Հանս Յոհան Շմիդտ. Ափսոս, որ Երևանում աշխատող դիվանագետներին չի թույլատրվում այցելել Ղարաբաղ (վիդեո)

 18 հոկտեմբերի 2013 - 13:56 AMT

PanARMENIAN.Net - «Առաջին անգամ եմ Լեռնային Ղարաբաղում և ուրախ եմ, որ այս տարիներին վերջապես կարողացա այցելել այստեղ: Ինչպես ձեզ հայտնի է, Երևանում աշխատող դիվանագետներին չի թույլատրվում այցելել Ղարաբաղ: Ափսոս, որ այդպես է»,- հայտարարել է Հայաստանում Գերմանիայի նախկին դեսպան Հանս Յոհան ՇմիդտնԱրցախի հեռուստատեսությանը տված հարցազրույցում:

Հոկտեմբերի սկզբին Շմիդտը մասնակցել է Ստեփանակերտում «Արցախի ազգային-ազատագրական պայքարը. Գյուլիստանից մինչև մեր օրերը» խորագրով գիտաժողովին:

Ըստ գերմանացի դիվանագետի, իրավիճակն և զարգացումները ճիշտ գնահատելու համար հարկավոր է դրանց տեղում ծանոթանալ: Խոսքն անվտանգության հարցերի, ժողովրդի վիճակի մասին է: Եթե այստեղ ընտրություններ են, անհրաժեշտ է ներկա գտնվել իրական տպավորություն ստանալու համար: «Նույնիսկ ԵԱՀԿ ՄԽ համանախագահներն են հազվադեպ այցելում Ղարաբաղ: Կան նաև այլ փորձագետներ ու կենտրոններ: Նրանց ներկայացուցիչներն էլ ավելի հազվադեպ են այստեղ լինում»,- նշել է նա:

Ինչ վերաբերում է ԵՄ գործունեությանը, ապա նախկին դեսպանը հայտարարել է, որ տարածաշրջանի պետությունների հետ հարաբերություննում կազմակերպությունը նույնպես առաջնայնություններ ունի: Անշուշտ, պաշտոնապես դա չի հայտարարվում, սակայն ոչ պաշտոնական մակարդակով ոչ ոք չի հերքում նման գերակայությունների առկայությունը: Բայց այս փուլում, ըստ Հանս Յոհան Շմիդտի, առավելագույն մտահոգությունն առաջացնում է սպառազինությունների մրցավազքը:

«Ինձ ամենից շատ մտահոգում է սպառազինությունների մրցավազքը: Ադրբեջանն ավելի մեծ հնարավորություններ ունի և, ըստ իս, անթույլատրելի է, որ միջազգային հանրությունը բավականաչափ կոշտ չարձագանքեց, երբ Ադրբեջանի ու Իսրայելի միջև 1 մլրդ դոլարի սպառազինություն գնելու համաձայնություն կնքվեց: Անթույլատրելի է նաև, որ Ռուսաստանն Ադրբեջանին 1 մլրդ դոլարի զենք հանձնեց: Դա չի նպաստի ղարաբաղյան հակամարտության վերջնական կարգավորմանը»,- ասել է Հայաստանում Գերմանիայի նախկին դեսպանը:

Ստեփանակերտում տեղի ունեցած «Արցախահայության ազգային-ազատագրական պայքար. Գյուլիստանից մինչև մեր օրերը» միջազգային գիտաժողովին մասնակցել է և ելույթ է ունեցել նաև Հայաստանում Գերմանիայի նախկին դեսպան Հանս Յոհեն Շմիդտը: Նա հիշեցրել է, որ 20-ականներին հայերը կազմել են Ղարաբաղի բնակչության 90 տոկոսը, հետո ԽՍՀՄ ժողովրդագրական քաղաքականության արդյունքում 80-ականներին այդ ցուցանիշը նվազել է մինչև 72 տոկոս: Գերմանացի դիվանագետը նշել է, որ ադրբեջանցի փախստականները պատանդներ են և օգտագործվում են քաղաքական նպատակներով: Նրանք չեն ինտեգրվում, այլ օգտագործվում են որպես ճնշման լծակ, հավելել է նա:

Հոկտեմբերի 4-ին ԼՂՀ Ազգային ժողովի նիստերի մեծ դահլիճում աշխատանքները սկսեց «Արցախահայության ազգային-ազատագրական պայքար. Գյուլիստանից մինչև մեր օրերը» խորագրով միջազգային գիտաժողովը՝ նվիրված արցախահայության ազգային-ազատագրական պայքարի՝ Ղարաբաղյան շարժման 25-ամյակին: Գիտաժողովին ներկա են անվանի ու հեղինակավոր գիտնականներ՝ պատմաբաններ, քաղաքագետներ, իրավագետներ և փորձագետներ մի շարք երկրներից, այդ թվում՝ Մեծ Բրիտանիայից, Բելգիայից, Ռուսաստանից, Ֆրանսիայից, Գերմանիայից, Ավստրիայից, Չեխիայից, Կիպրոսից, Լիբանանից, ինչպես նաև Հայաստանից ու Արցախից: