Հռոմի պապը շնորհավորել է Արգենտինայի հայոց թեմի առաջնորդին հոգևոր ծառայության 25-ամյակի կապակցությամբ

29 մարտի 2016 - 16:45 AMT

PanARMENIAN.Net - Հռոմի պապ Ֆրանցիսկոսը շնորհավորել է ՀԱԵ Արգենտինայի և Չիլիի թեմի առաջնորդ արքեպիսկոպոս Գիսակ Մուրադյանին` հոգևոր ծառայության 25-ամյակի կապակցությամբ:

Ինչպես հայտնում է Prensa Armenia-ն, ծառայության 25-ամյակին նվիրված տոնակատարությունը տեղի է ունեցել մարտի 22-ին Բուենոս Այրեսում: Տոնակատարությանը մասնակցել են երկրի պետական մարմինների, հայկական այլ եկեղեցիների, Արգենտինայում ՀՀ դեսպանատան ներկայացուցիչներ և հայ համայնքի անդամներ: Վաղեմի բարեկամին հասցեագրված Հռոմի պապի շնորհավորական ուղերձում ասվում է.

«Թանկագին եղբայր, մարտի 22-ին հայ համայնքը նշում է Ձեր առաջնորդության 25-ամյակը: Ես ևս միանում եմ այդ տոնին և երախտիքի աղոթք եմ հղում: Թող Աստված հատուցի բոլոր բարիքների համար, որ գործել եք և շարունակում եք գործել: Շնորհակալ եմ Աստծուն Ձեր ծառայության համար և աղոթում եմ, որ այն միշտ արգասաբեր լինի: Եվ խնդրում եմ, որ Դուք էլ հիշեք ինձ Ձեր աղոթքներում: Փոխանցեք խնդրեմ իմ շնորհավորանքները հայ համայնքի անդամներին»:

Գիսակ Մուրադյանը ժամանել է Բուենոս Այրես 1975 թ.` որպես հոգևոր հովիվ ծառայության անցնելով Սբ Գրիգոր Լուսավորչի տաճարում: 1982-87թթ. նա սովորել է Բուենոս Այրեսի Քեննեդիի համալսարանում և ստացել է հանրության հետ կապերի և լրագրության մասնագետի դիպլոմ: 1990 թ. հոկտեմբերի 7-ին էջմիածնում Գիսակ Մուրադյանը ձեռնադրվել է որպես ՀԱԵ Արգենտինայի և Չիլիի թեմի առաջնորդ: 1996թ. Ամենայն Հայոց կաթողիկոս Գարեգին Երկրորդը նրան արքեպիսկոպոսի տիտղոս շնորհեց: 1998-2002 թթ. նա Արգենտինայի քրիստոնեական եկեղեցիների կոմիտեի նախագահն է, իսկ 2004թ. դեկտեմբերին վերընտրվել է այդ պաշտոնում:

Photo: Asbarez

Հղումներ թեմայով.

Asbarez.com: Pope Praises Argentina’s Armenian Church Leader for 25 Years of Service