Հայաստանի նախագահը մտահոգված է բանկային համակարգի բարձր տոկոսադրույքներով

PanARMENIAN.Net - Նախագահի հետ անցկացվող խորհրդակցությունները դրական խթան են հաղորդում գործարարներին, որոնք արծարծում են կուտակված հարցերը, այդ թվում հարկային քաղաքականության ոլորոտում, գտնում է ՀՀ ԿԲ նախագահ Արթուր Ջավադյանը: «Կան գործոններ, որոնք խանգարում են բանկերին առավել ռիսկային վարկավորման դիմել կամ նվազեցնել տոկոսադրույքները: Բնականաբար, տոկոսադրույքները մտահոգում են նախագահին: Ինձ թվում է, որ նման հանդիպումները թույլ կտան մեղմել այդ անհանգստությունը»,-ասել է նա:

Ապրիլի 28-ին Երևանում տեղի է ունեցել աշխատանքային խորհրդակցություն ՀՀ նախագահ Սերժ Սարգսյանի մասնակցությամբ, որին մասնակցել են երկրում գործող 21 առևտրային բանկերի ղեկավարները:

Ըստ ՀՀ ԿԲ ղեկավարի, բանկերի խնդիրների լուծումը թույլ կտա նվազեցնել առկա ռիսկերը, ինչն իր հերթին կհանգեցնի տոկոսադրույքների նվազեցման: Ջավադյանը հայտնել է նաև, որ պայմանավորվածությունը բանկերի ղեկավարների հետ հանդիպման մասին վաղուց է ձեռք բերվել և այդ հանդիպումները հետևողական բնույթ են կրելու:

Իր կողմից Հայաստանի բանկերի միության նախագահ Աշոտ Օսիպյանը հայտնել է, որ նախագահի հետ հանդիպման ժամանակ քննարկվել են բանկային համակարգի հետագա զարգացմանն ուղղված քայլերը: Ըստ Օսիպյանի, քննարկվել են նաև գնաճի զսպմանը վերաբերող հարցեր, ինչը կհանգեցնի մակրոտնտեսական ցուցանիշների բարելավմանը:

Օսիպյանը նշել է նաև, որ վերջին տարիներին նկատվում է 2-3 տոկոսով տոկոսադրույքների նվազման միտում, ինչը կշարունակվի: