանց՝ պայմանագրեր կնքելու Ամերիկյան հայտնի ձայնագրման ստուդիաների հետ։ System Of A Down-ը ձայնագրում է իր երրորդ ալբոմը, որն էլ նրանց բերեց համաշխարհային ճանաչում։ Խումբը սկսեց համերգային շրջագայություններ ամբողջ աշխարհով մեկ՝ հանդիսատեսների բազմահազարանոց խմբի առջև։ Խմբի բոլոր անդամները հայեր են:

Խումբը բազմաթիվ մրցույթներում դարձել է մրցանակակիր, իսկ 2006 թվականին «System Of A Down»-ը ճանաչվեց լավագույն ռոք խումը: SOAD խումբը ձայնագրել է 5 ալբոմ և վաճառել է ամբողջ աշխարհով մեկ 20 միլիոն ձայնագրություն։ System of a Down-ը հայտնի է իր յուրահատուկ քաղաքական և հասարակական ոճային ուղղվածությամբ, նրանց երգերում միշտ շոշափվում են այնպիսի հարցեր ինչպիսիք են՝ իշխանությունների անտարբերությունն ու կաշառվածությունը, մարդկային ագահությունն ու չարությունը։ Հատկանշական է նաև System of a Down-ի մոտեցումըՀայոց ցեղասպանությանը, օրինակ՝ Spiders («Սարդեր») երգը նվիրված է հենց վերոհիշյալ թեմային։ 2005թ. System of A Down-ի անդամները, իրենց Mezmerize միջազգային շրջագայության ժամանակ, հանդես են գալիս ռեժիսոր Քարլա Կարապետյանի՝ Հայոց Մեծ Եղեռնի և դարաշրջանի այլ ցեղասպանությունների մասին պատմող Screamers ("Ճչացողներ") փաստավավերագրական ֆիլմում, որը սկսվում է Թանկյանի պապիկի՝ ջարդերից մազապուրծ եղած 96-ամյա Ստեփան Հայթայանի պատմությունից։Վերամիավորվել են 2011 թվականին:

Հղումներ թեմայով.

Rolling Stone: Genocide and Kim Kardashian: The Bloody History Behind System of a Down's Tour

Հայոց ցեղասպանություն

Հայոց ցեղասպանությունը, որն իրագործվել է Օսմանյան կայսրությունում 1915-1923թթ., XX դարի առաջին ցեղասպանությունն էր, որի նախաձեռնողները երիտթուրքերն էին: Ցեղասպանության ժամանակ ոչնչացվեց վեց հայկական վիլայեթների բնակչությունը` մոտ 1,5 մլն հայ: Եվս կես միլիոնը սփռվեց աշխարհով մեկ` սկիզբ դնելով հայկական Սփյուռքին:

Դեռևս Ցեղասպանության իրագործման տարիներին` 1915-23թթ. տերությունները ընդունեցին հայերի կոտորածը դատապարտող բանաձևեր: ԱՄՆ-ն երեք անգամ (1916, 1919, 1920) նմանատիպ բանաձևեր է ընդունել, սակայն դա չկասեցրեց Օսմանյան կայսրության գործողությունները: 1915թ. Ֆրանսիան, Մեծ Բրիտանիան և Ռուսաստանը հանդես եկան համատեղ հռչակագրով` դատապարտելով հայերի բնաջնջումը:

Աշխարհի շատ երկրներ և ազդեցիկ միջազգային կազմակերպություններ ճանաչել և դատապարտել են Հայոց ցեղասպանությունը: Պաշտոնապես առաջինը Հայոց ցեղասպանությունն ընդունել և դատապարտել է Ուրուգվայը 1965թ-ին: Հայոց ցեղասպանությունը ճանաչել են նաև Եվրոպայի Խորհուրդը, Եվրախորհրդարանը, ՄԱԿ-ի խտրականության կասեցման և փոքրամասնությունների պաշտպանության կանխարգելման ենթահանձնաժողովը, ՄԱԿ-ի ռազմական հանցագործությունների գծով հանձնաժողովը, Եկեղեցիների համաշխարհային խորհուրդը: Հայերի ոչնչացումը պաշտոնապես ցեղասպանություն են ճանաչել Ֆրանսիան, Ավստրիան, Իտալիան, Գերմանիան, Բելգիան, Լյուքսեմբուրգը, Շվեդիան, Նիդերլանդները, Շվեյցարիան, Ռուսաստանը, Լեհաստանը, Լիտվան, Հունաստանը, Սլովակիան, Կիպրոսի Հանրապետությունը, Լիբանանը, Ուրուգվայը, Արգենտինան, Վենեսուելան, Չիլին, Բոլիվիան, Կանադան, Վատիկանը, Բրազիլիան, Լյուքսեմբուրգը, Գերմանիան, Պարագվայը, Սիրիան և ԱՄՆ-ի 45 նահանգ:

Բելգիայում և Շվեդիայում Հայոց ցեղասպանության ժխտման համար քրեական պատասխանատվություն է սահմանված (45 հազար եվրո տուգանքից մինչև 1 տարվա ազատազրկում): 2006թ. հոկտեմբերի 12-ին Ֆրանսիայի խորհրդարանն օրինագիծ ընդունեց, որի համաձայն Հայոց ցեղասպանության ժխտումը կքրեականացվի, ինչպես Հոլոքոսթը:

Ժամանակակից Թուրքիան ժխտում է Հայոց ցեղասպանության պատմական փաստը և վարում է այդ փաստի ժխտման ներքին և արտաքին քաղաքականություն: Թուրքական պետության գործողությունները ներկայացվում են որպես «բռնագաղթ»` հայերի անվտանգությունն ապահովելու նպատակով: Հայոց ցեղասպանության ճանաչման անհրաժեշտության մասին խոսում են միայն առանձին թուրք մտավորականներ, որոնց թվում են պատմաբան Թաներ Աքչամն ու Նոբելյան մրցանակի դափնեկիր Օրհան Փամուկը: