Ստեփանակերտի ԲԿ-ում 5 վիրավոր է բուժվում. Երեխաների մոտ դրական դինամիկա կա

Ստեփանակերտի ԲԿ-ում 5 վիրավոր է բուժվում. Երեխաների մոտ դրական դինամիկա կա

PanARMENIAN.Net - Ստեփանակերտի Հանրապետական բժշկական կենտրոնում այս պահին բուժում է ստանում 5 վիրավոր: ԼՂՀ առողջապահության նախարարությունից հայտնել են, որ վիրավորներից Զավեն Ավանեսյանը, Կամո Աբրահամյանը, Ծովինար Աղաջանյանը գտնվում են վերակենդանացման բաժանմունքում, նրանց վիճակը` կայուն ծանր է, դրական դինամիկայով:

Գարեգին Աղաջանյանը բուժումը շարունակում է վիրաբուժական բաժանմունքում, վիճակը` կայուն: Ըստ նախարարության՝ այսօր առավոտյան Հանրապետական բժշկական կենտրոն է ընդունվել 1973-ին ծնված Արթուր Արզանգուլյանը` վերին ձախ վերջույթի բազմաբեկորային կույր վնասվածքով, ձախակողմյան տրավմատիկ հեմոպնևմոթորաքսով, գրում է Panorama.am-ը:

Ինչ վերաբերում է հթիռակոծության հետևանքով վիրավորած երեխաներին, ապա նրանց վիճակը կայուն ծանր է, Գևորգի Գրիգորյանն ընդհանուր անզգայացմամբ վիրակապվել է, երկրորդային մշակման է ենթարկվել վերքը, շարունակվում է ինտենսիվ բուժումը, դրական դինամիկա կա: Առողջապահության նախարարության աջակցությամբ Վարդան Անդրեասյանը կվիրահատվի, կտեղադրվի արտաքին ֆիքսացիայի ապարատը: Անդրեասյանի մոտ ևս դրական դինամիկա է արձանագրվել:

ԼՂՀ առողջապահության նախարարությունը տեղեկացնում է, որ հանրապետության բոլոր բժշկական հաստատություններն ապահովված են անհրաժեշտ դեղերով, բժշկական պարագաներով, արյան բավարար պաշարով: Արտակարգ ռեժիմով են աշխատում բժշկական հաստատությունները և շտապօգնության ծառայությունը:

Արցախ է բերվել «Էրեբունի» ԲԿ շտապօգնության 2 մեքենա` ռեանիմոբիլ, որոնք հագեցած են անհրաժեշտ սարքավորումներով` վիրավորներին տեղում բժշկական օգնություն ցուցաբերելու, արագ և անվտանգ Երևան տեղափոխելու համար:

ՀՀ առողջապահության նախարարության կողմից ուղարկվել են դեղամիջոցներև բժշկական պարագաներ, պոլսօքսիմետրեր, որոնք կտրամադրվեն նաև զիվորական հոսպիտալին:

Արցախում ադրբեջանական զինուժի ձեռնարկած ռազմական գործողությունների հետևանքով վիրավորված զինծառայողներից 12-ը գտնվում են Երևանի կենտրոնական զինվորական հոսպիտալում:

Հոսպիտալի պետ Արամ Ասատուրյանը հայտնել է, որ 12 զինծառայողից 11-ի առողջական վիճակը գնահատվում է կայուն, իսկ մեկ զինծառայողի՝ Հայկ Թորոսյանի վիճակը՝ ծայրահեղ ծանր: Նրա խոսքերով՝ ժամկետային զինծառայող 19-ամյա Հայկ Թորոսյանը ստացել է հրազենային գանգուղեղային վնասվածք, զինվորը միացված է արհեստական շնչառական ապարատին:

«Բոլորը վիրավորներին վիրահատել ենք: Երկու զինվոր գտնվում են վնասվածքաբանության բաժանմունքում, նրանց վիճակը միջին ծանրության է: Նրանք ունեն վերջույթների բեկորային վնասվածք»,- ասել է հոսպիտալի ղեկավարը՝ հավելելով, որ վերակենդանացման բաժանմունքում էլ գտնվում է երեք զինվոր:

Ապրիլի լույս 2-ի գիշերից ղարաբաղա-ադրբեջանական շփման գծում շարունակվող մարտերում ՊԲ ստորաբաժանումները, ըստ ԼՂՀ ՊՆ տվյալների, ոչնչացրել են հայկական դիրքերի ուղղությամբ գրոհող թշնամական 2 ուղղաթիռ, ինչպես նաև 6 անօդաչու թռչող սարք (ԱԹՍ), 20 տանկ ու 5 զրահամեքենա: Ադրբեջանն ընդունել է 15 զինծառայողի զոհվելու, ինչպես նաև 1 տանկի ու 1 ուղղաթիռի ոչնչացման փաստը և չի հայտնել ոչ մի վիրավորի մասին՝ այն դեպքում, երբ միայն հայկական կողմի հրապարակած ֆոտո- և տեսանյութերում մի քանի տասնյակ դիակներ կան, 1 ուղղաթիռ և 6 ԱԹՍ:

Հայկական կողմից զոհվել է 18 զինծառայող, մոտ 37-ը վիրավոր է: Հայկական կողմը նաև կորցրել է մեկ տանկ: Բացի առաջնագծում ընթացող մարտերից, հակառակորդը հրթիռահրետանային հարվածներ է հասցրել խաղաղ բնակավայրերին: Մարտունիում դպրոցի հրետակոծման հետևանքով զոհվել է 12-ամյա երեխա, 3 տարեց մարդ դաժանաբար սպանվել Թալիշ գյուղում: Եվս 6 քացաքացիական, որոնցից երկուսը երեխա էին, վիրավորվել են:

 Ուշագրավ
Նա նաև ասել է, որ տարածաշրջանային անվտանգությունը պետք է ապահովեն տարածաշրջանի երկրները
Նա հավելել է, որ թուրքական կողմն ավարտել է Նախիջևանի և Կարսի միջև 224 կմ երկարությամբ երկաթուղային գծի կառուցումը
Փետրվարի 1-ին Միջազգային քրեական դատարանը իրավասություն է ստանալու հետաքննել Ալիևի գործողությունները
Նա նշել է, որ դիտարկում է հայկական բանակին «ոչ մահաբեր ձևաչափով» աջակցություն ցուցաբերելու հնարավորությունը, բայց կոնկրետ որոշումներ չկան
---