Ֆոն դեր Լայեն․ Թուրքիայի և Ադրբեջանի հետ ՀՀ սահմանների բացումը բեկումնային կդառնա

PanARMENIAN.Net - Եվրահանձնաժողովի ղեկավար Ուրսուլա ֆոն դեր Լայենը ԵՄ և Կենտրոնական Ասիայի երկրների առաջին գագաթնաժողովի լիագումար նիստում, հայտարարել է, որ երեք տասնամյակ փակ մնալուց հետո Թուրքիայի և Ադրբեջանի հետ Հայաստանի սահմանների բացումը կդառնա բեկումնային։

Նա նշել է, որ Սև ծով հասնելու համար կարևոր է նաև Կենտրոնական Ասիայի և Հարավային Կովկասի երկրների սահմանների հարթ անցումը, հայտնում է Արմենպրեսը՝ Եվրահանձնաժողովի պաշտոնական կայքի վրա հղումով։

«Կենտրոնական Ասիան գլոբալ դարպաս է և Եվրասիայի բաբախող սիրտն է: Ահա թե ինչու մեր ներդրումային օրակարգն այդքան կենտրոնանում է այս տարածաշրջանի վրա: Անցյալ տարի մենք 10 միլիարդ եվրոյի ծախս են նախատեսել Անդրկասպյան տրանսպորտային միջանցքի համար։ Դա կկրճատի ցամաքային ճանապարհը Եվրոպայի և Կենտրոնական Ասիայի միջև մոտ կեսով: Դա կազմում է ընդամենը 15 օր: Միջանցքը կբացի նաև մեր տարածաշրջանների միջև բիզնեսի չօգտագործված ներուժը: Եվ դա կխթանի կապերն ու առևտուրը Կենտրոնական Ասիայի հինգ երկրների միջև»,- ասել է Եվրահանձնաժողովի ղեկավարը:

Ֆոն դեր Լայենն ընդգծել է, որ 2025 թվականին Ուզբեկստանում տեղի ունենալիք ներդրողների նոր հարթակը ծառայելու է որպես մասնավոր ներդրումների աղբյուր նշված միջանցքի համար՝ միաժամանակ հնարավորություն ընձեռելով գնահատել կատարված առաջընթացը։ Նրա խոսքով՝ մասնատված աշխարհի պայմաններում Անդրկասպյան տրանսպորտային միջանցքը կարող է զգալիորեն ամրապնդել կապը Եվրոպայի և Կենտրոնական Ասիայի հինգ պետությունների միջև։

«Բայց ենթակառուցվածքների շղթան ամբողջական չէ։ Սև ծով հասնելու համար կարևոր է նաև Կենտրոնական Ասիայի և Հարավային Կովկասի երկրների սահմանների հարթ անցումը: Երեք տասնամյակ փակ մնալուց հետո Թուրքիայի և Ադրբեջանի հետ Հայաստանի սահմանների բացումը խաղը փոխելու է։ Եվ դա Եվրոպան ու Կենտրոնական Ասիան ավելի կմոտեցնի իրար առավել քան երբևէ»,- նշել է ֆոն դեր Լայենը: