Եվրախորհրդարանի պատգամավոր. ԼՂ հանրաքվեն համապատասխանում էր Արևմտյան Եվրոպայի չափանիշներին

PanARMENIAN.Net - Փետրվարի 20-ին Արցախում տեղի ունեցած հանրաքվեն համապատասխանում էր Արևմտյան Եվրոպայի չափանիշներին: Այս մասին Ստեփանակերտում հայտարարել է Եվրախորհրդարանի պատգամավոր Ֆրանկ Էնգելը։

ԼՂՀ Սահմանադրական փոփոխություններով նախատեսվում է կիսանախագահականից անցնել նախագահական կառավարման: Ըստ Արցախի ԿԸՀ հրապարակած արդյունքների՝ 103. 793 ընտրելու իրավունք ունեցող քաղաքացուց քվեարկությանը մասնակցել է 79.428-ը, որը կազմում է ընդհանուր թվի 76.52%-ը:

Կողմ քվեարկված քվեաթերթիկների թիվը կազմել է 69.540 կամ ընդհանուր քվեարկածների 87,55 %-ը, դեմ քվեարկված քվեաթերթիկների թիվը կազմել է 7.686 կամ ընդհանուր քվեարկածների 9.7 %-ը, անվավեր քվեաթերթիկներ է ճանաչվել 2.202 քվեաթերթիկ կամ ընդհանուրի 2.8 %-ը:

«Չնայած Արցախի Հանրապետության միջազգային մերժմանը, կարծում եմ, արդեն կարող եմ վստահորեն Արցախի Հանրապետություն ասել», - նշել է Էնգելը, գրում է Aysor.am-ը:

«Չնայած մերժմանը՝ դա չի ազդոմ ժողովրդի կամքի վրա, չի խանգարում նրանց ակտիվ մասնակցել ընտրություններին և ամբողջ աշխարհին դեմ դուրս գալ։ Արցախի ժողովուրդն ասել է «այո», ասել է «այո» բավականին հիմնավոր», - հավելել է Եվրախորհրդարանի պատգամավորը։

Բոլիվիայի Պատգամավորների պալատի խորհրդարանական Ալիսիա Կանկիինը, որը Արցախում Սահմանադրության հանրաքվեին դիտորդական առաքելություն է իրականացրել, ասել է՝ ԼՂՀ-ում տեղի ունեցած Սահմանադրական հանրաքվեն հանգիստ էր ընթացել:

«Շատ ենք կարևորում Արցախում այն հանգամանքը, որ ժողովուրդը կարողանում է իր կամքն ազատ արտահայտել: Սահմանադրության հանրաքվեն մի գործընթաց է, որի ժամանակ ժողովուրդն է որոշում, թե ինչպիսի պետություն է ուզում: Արցախը նոր Սահմանադրությունից հետո ավելի կզարգանա»,- ասել է Կանկիինը:

Բոլիվիայի Պատգամավորների պալատի խորհրդարանական Մարիո Միտայինը ևս իր գոհունակությունն է հայտնել Սահմանադրության հանրաքվեի գործընթացի վերաբերյալ, գրում է Արցախպրեսը:

«Այն բավականին բարձր մակարդակով էր կազմակերպված: Մենք նկատել ենք ժողովրդի զանգվածային մասնակցություն և կարող ենք ասել, որ Արցախում հաջողված է հանրաքվեն: Գոհ ենք և՛ տեղի ժողովրդից, և՛ իշխանություններից, ովքեր ազատ գործելու իրավունք և կամք ունեն»,- ասել է Միտայինը:

Դիտորդական առաքելությամբ Արցախում գտնվող Ռուսաստանի Դաշնության պատվիրակության անդամներ Վլադիմիր Եվսենը, Վալերի Կորովինը և Ալեկսանդր Սկակովը նշել են, որԱրցախի Հանրապետությունը պետք է և կարող է ունենալ անկախություն:

«Հանրաքվեի ժամանակ մենք խախտումներ չենք նկատել: Արցախի ժողովրդի իրավագիտակցության մակարդակը բավականին բարձր է, և այստեղ մենք տեսել ենք կայացած ժողովրդավարական երկիր»,- ասել է պատվիրակության անդամ, քաղաքագետ Ալեքսանդր Սկակովը և հույս հայտնել, որ այն իրադարձությունները, որոնք տեղի են ունեցել ապրիլին, այլևս չեն կրկնվի:

Ռուսաստանի Դաշնության պատվիրակության անդամները նաև նշել են, որ Արցախի ճանաչված չլինելը ոչինչ չի նշանակում. պատմությունը ջնջել հնարավոր չէ: