Վալերի Բուայե. Եթե Ցեղասպանության մասին օրինագիծը չհաստատվի, մենք նորից կսկսենք

9 փետրվարի 2012 - 15:04 AMT

PanARMENIAN.Net - Եթե Ցեղասպանության մասին օրինագիծը չընդունվի, մենք նորից կսկսենք: Այդ մասին Nouvelles d’Armenie տված հարցազրույցում հայտարարել է Հայոց ցեղասպանության ժխտումը քրեականացնող օրինագծի հեղինակ Վալերի Բուայեն: «Չէի սպասում նման սուր արձագանքի սենատորների կողմից՝ նկատի ունենալով քննարկումը Սահմանադրական խորհրդում»,-նշել է օրինագծի հեղինակը:

Ըստ նրա, կան առավել սուր ու հակասական հարցեր: «Մենք խոսում ենք գլոբալ ու ունիվերսալ բաների մասին, այնպիսի արժեքների, ինչպիսիք են ազատությունը, հավասարությունը ու եղբայրությունը»,-հավելել է նա:

Եթե խորհուրդը որպես ոչ սահմանադրական գնահատի օրինագիծը, Բուայեն հավանաբար կկապվի նախագահի աշխատակազմի հետ, որն այժմ սպասում է որոշման:

Նախօրեին, Սարկոզին հերթական անգամ կոչ արեց Թուրքիային առերեսվել սեփական պատմության հետ: Հունվարի 23-ին Ֆրանսիայի Սենատը կողմ է քվեարկել ցեղասպանությունների,այդ թվում` Հայոց ցեղասպանության ժխտումը քրեականացնող օրինագծին: Ընդհանուր առմամաբ քվեարկել են 213 սենատորներ, որոնցից 127-ը «կողմ», 86-ը «դեմ»: Օրինագիծը մերժման համար նախատեսում է 1 տարվա ազատազրկում և 45 հազար եվրո տուգանք:

Թուրքիան շատ ցավագին արձագանքեց օրինագծի ընդունմանը՝ հայտարարելով, թե կսառեցնի համագործակցությունը Ֆրանսիայի հետ ամենատարբեր ոլորտներում:

Օրինագծի ընդունման դեպքում Թուրքիայի իշխանությունները սպառնում էին Ֆրանսիայի հետ բոլոր դիվանագիտական կապերի խզումով: Ավելին, Թուրքիայի վարչապետ Ռեջեփ Թայիփ Էրդողանը հայտարարել էր, որ երբեք չի այցելի Ֆրանսիա, եթե օրինագիծը ընդունվի: