Եվրախմբի ղեկավարն աջակցել է նոր օգնություն ստանալու Հունաստանի հույսերին

PanARMENIAN.Net - Եվրախմբի նախագահ Ժան Կլոդ Յունկերը սատարել է հունական կառավարության հույսերին երկարացնել ծախսերի կտրուկ կրճատման համար հատկացված ժամկետը, բայց նախազգուշացրել, որ դա սնանկությունից խուսափելու Հունաստանի վերջին շանսն է:

5 տարի շարունակ ռեցեսիայով համակված Հունաստանը հույս ունի ստանալ ևս երկու տարի` 130 մլրդ եվրոյի չափով բյուջետային նպատակներին հասնելու համար:

Հունաստանի վարչապետ Անտոնիս Սամարասի «ավելի շատ տարածություն տալու» խնդրանքը բացասաբար է ընդունվել Նիդերլանդների և Գերմանիայի կողմից: Յունկերը հաղորդել է, որ հետաձգման մասին որոշումը կախված կլինի ԵՄ-ից և ԱՄՀ-ից, որոնք կգնահատեն պարտականությունների կատարման առաջընթացը:

Յունկերը խոստովանել է, որ Հունաստանը ենթարկվել է «անվստահության ճգնաժամի», բայց կրկնել, որ դեմ է եվրագոտուց երկրի դուրս գալուն, քանի որ դա չի օգնի Հունաստանին, բայց կարող է «խոշոր ռիսկեր բերել եվրագոտու տնտեսությանը»: