Սիրիահայերը կոչ են անում փրկել «սփյուռքի օրրանը» ոչնչացումից 9 հունիսի 2014 - 10:49 AMT PanARMENIAN.Net - Մայիսի 30-ից հունիսի 1-ը տեղի ունեցած ՆԱՏՕ Խորհրդարանական վեհաժողովին ՀՀ ԱԺ պատվիրակությունը քաղաքական հանձնաժողովի նիստին բարձրաձայնել է նաև Սիրիայի և, մասնավորապես, Քեսաբի հարցը: Պատվիրակները նշել են, որ ՆԱՏՕ-ի անդամ երկիր Թուրքիան զինյալ ապստամբներին ոչ միայն թույլ է տվելիր տարածքով Քեսաբ ներխուժել, այլև` ֆինանսական աջակցություն ցուցաբերել։ «Թուրքիայի պատվիրակն անմիջապես արձագանքեց, թե Թուրքիայի կառավարության կողմից որևէ մասնակցություն չկա Սիրիայում և նշեց, թե Թուրքիայի կառավարությունը չի ֆինանսավորում ապստամբական ոչ մի խմբի, ինչը, բնականաբար, չի համապատասխանում իրականությանը, և բազմաթիվ փաստեր կան, որոնք վկայում են դա։ Մեր պատվիրակությունը խնդրեց պարզել, թե ինչ քայլեր կարող է անել ՆԱՏՕ-ն՝ իր անդամ պետության կողմից նման քայլեր չձեռնարկվելու ուղղությամբ»,-լրագրողների հետ հանդիպմանն ասել է ՀՀ ԱԺ պատվիրակության ղեկավար Կորյուն Նահապետյանը` նկատելով, թե կոնկրետ վեհաժողովի կողմից, ցավոք, որևէ արձագանք չի եղել։ «Ցավոք, արձագանք չեղավ, քաղաքական հանձնաժողովի նիստում էր հարցը բարձրացվել և Թուրքիայի պատվիրակի առարկությունից հետո, ուղղակի չարձագանքեցին այդ հարցին»,- ասել է նա, գրում է Tert.am-ը։ Միևնույն ժամանակ Հալեպի և Նոր Գյուղի հայ բնակչությունը կոչ է անում անհապաղ քայլեր ձեռնարկել Սփյուռքի «օրրանը» ոչնչացումից փրկելու համար: Perio News-ի Facebook-ի էջում զետեղված հայտարարության մեջ ասվում է. «ՀՀ սփյուռքի նախարարությունը անհապաղ պետք է միջոցների հանգանակություն սկսի «Փրկենք Նոր Գյուղը» կարգախոսով: Միջոցների հանգանակությունը պետք է ավարտել միայն այն ժամանակ, երբ կավարտվի քաղաքացիական պատերազմը Սիրիայում: Դրանից հետո անհապաղ ձեռնամուխ լինել հայկական թաղամասի վերականգնմանը: ՀՀ ԱԳՆ-ն պետք է հանդես գա բողոքի նոտաներով ու հայտարարություններով: Արդեն գաղտնիք չէ, որ հայ բնակչությունը Սիրիայի տարածքում ոչնչացվում է թուրքամետ ու թուրքական զինյալ ջոկատների կողմից: Այս պայմաններում լռությունը և դիվանագիտական անգործությունը հղի են բացասական հետևանքներով»: Սիրիահայերը նաև կոչ են անում ՀՀ բնակչությանը համախմբվել սիրիացի հայրենակիցներին փրկելու համար: «Պետք է մի կողմ թողնել քաղաքական ու կուսակցական, կրոնական և այլ տարաձայնությունները: Հարկավոր է անհրաժեշտ քայլեր ձեռնարկել սիրիահայ համայնքը փրկելու համար: Սփյուռքյան բոլոր կառույցներն ամբողջ աշխարհում պետք է ճշմարտությունը հասցնեն աշխարհին սիրիահայերի վիճակի մասին և ճշմարիտ տեղեկություններ հաղորդեն այն ամենի մասին, ինչ կատարվում է Սիրիայում»,-ասվում է հայտարարության մեջ: Հունիսի 2-ին Հալեպի Նոր Գյուղ շրջանում ահաբեկչական խմբավորումների արձակած հրթիռների պատճառով մահացել է Անդրանիկ Գանթարճյանը (1957թ.): Նրա մարմինը հայտնաբերվել է ավերված շենքի փլատակների տակ, գրում է սիրիական «Գանձասար» թերթը Facebook-ի իր էջում: Նույն շրջանում փլատակների տակ հայտնաբերվել է վիրավոր Մանուկ Ղազելյանը: Իսկ Ճալաա շրջանում ընկած հրասանդի հետևանքով վիրավորվել է Հովսեփ Արամյանը: Վիրավորների վիճակը կայուն է: Հունիսի 2-ին` տեղի ժամանակով 12:55-ին, 4 հրթիռ է ընկել Զվարթնոց եկեղեցու շրջակայքում: Վիրավորվել է Հարութ Իսկենյանը, վիճակը կայուն է: Հունիսի 1-ին հայկական թաղամասի խաղաղ բնկաչությունը դարձյալ հթիռակոծվել է: Ըստ Al Mayadin հեռուստաալիքի, 23 մարդ զոհվել է և 76 –ը՝ վիրավորվել: Ըստ հեռուստաալիքի, Սիրիայի կառավարական զորքերը հսկողության տակ են վերցրել Հալեպից դեպի հյուսիս գտնվող վեց գյուղեր: Նոր Գյուղ հայկական թաղամասում վիրավորվել են Զարեհ Քահքեճյանն ու Հրաչյա Պայթարը, որոնք հիվանդանոցում են գտնվում: Նրանց վիճակը կայուն է: Թաղամասին մեծ նյութական վնաս է հասցվել: Մայիսի 30-ի երեկոյան սիրիացի զինյալ գրոհայինները 22 «հրասանդ ռումբեր» են արձակել Դամասկոսի Նոր Գյուղ հայկական թաղամասի վրա: Ինչպես գրում է սիրիական «Գանձասար» թերթը Facebook-ի իր էջում, Al Mayadin հեռուստաալիքի վրա հղումով, ռումբերի պայթյունից զոհվել է 22 մարդ, 77-ը վիրավորվել են: Ամերիկայի Հայ Դատի հանձնախումբը (ANCA) սկսել է #SaveAleppo արշավը: Սիրիական այդ քաղաքի հայ բնակչությունը, որը քաղաքի բնակիչների մեկ չորրորդն է կազմում, վերջին օրերին գնդակոծվում է զինյալ խմբավորումների կողմից, որոնք քաղաքը վերածել են աղետի գոտու: ANCA-ն կոչ է անում հեռաձայնել կամ գրել նախագահ Օբամային և կոչ անել անհապաղ միջամտել. առաջինը, դադարեցնել Հալեպի քրիստոնեական թաղամասերի ռմբակոծությունները, երկրորդը՝ ճնշում գործադրել Թուրքիայի վրա, որպեսզի նա բացի Եփրատի ջրերի հոսքը դեպի Սիրիա, և երրորդը՝ պատասխանի վերջապես ANCA-ի հարցմանը Քեսաբի վրա Թուրքիայի հարձակման դերի մասին: Եվրոպայի Հանուն արդարության ու ժողովրդավարության հայկական դաշինքը (EAFJD) բաց նամակ է հրապարակել, հասցեագրված Եվրամիության արտաքին գործերի ներկայացուցչին՝ կոչ անելով միջոցներ ձեռնարկել կասեցնելու համար Նոր Գյուղի հայ բնակչության բնաջնջումը: Սիրիայում արդեն 3 տարի է քաղաքացիական պատերազմ է: Այդ ընթացքում, ՄԱԿ տվյալներով, ավելի քան 125 հազար մարդ զոհվել է, 2 մլն՝ դարձել փախստական, ևս 4 մլն՝ ներքին տեղահանված անձինք են: Հայերը Սիրիայում հիմնականում բնակվում են Հալեպում ու Դամասկոսում: Մինչ պատերազմը սիրիահայ համայնքը հասնում էր 80 հազարի: Այժմ շուրջ 10 հազար սիրիահայեր հաստատվել են Հայաստանում, 5 հազարը՝ Լիբանանում: 2,5 տարում Սիրիայում մոտ 100 հայ է զոհվել: Photo:Maria Gabrielyan Ուշագրավ
Նրանք նաև կոչ են արել դադարեցնել Ադրբեջանին ցանկացած ռազմական օգնության Որպես օրինակ մատնանշում են 2023–ի սեպտեմբերի 19-ին Երևանում կազմակերպված բողոքի ակցիայի իրադարձությունները Հանդիպումը տեղի կունենա, եթե Հայաստանը ևս տա իր համաձայնությունը Այս գերեզմանատանն են ամփոփված այնպիսի նշանավոր հայերի մարմինները, ինչպիսինք են Վիլյամ Սարոյանն ու Սողոմոն Թեհլերյանը Ամենաընթերցվողը բաժնում | Շվեյցարացի պատգամավոր․ Սահմանային հարցերը պետք է լուծել, որ Բաքվի կողմից հարձակվելու պատրվակ չդառնան «Խավիարային դիվանագիտությունն» այժմ ճանաչված տերմին է, ցավոք, դա հաջողվում է»,–ասել է նա Փաշինյան․ Ժամանակն է Բաքվի հետ ձեռք բերված համաձայնությունները ներառել խաղաղության պայմանագրում և ստորագրել Նա անդրադարձել է նաև հայկական «Խաղաղության խաչմերուկ» նախագծին ՊՆ․ ԳՇ պետ Ասրյանը բացառապես ՀՀ քաղաքացի է, իսկ նրա կինը՝ ազգությամբ ռուս Նշվում է նաև, որ ԳՇ պետի որդին զինապարտ է և ներգրավված է ՀՀ ԶՈւ 2024 թվականի զորակոչային միջոցառումներին Երևանում բոլոր 63 բերման ենթարկվածներն ազատ են արձակվել Բերման էր ենթարկվել 63 ցուցարար |