Վաչե Գաբրիելյանը ԵՏՄ ինտեգրման, Բաքվին ռուսական զենք վաճառելու և Գյումրիի ողբերգության մասին31 մարտի 2015 - 11:46 AMT PanARMENIAN.Net - Մոսկվայի և Երևանի հարաբերությունները «շատ կառուցողական են»: Եվ թեև երկու երկրների միջև երբեմն առաջանում են խնդիրներ, դրանք բոլորը լուծվում են: Այդ մասին Lenta.ru-ին տված հարցազրույցում հայտարարել է ՀՀ փոխվարչապետ, միջազգային տնտեսական ինտեգրման և բարեփոխումների նախարար Վաչե Գաբրիելյանը: Մասնավորապես անդրադառնալով եվրասիական տնտեսական ինտեգրմանը, նա նշել է, որ այստեղ խնդիրներ են առաջանում Հայաստանի աշխարհագրական դիրքի պատճառով, որը բարդություններ է առաջացնում: «Մեզ հարկավոր են հաղորդակցության ուղիներ միության մյուս անդամների հետ: Կա Վերին Լարսի անցակետը, որն ապահովում է միակ ցամաքային կապը Ռուսաստանի հետ, սակայն մի շարք պատճառներով թողունակությունը շատ սահմանափակ է: Սակայն դա լուծելի խնդիր է: Թողունակությունը կարելի է խթանել՝ «կանաչ միջանցք» ապահովելով հայկական ապրանքների համար: Դրական որոշումն այս հարցի վերաբերյալ արդեն կայացված է: Բացի այդ, Վերին Լարսում մաքսակետ է բացվել ակցիզային ապրանքների համար: Դա կարևոր է, քանի որ Հայաստանից ՌԴ են արտահանվում գինիներ և կոնյակ»,-ասել է փոխվարչապետը: Վաչե Գաբրիելյանը նշել է, որ տնտեսական նպատակահարմարության տեսակետից ինտեգրումը ԵՏՄ-ին շատ օգտակար կարող է լինել Հայաստանի համար, խնդրահարույց է միայն լոգիստիկան: «Այժմ, երբ միությանն անդամակցումից արդեն 3 ամիս է անցել, որոշ դժվարություններ դեռ առկա են, ամեն ինչ չի հալած յուղի նման գնում: Հաճախ դրանք տեխնիկական խնդիրներն են. ինչ-որ թուղթ ժամանակին տեղ չի հասել և այլն: Սակայն այդ ամենը լուծելի է: Կարևորն այն է, որ Հայաստանի համար շահավետ է առևտուր անել Ռուսաստանի հետ և լինել այդ ինտեգրման միության անդամ: Պետք է հասկանալ նաև, որ խոսքը դեռևս ներուժի մասին է, որը դեռ պետք է կյանքի կոչել: Ես այդպես էլ ասում եմ մեր գործարարներին՝ կա հնարավորություն, երաշխիք չկա: Գործելու ենք մրցակցության պայմաններում, սա բարեգործություն չէ»: Վաչե Գաբրիելյանն անդրադարձել է նաև ռուսական զենքի վաճառքին Ադրբեջանին՝ նշելով, որ դա շատ լուրջ հարց է Երևանի համար: «Զենքը, որը Ռուսաստանը վաճառում է Ադրբեջանին, կարող է օգտագործվել մեր դեմ: Հասկանալի է, որ Բաքուն միևնույն է զենք կգներ եթե ոչ Ռուսաստանից, ապա մեկ ուրիշից: Մյուս կողմից՝ եթե Մոսկվան խորհրդակցեր մեզ հետ թե ինչ զենք վաճառի Ադրբեջանին, իսկ ինչը՝ ոչ, հայ հանրությունը շատ ավելի հանգիստ կվերաբերվեր այդ հարցին: Իսկ այսպես ժողովուրդը հարցնում է. ո՞վ է մեր դաշնակիցը: Այդ հարցը տալիս են և պետական գործիչները, և հասարակ մարդիկ: Շատ կան հրապարակումներ այդ թեմայով մամուլում: Եվ երբ մեր քաղաքական գործիչները հանդիպում են քաղաքացիների հետ, այն հարցը, թե ինչու է Ռուսաստանը զենք վաճառում ադրբեջանցիներին, հաճախ է տրվում: Այնպես որ նորց կրկնեմ՝ խորհրդակցություններն այս հարցի շուրջ շատ օգտակար կարող են լինել և կօգնեին մեղմացնել հարցի սրությունը»: Անդրադառնալով հայ-ռուսական հարաբերությունների ևս մեկ ցավոտ դրվագի՝ Գյումրիում Ավետիսյանների ընտանիքի սպանությանը, Վաչե Գաբրիելյանն ասել է. «Ինչ վերաբերում է նրան, թե որքանով Գյումրիում տեղի ունեցած սպանությունը ազդեց հայ-ռուսական հարաբերությունների վրա, կարող եմ ձեզ հավաստիացնել, որ ոչ ոք չի նույնականացնում հանցագործին Ռուսաստանի հետ: Ռուսներին Հայաստանում շատ լավ են վերաբերվում: Խնդիրն այլ է: Սա առաջին միջադեպը չէ կապված ռուս զինծառայողների հետ Գյումրիում, թեև մյուսներն այսքան դաժան ու աղմկահարույց չէին: Քանի որ նման դեպքերը կրկնվում են, մարդկանց մոտ հարց է առաջնում. իսկ արդյո՞ք ամեն ինչ կարգին է այդ ռազմակայանում: Գյումրիում սպանությունից հետո հակառուսական տրամադրությունները չավելացան, սակայն ավելի հաճախ են հնչում հարցեր ռազմակայանի իրավական կարգավիճակի, կանոնակարգող օրենքների, իրավասության մասին: Կարծում եմ, որ շարքային Պերմյակովի դատը ճիշտ կլինի Հայաստանում անցկացնել և բաց դատավարությամբ: Դա սովորական հանցագործություն չէ, շատ է անհասկանալին, ոչ ռացիոնալը: Հանրությունը պետք է իմանա կատարվածի բոլոր մանրամասները, որպեսզի շշուկներ ու ասեկոսեներ չտարածվեն, խոսակցություններ չգնան դավադրության մասին: Այս տեսակետից ճիշտ որոշում կլինի դատը Հայաստանում անցկացնելը»: Հայաստանը ԵՏՄ-ին անդամակցելու համաձայնագիրը կնքեց հոկտեմբերի 10-ին և ԵՏՄ լիիրավ անդամ դարձավ 2015-ի հունվարի 2-ին: Անդամակցության պայմանագրով նախատեսվում է 1-8 տարի Հայաստանի և ԵՏՄ մաքսային տոկոսադրույքների ներդաշնակեցման համար, 12-60 ամիս՝ Մաքսային միության տեխնիկական կանոնակարգերի ընդունման, 3 տարի՝ մտավոր սեփականության օբեյկտների իրավունքների պահպանության ու պաշտպանության հարցերի կարգավորման համար: Անցումային շրջանում ԵՏՄ-ն իրավունք ունի որոշելու Հայաստանի տարածք իր ապրանքների ներմուծման հատուկ կարգը: Պայմանագրով նախատեսվում են նաև ապրանքների տեղափոխման առանձնահատկությունները օտար պետությունների տարածքով: Հայաստանը կստանա ԵՏՄ մաքսային մուտքերի 1,13 տոկոսը: ԵՏՄ կենտրոնակայանը լինելու է Մոսկվայում, ֆինանսական կանոնակարգողը՝ Ալմաթիում, իսկ ԵՏՄ դատարանը՝ Մինսկում: Բելառուսը նաև իրավունք է ստացել նախագահելու միությունում 2015 թ.: Ընթացիկ տարում միությանը կարող է միանալ նաև Ղրղզստանը: Հղումներ թեմայով. Ուշագրավ Նա նաև ասել է, որ տարածաշրջանային անվտանգությունը պետք է ապահովեն տարածաշրջանի երկրները
Նա հավելել է, որ թուրքական կողմն ավարտել է Նախիջևանի և Կարսի միջև 224 կմ երկարությամբ երկաթուղային գծի կառուցումը Փետրվարի 1-ին Միջազգային քրեական դատարանը իրավասություն է ստանալու հետաքննել Ալիևի գործողությունները Նա նշել է, որ դիտարկում է հայկական բանակին «ոչ մահաբեր ձևաչափով» աջակցություն ցուցաբերելու հնարավորությունը, բայց կոնկրետ որոշումներ չկան Ամենաընթերցվողը բաժնում | Լոնդոնի հետ քննարկվել են Երևանի նոր գլխավոր հատակագծի մշակման հարցեր Քննարկումն ընթացել է Լոնդոնի քաղաքային պլանավորման OUTCOMIST ընկերության հիմնադիր-տնօրեն Քրիս Չոայի հետ Նախարար․ Աշակերտների թիվը դասարաններում կկրճատվի Միջին դպրոցում աշակերտների թիվն առավելագույնը կլինի 25, իսկ ավագ դպրոցում՝ 20 Եվրախորհրդի անվտանգության հարցերով կոմիտեի անդամները կայցելեն ՀՀ Նրանք կլինեն նաև Ադրբեջանում և Վրաստանում Սոլովյովի հեղինակային հաղորդումների հեռարձակումը ՀՀ–ում արգելափակվել է Այդ մասին հայտնել է ԲՏԱ փոխնախարարը |