Քաղաքապետարան. Մոտ 200 մլն եվրո կպահանջվի Աջափնյակում մետրոյի երկու կայարանի կառուցման համար

8 հուլիսի 2015 - 18:08 AMT

PanARMENIAN.Net - Երևանի քաղաքապետարանը Աջափնյակ վարչական շրջանում մետրոպոլիտենի երկու կայարանների կառուցման համար Վերակառուցման և զարգացման եվրոպական բանկի միջոցներով իրականացրել է իրագործելիության նախնական ուսումնասիրություն։ Մետրոպոլիտենի կայարանների կառուցման համար առաջարկվել է «Արմենիա» հանրապետական բժշկական կենտրոնի և Գ. Չաուշի արձանի հարակից տարածքները:

Քաղաքապետարանից PanARMENIAN.Net ին հայտնել են, որ համաձայն իրականացված իրագործելիության նախնական ուսումնասիրության, Աջափնյակում մետրոպոլիտենի երկու կայարանի կառուցման առաջարկվող տարբերակներից նվազագույն խոշորացված արժեքը կազմում է մոտ 165.0, իսկ առավելագույնը՝ 250.0 մլն. եվրո։

Երկու կայարանի կառուցման նախագծի իրականացման նպատակով անհրաժեշտ ներդրումային միջոցներ ներգրավելու համար բանակցություններ են ընթանում միջազգային ֆինանսական և դոնոր կազմակերպությունների հետ։

Ներկայիս դրությամբ նախագծի առավել արդյունավետ իրականացման ուղղությունները գտնվում են քննարկման փուլում։

Ինչ վերաբերում է Կարեն Դեմիրճյանի անվան Երևանի մետրոպոլիտենի հետ կապված այլ ծրագրերին, ներկայիս դրությամբ Վերակառուցման և ղարգացման եվրոպական բանկի, Եվրոպական ներդրումային բանկի և Եվրոպական միության հարևանության ներդրումային գործիքի աջակցությամբ իրականացվում է մետրոպոլիտենի դրենաժային թունելի երկարացման և մետրոյի թունելներում վերականգնողական աշխատանքներ: Բացի այդ, մետրոպոլիտենի անվտանգության աստիճանի բարձրացման նպատակով բանակցություններ են վարվում Վերակառուցման և զարգացման եվրոպական բանկի հետ վագոնների, շարժասանդուղքների փոխարինման և ահազանգային անվտանգության համակարգի ներդրման ծրագրի վերաբերյալ։

2012-ին Երևանի քաղաքապետարանը, Հայաստանի Հանրապետության ֆինանսների նախարարությունը և «Կարեն Դեմիրճյանի անվան Երևանի մետրոպոլիտեն» ՓԲԸ-ն Վերակառուցման և զարգացման եվրոպական բանկի հետ պայմանագիր են կնքել մայրաքաղաքի մետրոյի վերակառուցման և վերազինման աշխատանքների շարունակականությունն ապահովելու համար 5 մլն եվրո տրամադրելու վերաբերյալ: Ծրագրի առաջին փուլը ևս ֆինանսավորվել է ՎԶԵԲ-ի, ԵՆԲ-ի և ԵՄ-ի կողմից ընդհանուր 15 մլն եվրոյի չափով 2010-ին` մետրոյի կայունությունը, էներգաարդյունավետությունը և անվտանգությունը բարելավելու նպատակով:

Պետությանը պատկանող Երևանի մետրոպոլիտեն ընկերության կողմից գործարկվող ստորգետնյա տրանսպորտային համակարգը կառուցվել է 1981թ. և ներկայումս Երևանի հասարակական տրանսպորտի հիմնական միջոցն է: Այդ ժամանակից ի վեր Երևանի մետրոն ընդլայնվել է` նախկին 7.6 կմ ձգվող չորս կայարան ունեցող համակարգից վերաճելով 11 կմ ձգվող և 10 կայարան ունեցող ենթակառուցվածքի:

Կարդացեք նաև՝Մետրոյի «Աջափնյակ» կայարանը` առայժմ միայն թղթի վրա