Պերմյակովի դասալքության մասին գործը փոխանցվել է կայազորային դատարան

PanARMENIAN.Net - Ռուսաստանի 5-րդ կայազորային զինդատարանը, որը տեղակայված է Հայաստանում, ստացել է 102-րդ ռուսական ռազմակայանի զինծառայող Վալերի Պերմյակովի դասալքության մասին գործը: Նա մեղադրվում է Գյումրիում Ավետիսյանների ընտանիքի սպանության մեջ:

«Ինչպես պարզել է նախաքննությունը, 2015-ի հունվարի 12-ին Պերմյակովը, լինելով ծառայության մեջ, ինքնակամ լքել է ծառայության վայրը զենքով և զինամթերքով` զինվորական ծառայությունից խուսափելու նպատակով»,-ասվում է դատարանի հաղորդագրության մեջ:

Հունվարի 12-ին Գյումրիում հայտնաբերվեցին Ավետիսյանների ընտանիքի 6 անդամի դիերը: Ընտանիքի մյուս երեխան՝ 6-ամսական Սերյոժա Ավետիսյանը, ծանր մարմնական վնասվածքներով տեղափոխվեց հիվանդանոց, որտեղ վիրահատվեց։ Չնայած բժիշկների ջանքերին, երեխային փրկել չհաջողվեց, փոքրիկը մահացավ հունվարի 19-ին: Հայ-թուրքական սահմանը հատելու փորձի ժամանակ հայտնաբերված կասկածյալ Վալերի Պերմյակովին մեղադրանք առաջադրվեց, նա ընդունեց իր կատարած հանցանքը: Նրան տեղափոխեցին ռուսական ռազմակայան, ինչը բողոքի մեծ ալիք բարձրացրեց:

Նախնական տեղեկություններով՝ Ավետիսյանների ընտանիքի 7 անդամի սպանությունը տեղի է ունեցել ժամը 03։05-ի սահմաններում, մահվան պատճառ են դարձել հրազենից արձակված կրակոցները:

ՀՀ նախագահ Սերժ Սարգսյանը հունիսի 26-ին ՀՀ և ՌԴ միջև տնտեսական գործակցության միջկառավարական հանձնաժողովի ռուսական կողմի նախագահ, ՌԴ տրանսպորտի նախարար Մաքսիմ Սոկոլովի գլխավորած պատվիրակության հետ հանդիպմանն անդրադարձել է Գյումրիում Ավետիսյանների ընտանիքի սպանությանը։ Նա նշել է, որ սպանության մասով գործը Հայաստանի քննչական կոմիտեի վարույթ հանձնելու որոշումը և Հայաստանի համապատասխան ատյանի կողմից հետագա դատաքննությունը, անկասկած, արտացոլում է գործընկերության և եղբայրության ոգին և լիովին համապատասխանում է Հայաստանում տեղակայված ռուսական ռազմաբազայի կարգավիճակի մասին հայ-ռուսական համաձայնագրի դրույթներին: