Դանիայում հարգել են Եղեռնի զոհերի հիշատակը

PanARMENIAN.Net - Ապրիլի 28-ին Հայոց ցեղասպանության 97-րդ տարելիցի առթիվ «ԴանԱրմեն» հայ-դանիական ասոցիացիայի նախաձեռնությամբ Դանիայի Գյուլլինգ գյուղում` Կարեն Յեփփեի ծննդավայրում միջոցառում անցկացվեց:

Միջոցառմանը մասնակցում էին ավելի քան 200 մարդ Դանիայից, Գերմանիայից և Շվեդիայից: Մասնակիցների թվում էին հայ և ասորական համայնքների ներկայացուցիչներ, մեծ թվով դանիացիներ, լրագրողներ:

Միջոցառումը սկսվեց Գյուլլինգի եկեղեցում, որտեղ բացման խոսքով ելույթ ունեցավ Օդեռի քաղաքապետի տեղակալ Սալլի Ռուբինկը, ով դատապարտեց Հայոց ցեղասպանության փաստը: Քաղաքապետի տեղակալն իր խոսքում նշեց, որ Դանիայի կողմից Հայոց ցեղասպանության պաշտոնական ճանաչումը միայն ժամանակի հարց է: ՀՀ դեսպան Հրաչյա Աղաջանյանն իր ելույթում անդրադառնալով Եղեռնի պատմությանը և Օսմանյան կայսրությունում դանիացի միսիոներների գործունեությանը, իր երախտագիտությունը հայտնեց Դանիայի ժողովրդին Կարեն Յեփփեի անձնուրաց գործունեության կապակցությամբ, ով տասնյակ տարիներ շարունակ իր կյանքը նվիրեց Ցեղասպանությունից փրկված հազարավոր հայ որբերի խնամքին և ուսուցմանը:

Այնուհետև Գյուլլինգի եկեղեցում պատարագ մատուցվեց դանիացի քահանա Պեռ Պետերսենի և աղոթք կարդացվեց ասորի քահանայի կողմից;

Պատարագից հետո ՀՀ դեսպանության և հյուրերի կողմից ծաղկեպսակ և ծաղիկներ դրվեցին եկեղեցու մոտ գտնվող Կարեն Յեփփեի հուշաքարի մոտ, որից հետո միջոցառման մասնակիցներն այցելեցին Գյուլլինգի տեղական արխիվ:

Արխիվի տնօրեն Մոգենս Հոյմարկը ներկայացրեց Կարեն Յեփփեի կյանքի և Հալեպում նրա կատարած աշխատանքների մասին: Արխիվում պահպանված էին մեծ քանակությամբ Հայոց ցեղասպանության մասին պատմող Դանիայում և այլուր տպագրված գրքեր, հոդվածներ, լուսանկարներ, ինչպես նաև մանկատան երեխաների ձեռքերով պատրաստված ժանեկահյուս աշխատանքներ, որոնք ուղարկված են եղել Դանիա վաճառելու` մանկատան և Ցեղասպանությունից հետո ստրկության մեջ գտնվող հայ կանաց ազատելու համար գումար հավաքելու նպատակով: