Դիտարկման ժամանակ Ադրբեջանը ԵԱՀԿ առաքելությունը դուրս չի բերել իր առաջապահ դիրքեր

7 փետրվարի 2014 - 16:19 AMT

PanARMENIAN.Net - Փետրվարի 7-ին Լեռնային Ղարաբաղի Հանրապետության իշխանությունների հետ ձեռք բերված պայմանավորվածության համաձայն` ԵԱՀԿ առաքելությունը Լեռնային Ղարաբաղի և Ադրբեջանի զինված ուժերի շփման գծի պլանային դիտարկում է անցկացրել Հադրութի ուղղությամբ Հորադիզ բնակավայրի մոտակայքում:

ԼՂՀ պաշտպանության բանակի դիրքերից դիտարկումն իրականացրել են ԵԱՀԿ գործող նախագահի անձնական ներկայացուցիչ դեսպան Անջեյ Կասպշիկը և նրա դաշտային օգնականներ Եվգենի Շարովը (Ուկրաինա) և Խրիստո Խրիստովը (Բուլղարիա): Շփման գծի հակառակ կողմից դիտարկման խմբի մեջ մտնում էին ԵԱՀԿ գործող նախագահի անձնական ներկայացուցչի դաշտային օգնականներ Իրժի Աբերլեն (Չեխիա) և Ուիլյամ Պրայորը (Մեծ Բրիտանիա):

Դիտարկումն անցել է ըստ նախատեսված ժամանակացույցի, կրակի դադարեցման ռեժիմի խախտումներ չեն արձանագրվել: Սակայն ադրբեջանական կողմը ԵԱՀԿ առաքելությունը դուրս չի բերել իր առաջապահ դիրքեր:

Դիտարկման առաքելությանը ղարաբաղյան կողմից ուղեկցել են ԼՂՀ արտաքին գործերի նախարարության և պաշտպանության նախարարության ներկայացուցիչները, հայտնում է ԼՂՀ ԱԳՆ մամուլի ծառայությունը:

Տարածաշրջան այցելության ժամանակ ԵԱՀԿ Մինսկի խմբի համանախագահները Հայաստանի և Ադրբեջանի պաշտոնական ներկայացուցիչների հետ հանդիպումներում կրկին վերահաստատել են մտահոգությունը՝ կապված շփման գծում ու սահմանին ոչ վաղ անցյալում իրավիճակի սրացման կապակցությամբ և կողմերին զսպվածության կոչ են արել սեփական գործողություններում ու հայտարարություններում: Կողմերը հայտարարել են, որ մտադիր են ամրապնդել հրադադարի պահպանման ռեժիմն ու խուսափել իրավիճակի հետագա էսկալացիայից, ինչը հատկապես վերաբերում է Սոչիի առաջիկա օլիմպիական խաղերի անցկացման ժամկետին:

Ավելի վաղ Ռուսաստանի ԱԳՆ-ն զինված հակամարտությունների մասնակիցներին կոչ էր արել խաղերի ընթացքում «օլիմպիական զինադադար» հայտարարել, անկախ երկրից:«Նախևառաջ, մեր կոչն ուղղված է Սիրիայում հակամարտող կողմերին. նրանց գործողություններն ապակայունացնող ազդեցություն են թողնում ոչ միայն այդ երկրի, այլև ամբողջ տարածաշրջանի վրա»,- նշված էր ՌԴ ԱԳՆ-ի հաղորդագրությունում:

Երևանում և Բաքվում կայացած հանդիպումներում միջնորդները ընդգծել են, որ առաջընթաց է անհրաժեշտ ղարաբաղյան կարգավորման գործընթացում, ինչպես նաև հարկավոր է բարձր մակարդակով հանդիպում կազմակերպել:

Փետրվարի 5-ին Երևանում նրանք հանդիպել էին Հայաստանի նախագահ Սերժ Սարգսյանին, ԱԳ նախարար Էդվարդ Նալբանդյանին ու պաշտպանության նախարար Սեյրան Օհանյանին: Քննարկվել էին ոչ վաղ անցյալում Փարիզում տեղի ունեցած արտգործնախարարների հանդիպման արդյունքները, ինչպես նաև ընդգծվել Ղարաբաղյան հակամարտության կարգավորման գործընթացում հետագա առաջընթացի հասնելու անհրաժեշտությունը:

Մինչ այդ համանախագահները եղել էին Բաքվում, որտեղ հանդիպումներ էին ունեցել Ադրբեջանի նախագահի ու ԱԳ նախարարի հետ:

Երևանում ԱԳՆ շենքի մուտքի մոտ համանախագահներին ու Կասպրշիկին բողոքի ակցիայով դիմավորեցին ՀՅԴ «Նիկոլ Աղբալյան» ուսանողական խորհրդի և երիտթևի անդամները: Նրանք վանկարկում էին «Ո՛չ երկակի ստանդարտներին», «Դեմ ենք Մինսկի խմբի համանախագահների վարած քաղաքականությանը», երբ համանախագահները ժամանել էին ու ներս մտել՝ հրաժարվելով պատասխանել ինչ-որ հարցերի: «Այստեղ ենք, որ ԵԱՀԿ Մինսկի խմբի համանախագահներին հիշեցնենք իրենց առաքելության մասին»,- լրագրողներին ասել է ՀՅԴ «Նիկոլ Աղբալյան» ուսանողական, երիտմիության վարչության ատենապետ Գերասիմ Վարդանյանը՝ հավելելով, թե առաքելությունը նրանում է, որ նպաստեն խաղաղության պահպանմանը, բայց իրենց գործողություններով նրանք ուղղակիորեն նպաստում են պատերազմի վերսկսմանը: Վարդանյանը նաև նշել է, որ հավասարություն դնել հայ-ադրբեջանական սահմանի իրադարձությունների միջև նշանակում է նպաստել, խրախուսել Ադրբեջանի կողմից իրականացվող հակահայկական, ագրեսիվ քաղաքականությանը և նրան թույլ տալ շարունակել այն: «Համանախագահներից պահանջում ենք համապատասխան վերաբերմունք և կեցվածք դրսևորել, իրերը կոչել իրենց անուններով»,- նշել է երիտասարդը: Համանախագահներն Էդվարդ Նալբանդյանին ներկայացրեցին Բաքվում ունեցած հանդիպումների տպավորությունները: Նախարար Նալբանդյանը կարևորեց ադրբեջանական կողմի շարունակական սադրանքների կանխարգելման անհրաժեշտությունը և նշել, որ Հայաստանը լիովին կիսում է համանախագահների կարծիքը, որ Հայաստանի հետ սահմանին և Ղարաբաղի հետ շփման գծում տեղի ունեցող միջադեպերը խանգարում են բանակցային գործընթացին, նվազեցնում են խաղաղության հասնելու հնարավորությունները:

Վերջին օրերին թե հայ-ադրբեջանական սահմանի, թե ղարաբաղա-ադրբեջանական շփման գծի երկայնքով հակառակորդն ակտիվ խախտում էր հրադադարը: ունվարի 19-ի լույս 20-ի գիշերը ղարաբաղա-ադրբեջանական հակամարտ զորքերի շփման գծի հյուսիսարևելյան (Ջրաբերդ) և հարավարևելյան (Կորգան) ուղղություններում հակառակորդը դիվերսիոն խմբերի ներթափանցման միաժամանակյա փորձեր էր արել, բռնկված փոխհրաձգության արդյունքում հակառակորդի կողմից ստացած հրազենային վիրավորումից զոհվել էր կրտսեր սերժանտ Արմեն Հովհաննիսյանը:Ավելի ուշ նախագահ Բակո Սահակյանը հրամանագիր էր ստորագրել, համաձայն որի կրտսեր սերժանտ Արմեն Հովհաննիսյանին հետմահու պարգևատրվել էր «Արիության համար» մեդալով:

Հունվարի 23-ից լույս 24-ի գիշերն ինտենսիվ կրակել են նաև Տավուշի սահմանամերձ մի շարք գյուղերի՝ Ներքին Կարմիրաղբյուրի, Այգեպարի, Մովսեսի ու Չինարիի ուղղությամբ:Պառավաքարի գումարտակի հրամանատար Դավիթ Անիկյանի 16-ամյա դուստրը` Լիանան, վիրավորվել է Այգեպարի իրենց տանը նստած ոտքին ստացած հրազենային կրակոցից, աղջկան տեղափոխել են Բերդի հոսպիտալ, որտեղ վիրահատել են:

Հունվարի 28-ին հյուսիսային ուղղությամբ տեղակայված զորամասերից մեկի պահպանության տեղամասի մարտական դիրքում հակառակորդի դիպուկահարի կողմից արձակված գնդակից զոհվեց զինծառայող Կարեն Գալստյանը: Ավելի ուշ ԼՂՀ նախագահ Բակո Սահակյանի հրամանագրով զինծառայոդղը հետմահու պարգևատրվեց «Մարտական ծառայություն» մեդալով: Այս անգամ համանախագահները Ստեփանակերտ չմեկնեցին: Սակայն ԼՂՀ այցելեց ԵԱՀԿ գործող նախագահ Անջեյ Կասպրշիկը: Ստեփանակերտում նա հանդիպեց ԼՂՀ ԱԳ նախարար Կարեն Միրզոյանի հետ: Հանդիպմանը քննարկվեցին շփման գծում իրավիճակին առնչվող հարցեր:

Կարեն Միրզոյանը Անջեյ Կասպրշիկի ուշադրությունը հրավիրեց Ադրբեջանի կողմից հրադադարի ռեժիմի պարբերաբար խախտումների վրա՝ նշելով, որ դա վկայում է պաշտոնական Բաքվի ագրեսիվ մտադրությունների մասին: Նախարարը նշեց, որ ադրբեջանական կողմի սադրանքները լուրջ վնաս են հասցնում ադրբեջանա-ղարաբաղյան հակամարտության խաղաղ կարգավորման գործընթացին և պետք է խստորեն դատապարտվեն միջազգային հանրության կողմից: Կողմերը կարևորեցին հրադադարի ռեժիմի պահպանումն ու միջդեպերի բացառումը:

Անջեյ Կասպրշիկը հանդիպեց նաև ԼՂՀ նախագահ Բակո Սահակյանի հետ, քննարկվեցին բանակցային գործընթացին առնչվող մի շարք հարցեր, իրավիճակը ԼՂ և Ադրբեջանի ԶՈւ շփման գծում:

Նյութեր թեմայով.

ԵԱՀԿ ՄԽ-ն մտադիր է Հայաստանի ու Ադրբեջանի նախագահների ևս մեկ հանդիպում կազմակերպել

ԵԱՀԿ նախագահը, մեղավորներին չնշելով, կոչ է արել չսրել իրավիճակը ղարաբաղյան հակամարտության գոտում

Հակառակորդի կրակոցից ևս մեկ զինվոր ենք կորցրել