Սինգապուրը պատրաստ է կիսել իր տնտեսական փորձը Հայաստանի հետ

PanARMENIAN.Net - Սինգապուրում Հայաստանի նորանշանակ դեսպան Արմեն Սարգսյանը (նստավայրը` Պեկին) Սինգապուր կատարած իր այցի շրջանակներում հանդիպում ունեցավ երկրի արտաքին գործերի նախարարի պաշտոնակատար (միաժամանակ Սինգապուրի տրանսպորտի նախարար) Ռեյմոնդ Լիմի հետ: Քննարկվեցին Հայաստանի և Սինգապուրի միջև քաղաքական և տնտեսական հարաբերությունների խթանման, միջազգային կազմակերպություններում երկկողմ համագործակցության ակտիվացման հարցեր:

Պրն. Լիմը տեղեկացրեց, որ փորձի փոխանակման առումով Սինգապուրը պատրաստ է Հայաստանին տրամադրել խորհրդատվություն, ինչպես նաև կազմակերպել հատուկ կրթական ծրագրեր և դասընթացներ տնտեսության տարբեր բնագավառներում աշխատող ՀՀ քաղծառայողների համար:

Սինգապուրի առևտրի և արդյունաբերության նախարար Լիմ Հընգ Կիանգի հետ կայացած հանդիպման ընթացքում հիմնականում խոսվեց երկկողմ առևտրատնտեսական հարաբերությունների զարգացման և գործարար շրջանակների միջև կապեր հաստատելու անհրաժեշտության մասին: Դեսպան Սարգսյանը նշեց, որ Հայաստանում արտադրվող որոշ ապրանքատեսակներ, մասնավորապես` բնական հյութեր, արդեն իսկ տեղ են գտել Սինգապուրի շուկայում, ինչպես նաև ներկայացված են այս օրերին ընթացող «Սինգապուրի սննդի էքսպո-2010» ցուցահանդեսում, հաղորդում է ՀՀ ԱԳՆ մամլո ծառայությունը: