#ElectricYerevan. «Խիստ նկատողություն» ցույցը խախտումներով ցրելու համար

13 հուլիսի 2015 - 20:05 AMT

PanARMENIAN.Net - Հունիսի լույս 23-ի վաղ առավոտյան Երևանի Բաղրամյան պողոտայում և Ազատության հրապարակում էլէներգիայի սակագնի բարձրացման դեմ նստացույցի մասնակիցներին ցրելու ընթացքում հասարակական կարգը վերականգնելու ուղղությամբ իրականացված միջոցառման ժամանակ, ոստիկանության ծառայողների գործողությունների հետ կապված, ՀՀ ոստիկանության պետ Վլադիմիր Գասպարյանի հանձնարարությամբ ոստիկանության ներքին անվտանգության վարչությունում նշանակվել էր ծառայողական քննություն:

Հուլիսի 13-ի դրությամբ կատարված քննության արդյունքներով պարզվել է, որ ոստիկանության մի խումբ ծառայողներ թույլ են տվել կարգապահական խախտումներ, տեղեկացնում է ՀՀ ոստիկանության հասարակության հետ կապերի բաժինը:

Մասնավորապես, հասարակական կարգի պահպանությանն ու անվտանգության ապահովմանը ներգրավված ոստիկանության ծառայողների կողմից թույլ է տրվել «Ոստիկանությունում ծառայության մասին» ՀՀ օրենքով նախատեսված կարգապահական կոպիտ խախտում: Համապատասխան օրենքով ոստիկաններից մեկի պաշտոնը (փոխգնդապետ) իջեցվել է մեկ աստիճանով:

Ոստիկանության ծառայողի էթիկայի կանոնները խախտելու` զսպվածություն չցուցաբերելու և ծառայության ընթացքում վայել ու քաղաքակիրթ վարքագիծ չդրսևորելու համար երկու ոստիկանին հայտարարվել է «նկատողություն» և «խիստ նկատողություն»:

Վեց ոստիկան ծառայողական պարտականությունները կատարել են ոչ պատշաճ` քաղաքացիներին բերման ենթարկելիս գործել են ոչ արհեստավարժ: Նրանց ևս հայտարարվել է «խիստ նկատողություն»:

Բաղրամյան պողոտայում և Ազատության հրապարակում հունիսի 23-ին տեղի ունեցած հավաքների ընթացքում ծառայության ընդգրկված ոստիկանության մյուս ծառայողների գործողությունների և քաղաքացիների դիմումների քննարկման մասով ծառայողական քննությունը շարունակվում է: Արդյունքների մասին կտեղեկացվի:

Հուլիսի 3-ին ՀՀ հատուկ քննչական ծառայությունում քրգործ է հարուցվել հունիսի 23-ի վաղ առավոտյան Բաղրմյան պողոտայում էլէներգիայի սակագնի բարձրացման դեմ ցույցը ցրելու ընթացքում ոստիկանների կողմից լրագրողների հանդեպ գործադրված ֆիզիկական ուժի դեպքերի առթիվ: Գործը հարուցվել է ՀՀ քրեական օրենսգրքի 309-րդ և 164-րդ հոդվածների 2-րդ մասերով և 185-րդ հոդվածի 1-ին մասով` բռնություն գործադրելով զուգորդված պաշտոնեական լիազորություններն անցնելու, պաշտոնատար անձանց կողմից պաշտոնեական դիրքն օգտագործելով` լրագրողի մասնագիտական օրինական գործունեությանը խոչընդոտելու, ուրիշի գույքը դիտավորությամբ ոչնչացնելու կամ վնասելու դեպքերի առթիվ:

Նստացույցի մասնակիցների նկատմամբ ուժի կիրառումից տուժած 16 քաղաքացի հայց է ներկայացրել Մարդու իրավունքների եվրոպական դատարան։

Բացի այդ, հուլիսի 13-ին«Ոչ թալանին»քաղնախաձեռնությունը հայտարարել է՝ ամսի 14-ին հավաք-երթ է անցկացնելու դեպի գլխավոր դատախազություն՝ պահանջելով պատժել հունիսի 23-ին Բաղրամյան պողոտայում քաղաքացիների նկատմամբ բռնություն գործադրած ոստիկաններին, նրանց հրաման տվողներին:

«Նախաձեռնող խմբում պառակտում չկա, մարդիկ կան, ովքեր լքել են այն անձնական պատճառներով՝ ժամանակի խնդիր ունեն: Հիմնական համակարգող խումբն աշխատում է միասին»,- տեղեկացրել է նախաձեռնության անդամ Մաքսիմ Սարգսյանը, մեջբերում է Panorama.am-ը:

Նրա խոսքով՝ ցուցարարները որևէ մեկին կոչ չեն արել գնալ տուն՝ հայտարարելով, թե նախաձեռնողների պահանջները կատարվել են:

«Միշտ էլ հայտարարվել է, որ պայքարը շարունակվում է թե փողոցի մասով, թե ՀԷՑ-ում աուդիտ անցկացնելու: Մենք Բաղրամյան պողոտայից հեռացանք, որովհետև խնդիր ունեինք հասկանալու, թե ինչ է իրենից ենթադրում աուդիտը», - բացատրել է Սարգսյանը:

Ըստ նախաձեռնության ադամ Արթուր Քոչարյանի, պառակտումը ձեռնտու է միայն իշխանություններին, իսկ էլեկտրաէներգիայի սակագնի բարձրացման խնդրով մտահոգ ուժերը չեն կարող պառակտված գործել:

Հղումներ թեմայով.

«Ոչ թալանին» նախաձեռնություն. Չենք հրաժարվել փողոցից. Panorama.am

#ElectricYerevan

«Հայաստանի էլէկտրական ցանցեր» ընկերությունը դիմել էր Հանրային ծառայությունները կարգավորող հանձնաժողով՝ ՀՀ-ում էլէներգիայի սակագինը 17 դրամով բարձրացնելու հայտով: Հունիսի 17-ի նիստում ՀԾԿՀ-ն մասնակի բավարարեց հայտը՝ որոշելով օգոստոսի 1-ից սակագինը բարձրացնել 6,93 դրամով, ինչը բողոքի մեծ ալիք բարձրացրեց հասարակության շրջանում:

«Ոչ թալանին» քաղնախաձեռնության անդամները հունիսի 19-ից նստացույց սկսեցին Ազատության հրապարակում: Արդեն ամսի 22-ին նրանք երթով շարժվեցին դեպի ՀՀ նախագահի նստավայր՝ իրենց բողոքն արտահայտելու, բայց ոստիկանությունը փակել էր դեպի նախագահական տանող Բաղրամյան պողոտայի սկզբնամասը: Ցուցարարները որոշեցին նստացույցը շարունակել հենց ոստիկանական պատնեշի մոտ: 10 ժամ տևած նստացույցից հետո ոստիկանությունը բազմաթիվ կոչերից հետո գործողությունների դիմեծ՝ ջրցան մեքենայի միջոցով փորձելով ցրել նստացույցը: Դրանից բացի, ցուցարարների, ինչպես նաև ցույցը լուսաբանող մի շարք լրագրողների հանդեպ իրավապահները ֆիզիկական ուժ կիրառեցին, կոտրելով նաև տեսա- ու ֆոտոխցիկները: ավելի ուշ մոտ 25 մարդ բուժօգնության դիմեց՝ ստացված վնասվածքների պատճառով:

Ցույցի վայրից 237 քաղաքացի բերման ենթարկվեց ոստիկանության տարբեր բաժանմունքներ, որոնք ավելի ուշ բաց թողնվեցին:

Ցուցարարների հանդեպ ոստիկանների կողմից ուժի կիրառումը զայրացրեց հասարակությանն ու հաջորդ երեկոյան Բաղրամյանում արդեն հազարավոր մարդիկ հավաքվեցին նույն պահանջով՝ չեղարկել սակագնի բարձրացման մասին ՀԾԿՀ որոշումը: Բազմաթիվ ցուցարարներ գիշերներ էին լուսացնում Բաղրամյան պողոտայում: Արդեն հունիսի 27-ին ՀՀ նախագահը հայտարարություն տարածեց, որում ասվում էր, թե ՀԷՑ-ում աուդիտ կանցկացվի, ու մինչև դրա եզրակացության արդյունքների հրապարակումը Կառավարությունն իր վրա կվերցնի էլեկտրաէներգիայի սակագնի բարձրացման ամբողջ բեռը:

Նա ցուցարարներին կոչ արեց ազատել Բաղրամյան պողոտան, բայց վերջիններս հայտարարեցին, թե շարունակելու են բողոքի ակցիան, քանի որ իրենց պահանջը որոշման չեղարկումն էր: Արդեն հաջորդ օրը «Ոչ թալանին» նախաձեռնության անդամները ցուցարարների հետ քննարկման արդյունքում որոշեցին՝ պետք է նստացույցը շարունակել Ազատության հրապարակում ու քննարկել հաջորդ քայլը, բայց ցուցարարներից շատերը համաձայն չէին: Այդպիսով, հավաքվածների մի մասը տեղափոխվեց Ազատության հրապարակ, մեծամասնությունը՝ մնաց Բաղրամյանում, նշելով, որ պահանջը չի փոխվել ու այնքան են մնալու, մինչև որոշումը չչեղարկվի, ոչ թե կասեցվի:

Հունիսի 23-ին Բաղրամյան պողոտայում ոստիկանության կողմից նստացույցի մասնակիցների նկատմամբ ուժի կիրառումից տուժած 16 քաղաքացի հայց ներկայացրեց Մարդու իրավունքների եվրոպական դատարան։

Արդեն հուլիսի 3-ին ՀՀ ՀՔԾ-ն քրգործ հարուցվեց հունիսի 23-ի ցույցը ցրելու ընթացքում ոստիկանների կողմից լրագրողների հանդեպ գործադրված ֆիզիկական ուժի դեպքերի առթիվ: Գործը հարուցվեց ՀՀ ՔՕ 309-րդ և 164-րդ հոդվածների 2-րդ մասերով և 185-րդ հոդվածի 1-ին մասով` բռնություն գործադրելով զուգորդված պաշտոնեական լիազորություններն անցնելու, պաշտոնատար անձանց կողմից պաշտոնեական դիրքն օգտագործելով` լրագրողի մասնագիտական օրինական գործունեությանը խոչընդոտելու, ուրիշի գույքը դիտավորությամբ ոչնչացնելու կամ վնասելու դեպքերի առթիվ: