ԵԱՀԿ Մինսկի խումբը փետրվարի 17-ին Երևան կժամանի Բաքվից

12 փետրվարի 2015 - 16:11 AMT

PanARMENIAN.Net - ԵԱՀԿ Մինսկի խմբի համանախագահներ Իգոր Պոպովը (ՌԴ), Ջեյմս Ուորլիքը (ԱՄՆ), Պիեռ Անդրիեն (Ֆրանսիա) Հայաստան կժամանեն փետրվարի 17-ին: Այդ մասին Twitter-ի իր միկրոբլոգում հայտնել է Հայաստանի ԱԳՆ մամուլի քարտուղար Տիգրան Բալայանը:

Բալայանը հայտնել է նաև, որ Երևանում միջնորդները կհանդիպեն Հայաստանի նախագահ Սերժ Սարգսյանի և ԱԳՆ ղեկավար Էդվարդ Նալբանդյանի հետ:

Ինչպես հայտնել էր Թրենդ ադրբեջանական գործակալությունը, համանախագահները փետրվարի 15-ին կժամանեն Ադրբեջան տարածաշրջանային այցի շրջանակում և պաշտոնական հանդիպումներ կունենան Ադրբեջանի իշխանությունների հետ:

Փետրվարի 11-ին ԵԱՀԿ ՄԽ համանախագահները հավաքվել են Ֆինլանդիայում խորհրդակցությունների համար: Այդ մասին Twitter-ում գրառում էր կատարել ամերիկացի համանախագահ Ջեյմս Ուորլիքը:

«Ֆինլանդիան Մինսկի խմբի անդամ է, և մենք այսօր ժամանում ենք Հելսինկի` խորհրդակցությունների: Անհամբեր սպասում եմ Լեռնային Ղարաբաղի հակամարտության խաղաղ կարգավորման վերաբերյալ տեղեկություններ փոխանակելուն», - գրել է նա:

Ավելի վաղ ԵԱՀԿ Մինսկի խմբի համանախագահներ Իգոր Պոպովը (ՌԴ), Ջեյմս Ուորլիքը (ԱՄՆ), Պիեռ Անդրիեն (Ֆրանսիա) հանդիպել են ԵԱՀԿ գործող նախագահ Իվիցա Դաչիչի և ԵԱՀԿ գլխավոր քարտուղար Լամբերտո Զանիերի հետ: Ինչպես գրել է Twitter-ի իր միկրոբլոգում ամերիկացի համանախագահ Ջեյմս Ուորլիքը, միջնորդները տեղեկացրել են ԵԱՀԿ գործող նախագահին ղարաբաղյան հակամարտության գոտում իրադարձությունների վերջին զարգացումների մասին:

«Մենք բոլորս համամիտ ենք, որ անհրաժեշտ է թուլացնել լարվածությունը»,-գրել է նա: Իվիցա Դաչիչի հետ հանդիպել է Մյունխենի անվտանգության համաժողովի աշխատանքներին մասնակցող ԱԳ նախարար Էդվարդ Նալբանդյանը:

Զրուցակիցները քննարկել են ղարաբաղյան հիմնախնդրի կարգավորման գործընթացին առնչվող հարցեր և այդ համատեքստում նախագահության աջակցությունը ԵԱՀԿ Մինսկի խմբի համանախագահների ջանքերին։ ԵԱՀԿ գործող նախագահը խորը մտահոգություն է հայտնել հակամարտության գոտում լարվածության աճի առնչությամբ և կարևորել 1994թ. մայիսին ձեռք բերված համաձայնագրով հրադադարի ռեժիմի լիարժեք ապահովումը։

Նալբանդյանը նշել է, որ չնայած եռանախագահող երկրների ղեկավարների բազմաթիվ կոչերին, Բաքուն շարունակում է իր առավելապաշտական գիծը՝ արգելակելով բանակցային գործընթացը։

Ավելի վաղ Մինսկի խմբի համանախագահները հադես էին եկել հայտարարությամբ փետրվարի 5-ին Մյունխենում ՀՀ ԱԳ նախարար Էդվարդ Նալբանդյանի հետ հանդիպման ավարտին:

Իր հայտարարության մեջ միջնորդները «տագնապով են նշել միջադեպերի քանակի աճը շփման գծում և հայ-ադրբեջանական սահմանին, այդ թվում բնակելի թաղամասերում: «Մենք նաև քննարկել ենք նախարարի հետ նման միջադեպերի նվազեցմանն ուղղված միջոցները»,-ասվում է հայտարարության մեջ:

Մասնավորապես նշվում էր, որ կողմերը պետք է միջոցներ ձեռնարկեն ուղղաթիռի խոցման միջադեպի կրկնությունը բացառելու համար:

Հղումներ թեմայով.

Микроблог Тиграна Балаяна а в Twiiter

Тренд: Обнародована дата визита сопредседателей МГ ОБСЕ в Азербайджан