Ապրիլի 23-ի երեկոյից փակ էին Հալեպի բոլոր հայկական խանութները՝ ի հիշատակ Հայոց եղեռնի զոհերի

25 ապրիլի 2012 - 16:45 AMT

PanARMENIAN.Net - Ապրիլի 24-ին Հալեպում տեղի ունեցավ 1915 թ. Հայոց մեծ եղեռնի զոհերի հիշատակին նվիրված միջոցառումների մի ամբողջ շարք՝ կազմակերպված Սիրիայի հայկական երեք համայնքների և հայկական տարբեր միությունների կողմից:

Հալեպահայությունը` որպես կատարված ոճրագործության դեմ բողոքի յուրահատուկ ձև, համայնքի պատմության մեջ առաջին անգամ բացահայտ կերպով դեռևս ապրիլի 23-ի երեկոյան ժամերից զանգվածաբար հայկական խանութների վրա փակցրեց ցուցանակներ «Խանութը փակ է` ի հիշատակ 1915 թ. Հայոց եղեռնի զոհերի» բովանդակությամբ` միևնույն ժամանակ դրանով իսկ իր հարգանքի տուրքը մատուցելով Հայոց Մեծ Եղեռնի զոհերի հիշատակին:

Ինչպես հայտնում է ՀՀ ԱԳՆ մամլո ծառայությունը, ապրիլի 24-ի վաղ առավոտից Հայ առաքելական եկեղեցու կողմից Գերաշնորհ Տ. Շահան Արք. Սարգսյանի գլխավորությամբ մատուցվեց ոգեկոչման և հոգեհանգստի պատարագ՝ սբ. Նահատակաց եկեղեցում, որին հետևեց 1915 թ. զոհերի հուշարձանին պսակի զետեղման արարողությունը Հալեպի երեք հայ համայնքապետերի, Հալեպում ՀՀ գլխավոր հյուպատոսի, ինչպես նաև հայկական բոլոր մշակութային, բարեսիրական, մարզական միությունների ու ընկերակցությունների մասնակցությամբ:

Կազմակերպված միջոցառումների շարքում էր «Երկրից բերված մասունքներ» խորագրով ցուցահանդեսը, որին ներկայացված էին հայրենիքից բերված կենցաղային իրեր, վավերաթղթեր, լուսանկարներ, տպագիր մամուլի ու գրքերի նմուշներ և այլ իրեր: Ցուցահանդեսը հեռարձակվեց նաև Սիրիայի պետական հեռուստաընկերությամբ:

Երեկոյան միջոցառումն եզրափակեց ապրիլի 24-ի միջոցառումների շարքը: Միջոցառման գեղարվեստական բաժնին հետևեցին Հալեպում ՀՀ գլխավոր հյուպատոսի՝ Կարեն Գրիգորյանի, այնուհետև Հայ առաքելական եկեղեցու առաջնորդ Գերաշնորհ Տ. Շահան Արք. Սարգիսյանի խոսքը՝ նվիրված 1915 թ. Հայոց Մեծ Եղեռնի թեմային: