Նալբանդյանն ու Լավրովը քննարկել են Արցախի հիմնախնդիրը

PanARMENIAN.Net - ՀՀ արտգործնախարար Էդվարդ Նալբանդյանը և ՌԴ ԱԳ նախարար Սերգեյ Լավրովը հուլիսի 17-ին քննարկել են ղարաբաղյան հակամարտության կարգավորման հարցը:

Զրուցակիցները մտքեր են փոխանակել երկկողմ և միջազգային որոշ թեմաների շուրջ, անդրադարձել Լեռնային Ղարաբաղի հակամարտության կարգավորմանը, ասվում է ՌԴ ԱԳՆ-ի կայքի հաղորդագրությունում:

Նույն օրը Լավրովը Մոսկվայում ԼՂՀ հիմնախնդիրը քննարկել է նաև Ադրբեջանի ԱԳ նախարար Էլմար Մամեդյարովի հետ։ Նա ասել է, որ ժամանակն է ինտենսիվացնել ղարաբաղյան հակամարտության կարգավորման շուրջ բանակցությունները:

«Հիմքեր կան կարծելու, որ ժամանակն է ինտենսիֆիկացնել մեր ջանքերը», - ասել է Լավրովը: Ինչպես հայտարարել է ՌԴ արտգործնախարարը, հաշվի առնելով արդյունքի հասնելու ընդհանուր տրամադրվածությունը, «կարող են ապահովել այդ առաջընթացը»:

Մամեդյարովն իր հերթին նշել է, որ Իրանի միջուկային ծրագրի շուրջ տևական բանակցությունների հաջող ավարտը հույս է ներշնչում, որ ղարաբաղյան խնդիրը ևս կարող է հանգուցալուծվել: «Կարգավորումը մոտալուտ բեկման ուղու վրա է», - ասել է նա:

Մինչդեռ Միացյալ Նահանգների պետքարտուղարի Եվրոպայի ու Եվրասիայի հարցերով օգնականի տեղակալ Էրիկ Ռուբինը հուլիսի 16-ին հայտարարել էր, որ չկա և երբեք չի լինի Լեռնային Ղարաբաղի հարցի ռազմական լուծում:

Պետքարտուղարության ներկայացուցիչն ընդգծել էր, որ ժամանակն է, որ կողմերը վերահաստատեն առաջընթացի հասնելու իրենց պատրաստակամությունն ու նվիրվածությունը, չմանրամասնելով՝ արդյոք դա պետք է արվի կողմերի հայտարարությունների՞, թե՞ նախագահների հերթական հանդիպման ձևով:

Վերջերս Օրերս Մինսկի խմբի ամերիկացի համանախագահ Ջեյմս Ուորլիքը հայտարարել էր, որ ազատագրված տարածքները պետք է վերադարձվեն Ադրբեջանին և խաղաղապահներ տեղակայվեն: Ուորլիքը, փաստորեն, մասնակիորեն հրապարակել է հակամարտության կարգավորման կետերից մի քանիսը, որոնց նա անդրադարձել էր դեռ 2014-ին «Քարնեգի» հիմնադրամում ելույթի ժամանակ: Վերոնշյալից բացի, ենթադրվում է նաև ժամանակավոր կարգավիճակ Լեռնային Ղարաբաղի համար, հետագա կարգավիճակի որոշում ժողովրդի կամարտահայտման միջոցով, միջանցքի պահպանում Հայաստանի և Լեռնային Ղարաբաղի միջև, փախստականների վերադարձ: ՀՀ ԱԳՆ-ն, մեկնաբանելով Ուորլիքի հայտարարությունը, հայտարարել է, որ ընդհանուր առմամբ այն արտացոլում է համանախագահների առաջարկները կարգավորման վերաբերյալ:

Լեռնային Ղարաբաղի նախագահի մամուլի խոսնակ Դավիթ Բաբայանը, մեկնաբանելով ԵԱՀԿ Մինսկի խմբի ամերիկացի նախագահ Ջեյմս Ուորլիքի հայտարարությունն, ասել էր, որ պաշտոնական Ստեփանակերտի դիրքորոշումը Լեռնային Ղարաբաղի հակամարտության լուծման հարցում մնացել է անփոփոխ՝ կարևորագույն առանցքային ուղղությունն այն է, որ վերացվեն հակամարտության պատճառները և ոչ թե հետևանքները: