«Ռոսսելխոզնադզորի» ղեկավար․ ՀՀ-ից ներմուծումների սահմանափակումը քաղաքականության հետ կապ չունի

PanARMENIAN.Net - «Ռոսսելխոզնադզորի» ղեկավար Սերգեյ Դանկվերտը հայտարարել է, որ Հայաստանից սննդամթերքի մատակարարումների նկատմամբ կիրառված սահմանափակումները քաղաքական պատճառներ չունեն:

Նրա գնահատմամբ՝ Երևանի և Մոսկվայի հարաբերությունների միաժամանակյա վատթարացումը պարզապես համընկնում է, գրում է Lenta.ru-ն:

«Մենք ձեռնարկությունների հետ աշխատանքի բազմամյա պատմություն ունենք, լաբորատոր հետազոտությունների արդյունքներ, մատակարարումների և հայտնաբերված խախտումների վերաբերյալ տվյալներ», - նշել է պաշտոնյան։

Դանկվերտը հիմնական խնդիրը համարել է հանրապետությունում արտադրության և վերահսկողության կազմակերպումը, ավելի ճիշտ՝ դրա բացակայությունն արտադրանքի աճեցման և առաքման փուլերի միջև։

Նրա խոսքով՝ արտահանմամբ զբաղվում են բազմաթիվ ֆերմերներ, ինչի հետևանքով, օրինակ, տարբեր մատակարարներից ստացված հազարավոր կապ կանաչիներ հավաքվում են մեկ բեռնատարում, և միայն դրանից հետո են ներկայացվում ստուգման։ Այդ պատճառով վերահսկողությունը սկսվում է ոչ թե արտադրության ընթացքում, այլ արդեն սահմանին, մինչդեռ նման ձևաչափով արդյունավետ հսկողություն իրականացնել հնարավոր չէ:

«Ռոսսելխոզնադզորի» ղեկավարը վստահեցրել է, որ արգելքների վերաբերյալ որոշումները հապճեպ չեն ընդունվել, և յուրաքանչյուր ձեռնարկության վերաբերյալ տվյալները կուտակվել են երկար տարիների ընթացքում։ Միևնույն ժամանակ նա չի պարզաբանել, թե ինչու նման լուրջ խախտումների առկայության պայմաններում համապատասխան միջոցներ ավելի վաղ չեն կիրառվել, և խնդրահարույց արտադրանքը շարունակել է մատակարարվել երկիր։

Մեկ ամսից էլ պակաս ժամանակահատվածում Ռուսաստանը սահմանափակել է Հայաստանից ծաղիկների, լոլիկի, վարունգի, պղպեղի, կանաչեղենի, ելակի, հանքային ջրի, ձկան և ձկնամթերքի, բալի, կեռասի, ծիրանի, սալորի, դեղձի, նեկտարինի, խաղողի, չրերի, սմբուկի և կարտոֆիլի ներմուծումը։

Հայաստանի ներկայացուցիչները դիմել են Եվրասիական տնտեսական հանձնաժողովին՝ խնդրելով քննարկել Ռուսաստանի կողմից հայկական արտադրանքի նկատմամբ կիրառվող սահմանափակումների հարցը։

Հայաստանի վարչապետ Նիկոլ Փաշինյանը խոստացել է փոխհատուցել ռուսական շուկա մուտքի դժվարությունների պատճառով վնասներ կրած տեղական ֆերմերների կորուստները։ Բացի այդ, Եվրամիության ղեկավարությունը մտադիր է ավելի քան 50 միլիոն եվրո ֆինանսական աջակցություն հատկացնել։

Միաժամանակ Մոսկվան, Հայաստանի և Եվրամիության հարաբերությունների բարելավման ֆոնին, նախազգուշացրել է, որ կարող է վերանայել հանրապետությանը բնական գազի մատակարարման պայմանագիրը և բարձրացնել գները։