Դինքի սպանության գործով թուրք նախկին պաշտոնյաներ են ձերբակալվել

Դինքի սպանության գործով թուրք նախկին պաշտոնյաներ են ձերբակալվել

PanARMENIAN.Net - Լրագրող, «Ակօս» շաբաթաթերթի հիմնադիր ու խմբագիր Հրանտ Դինքի սպանության առթիվ հարուցված քրեական գործի շրջանակում նոր հանագամանքներ և փաստաթղթեր են ի հայտ եկել:

Ստամբուլի ահաբեկչության և կազմակերպված հանցագործության դեմ պայքարի վարչության դատախազ Գյոքալփ Քյոքչուն նոր գործընթաց է սկսել, որի շրջանակում 9 պետական նախկին պաշտոնյայի ձերբակալման որոշում է կայացվել, «Ակոս»-ին հղումով գրում է Ermeniahaber.am-ը:

Նրանց նկատմամբ նախատեսվում է առաջադրել «ծրագրված սպանությանը նպաստելու», «պետական փաստաթղթերի կեղծարարության», «պետական փաստաթղթերի ոչնչացման և թաքցնելու» և «պաշտոնեական դիրքի չարաշահման» մեղադրանքներ:

Նրանք են՝ Թուրքիայի անվտանգության գլխավոր վարչության նախկին պաշտոնյաներ Ջոշքուն Չաքարը, Ահմեթ Իլհան Գյուլերը, Ֆարուք Սարըն, Բյուլենթ Դեմիրելը, Օսման Գյուլբելը, Յըլմազ Անգըն, Յունուս Յազարը և ոստիկանության աշխատակիցներ Մեհմեթ Այհանն ու Օնուր Քարաքայան: Համապատասխան հրահանգ ստացած Ստամբուլի ահաբեկչության դեմ պայքարի վարչության աշխատակիցները սկսել են ձերբակալությունները:

Հայտնի է դարձել, որ ձերբակալվածներից որոշներն ավելի վաղ Դինքի դատավարության շրջանակում հարցաքննվել էին որպես վկա, իսկ նոր փաստերի ի հայտ գալուց հետո նրանց ձերբակալման որոշում է կայացվել:

Ավելի վաղ այս գործի շրջանակում ձերբակալվել և բանտարկվել էին Ռամազան Աքյուրեքը, Ալի Ֆուաթ Յըլմազերը, Մուհիթթին Զենիթը, Էրջան Դեմիրը, Օզքան Մումջուն և Ֆարուք Սարըն:

Սեպտեմբերի 15-ին Տրապիզոնի հետախուզության բաժնի ղեկավար աշխատած Էնգին Դինչը դեպքից 9 տարի անց առաջին անգամ որպես կասկածյալ ցուցմունք է տվել։ Դինչն իր ցուցմունքում նշել է, թե տեղյակ են եղել, որ Յասին Հայալը Դինքի դեմ գործողություն է նախապատրաստում, և տեղեկանալու հենց նույն օրն էլ տեղեկությունն ուղարկել են Ստամբուլի հետախուզությանը։

Նա նշել է, որ Ստամբուլում պատկան մարմիններին զգուշացրել է՝ ինչպես հեռախոսով, այնպես էլ գրավոր տարբերակով:

2015-ի սկզբին Հրանտ Դինքի սպանության գործով ոստիկաններ էին ձերբակալվել: Հենց նրանք էլ ցուցմուքն էին տվել իրենց նախկին ղեկավար Էնգին Դինչի դեմ։ Հրանտ Դինքի սպանության մասին նախապես տեղյակ եղած և այն չկանխած թուրք պաշտոնյաների գործի շրջանակում ձերբակալված ոստիկան Մուհիթթին Զենիթը մեղադրել է իր հրամանատարներին՝ իրեն սպանության կազմակերպիչների հետ զրույցի դրդելու համար։ Հունիսին Ստամբուլի գլխավոր դատախազությունը ոստիկանության հետախուզական մարմինների հետ համատեղ զեկույց է պատրաստել, որտեղ նշվում է, թե Դինքի սպանության հետ կապ ունի «Զուգահեռ կառույցը», որը Թուրքիայում նույնականացվում է իսլամի հայտնի քարոզիչ, ամերիկաբնակ թուրք միլիարդատեր Ֆեթուլլահ Գյուլի ստեղծած շարժման հետ:

