Հայոց ցեղասպանության 100-րդ տարելիցի ոգեկոչման միջոցառումների շրջանակում հունիսի 4-7-ը Շվեյցարիայի Վո նահանգի Քրիստոնեական եկեղեցիների միության նախաձեռնությամբ Լոզան քաղաքում միջազգային գիտաժողով էր՝ «Հայոց ցեղասպանություն. 100 տարի անց» խորագրով: Բացի այդ, նաև էկումենիկ արարողություն է եղել Սբ Աստվածամոր տաճարում, տեղեկացնում են Մայր աթոռի տեղեկատվական համակարգից:

Գիտաժողովին և էկումենիկ արարողությանը Մայր աթոռը ներկայացրել է Էջմիածնի եկեղեցական հայեցակարգային հարցերի գրասենյակի տնօրեն Բագրատ եպիսկոպոս Գալստանյանը՝ հանդես գալով «Ինչպե՞ս ապրել միասին Հայոց Ցեղասպանության 100 տարելիցին» թեմայով բանախոսությամբ։

Շվեյցարիա այցի ժամանակ Բագրատ եպիսկոպոսը հանդիպել է տեղի հայ համայնքի ներկայացուցիչներին, պատարագ մատուցել Ժնևի և Լեման շրջանի Սբ Հակոբ եկեղեցում: Սրբազանն այցելել է նաև Եկեղեցիների համաշխարհային խորհրդի (ԵՀԽ) գրասենյակ, որտեղ հանդիպումներ է ունեցել ԵՀԽ-ում հայ առաքելական եկեղեցու քույր եկեղեցիների ներկայացուցիչների հետ:

100-րդ տարելիցի կապակցությամբ Հայոց ցեղասպանության թեմայով գիտաժողովներ են կազմակերպվել աշխարհի տարբեր երկրնրի գիտական, ուսումնական հաստատություններում՝ առաջատար գիտնականների, պատմաբանների, ցեղասպանագետների մասնակցությամբ: Դրանք նախաձեռնել են ինչպես Հայոց ցեղասպանության միջոցառումները համակարգող տարածաշրջանային կառույցները, այնպես էլ առանձին կազմակերպություններ: