Bellingcat. Զգուշավոր գնահատականներով, Ադրբեջանը կորցրել է 400 զինծառայող

Bellingcat. Զգուշավոր գնահատականներով, Ադրբեջանը կորցրել է 400 զինծառայող

PanARMENIAN.Net - Bellingcat միջազգային հետազոտական խումբը հրապարակել է վերլուծություն՝ ապրիլի լույս 2-ից 4-ը Լեռնային Ղարաբաղի Պաշտպանության բանակի ու Ադրբեջանի զինուժի ստորաբաժանումների միջև ռազմական բախումների վերաբերյալ:

Bellingcat-ը բրիտանացի Էլիոթ Հիգինսի ստեղծած նախագիծն է, որը ուսումնասիրում է ռազմական բախումները ու կապակցված թեմատիկ ոլորտները բաց աղբյուրներով՝ սոցցանցերից, յութուբյան տեսանյութերից, քարտեզներից ու արբանյակային լուսանկարներից ստացված տեղեկությունը վերլուծելով: Առավել աղմկահարույց հետաքննությունները վերաբերվում են Սիրիայում քիմիական զենքի կիրառմանը, Իրաքում, Սիրիայում և Ուկրաինայում ընթացող պատերազմներին, ինչպես նաև Ուկրաինայի արևելքում հակամարտության ժամանակ ռուսական զորքերի մասնակցությանն ու մալազիական «Բոինգի» խոցմանը:

Հոդվածում վերլուծվում է Թալիշի, Մատաղիսի, Մարտակերտի և հարավային ուղղությամբ գրոհները, կողմերի նպատակները, ուղղաթիռների և դրոնների կիրառումը, բարձունքի գրավումն ադրբեջանցիների կողմից, տանկերի ու հրետանու գործողությունները, հայերի հակագրոհները, Թալիշի մերձակայքում ադրբեջանցի հատուկջոկատայինների ջախջախումն ու առհասարակ ռազմական բախումների ամենակարևոր դրվագներն՝ ընդուպ մինչև հաքերային գործողություններ ու տեղեկատվական պատերազմ: Անդրադառնալով կորուստների խնդրին, վերլուծականը նշում է, որ դրանք սպասվածից ավելին էին՝ հատկապես Ադրբեջանի դեպքում, նամանավանդ հաշվի առնելով, որ Բաքուն իր առաջ դրված խնդիրները կատարեց միայն մասամբ: Պաշտպանվող կողմը սովորաբար հարձակվողի 1/3-ի չափով կորուստներ է ունենում, սակայն հայտնի է, որ Արցախի բանակի գործողությունները ծանր կորուստների են հանգեցրել Ադրբեջանի հատուկջոկատայինների շրջանում: Օգտագործելով զոհերի տարբեր գնահատականներ, Bellingcat-ը եզրակացնում է, որ զոհվել է առնվազն 400 ադրբեջանցի զինծառայող:

«Հանդիպում են նաև 1000-ներով զոհերի գնահատականներ, սակայն Bellingcat-ի զգուշավոր գնահատականով զոհվել է 400-500 ադրբեջանցի զինվոր», - նշվում է վերլուծականում:

Ապրիլի լույս 2-ի գիշերից ապրիլի 5-ը ղարաբաղա-ադրբեջանական շփման գծում շարունակվող մարտերում ՊԲ ստորաբաժանումները, ըստ ԼՂՀ ՊՆ տվյալների, ոչնչացրել են հայկական դիրքերի ուղղությամբ գրոհող թշնամական 2 ուղղաթիռ, ինչպես նաև 26 տանկ, 4 ՀՄՄ, 1 «Գրադ», ինժեներական 1 մեքենա և 14 ԱԹՍ: Ադրբեջանն ընդունել է 31 զինծառայողի զոհվելու, ինչպես նաև 1 տանկի ու 1 ուղղաթիռի ոչնչացման փաստը և չի հայտնել ոչ մի վիրավորի մասին՝ այն դեպքում, երբ միայն հայկական կողմի հրապարակած ֆոտո- և տեսանյութերում առկա են մի քանի տասնյակ դիակներ, 1 ուղղաթիռ և 3 ԱԹՍ: Ադրբեջանական ընդդիմադիր ԶԼՄ-ները, սակայն, հրապարակել են 93 հոգու զոհվելու, 33 վիրավորի, ևս 6 անհետ կորածի փաստը հաստատող տեղեկություններ: Ստեփանակերտի գնահատականով, Ադրբեջանի ընդհանուր կորուստները գերազանցում են 300-ը:

Հայկական կողմն ունի 75 զոհ, 122 զինծառայող վիրավորվել է:

 Ուշագրավ
Նա նաև ասել է, որ տարածաշրջանային անվտանգությունը պետք է ապահովեն տարածաշրջանի երկրները
Նա հավելել է, որ թուրքական կողմն ավարտել է Նախիջևանի և Կարսի միջև 224 կմ երկարությամբ երկաթուղային գծի կառուցումը
Փետրվարի 1-ին Միջազգային քրեական դատարանը իրավասություն է ստանալու հետաքննել Ալիևի գործողությունները
Նա նշել է, որ դիտարկում է հայկական բանակին «ոչ մահաբեր ձևաչափով» աջակցություն ցուցաբերելու հնարավորությունը, բայց կոնկրետ որոշումներ չկան
---