Զեկույցի մեջ առանցքային տեղ է զբաղեցնում Ստամբուլի ոստիկանության հետախուզության վարչության նախկին պետ Ալի Ֆուաթ Յըլմազերը, որը վերջերս Դինքի սպանության գործով ձերբակալվել էր: Զեկույցի մեջ մանրամասն ներկայացվում է սպանության նախապատրաստման ընթացքը: Ըստ այդմ` Դինքի սպանությունից 6 տարի առաջ Յըլմազերը հիմնել է «C-5» գաղտնի բյուրո, որը վարել է «զուգահեռ կառույցի» գործերը: Նշվում է, որ այդ խումբը Ergenekon-ի, Balyoz-ի և պետական հեղաշրջմանը միտված նմանատիպ այլ օպերացիաների համար հիմք է նախապատրաստել: «C-5»-ը ծրագրել էր Դինքի սպանությունունից հետո անցնել Ergenekon-ի գործողությունների պատրաստման հաջորդ փուլին, քանի որ բոլորը զբաղված կլինեն նրա սպանությամբ: Յըլմազերը մեղադրվում է « C-5» գաղտնի կառույցը ղեկավարելու մեջ: Նշվում է, որ «Ակոսի» խմբագրապետի սպանությունը հենց այդ կառույցում է ծրագրվել:

2007-ի հունվարի 19-ին Դինքը սպանվեց «Ակոս»-ի խմբագրատան դիմաց: Բոլոր մեղավորները դեռ դատապարտված չեն: Գործի նոր մանրամասներ են բացահայտվում: Այժմ նրա սպանության գործը դարձյալ քննում է Ստամբուլի գլխավոր դատախազության Ահաբեկչության և կազմակերպված հանցավորության բաժնի դատախազ Յուսուֆ Դողանը, որը գործի շրջանակում նոր դեմքերի է հարցաքննում: Կասկածյալ Օգյուն Սամասթը ձերբակալվեց 32 ժամ անց: 2012 թվականի հունվարի 17-ին դատարանը մեղավոր ճանաչեց 19 մարդու «ահաբեկչական կազմակերպության անդամներ» մեղադրանքով: Յասին Հայալը ցմահ բանտարկության դատապարտվեց, անմիջական հանցագործ Օգյուն Սամասթը՝ 23 տարվա ազատազրկման: Մեղադրյալներն անցնում էին Թուրքիայի ՔՕ 220 հոդվածով՝ սպանության կազմակերպում ու իրագործում: 2014 թ. մարտին ոստիկանության հետախուզության նախկին պետը մեղադրվեց Հրանտ Դինքի գործով թերանալու մեջ ու հեռացվեց հետաքննությունից, թեև սկզբում վարչական դատարանը մերժեց քննությունից նրան հեռացնելու պահանջը: Դատական տեսուչներն իբր պարզել էին, որ ոչնչացված տեղեկատվությունը կարող է կապված լինել այն շրջանի հետ, երբ Դինքը սպանվեց սպառնալիքներ ստանալուց հետո:

Սեպտեմբերի 17-ին Ստամբուլում վերսկսվեց Հրանտ Դինքի սպանության նախապատրաստման մեղադրանքով կասկածյալ Էրհան Թունջելի դատը: Դատարանը ձերբակալության թույլտվություն տվեց, սակայն Թունջելին ազատ արձակվեց Դինքի սպանության գործով առաջին իսկ որոշումից հետո:

 Ուշագրավ
Նա նաև ասել է, որ տարածաշրջանային անվտանգությունը պետք է ապահովեն տարածաշրջանի երկրները
Նա հավելել է, որ թուրքական կողմն ավարտել է Նախիջևանի և Կարսի միջև 224 կմ երկարությամբ երկաթուղային գծի կառուցումը
Փետրվարի 1-ին Միջազգային քրեական դատարանը իրավասություն է ստանալու հետաքննել Ալիևի գործողությունները
Նա նշել է, որ դիտարկում է հայկական բանակին «ոչ մահաբեր ձևաչափով» աջակցություն ցուցաբերելու հնարավորությունը, բայց կոնկրետ որոշումներ չկան
---