ՀՀ և Ադրբեջանի ԱԳ նախարարները կհանդիպեն սեպտեմբերի 24 կամ 25-ին

16 սեպտեմբերի 2015 - 15:30 AMT

PanARMENIAN.Net - Սեպտեմբերի 24-25-ը Նյու Յորքում՝ ՄԱԿ-ի Գլխավոր ասամբլեայի 70-րդ նստաշրջանի բացման շրջանակում, տեղի է ունենալու Հայաստանի և Ադրբեջանի արտգործնախարարների հանդիպումը: Այս մասին սեպտեմբերի 16-ին լրագրողներին հայտնել է Ադրբեջանի արտաքին քաղաքական գերատեսչության ղեկավար Էլմար Մամեդյարովը:

Ըստ նրա՝ նախ ԵԱՀԿ-ի Մինսկի խմբի համանախագահները առանձին հանդիպումներ կանցկացնեն նախարարների հետ, այնուհետև տեղի կունենա համատեղ հանդիպում, հաղորդում է «Ազատություն» ռադիոկայանը:

«Վերջին շրջանում հաճախացել են հրադադարի ռեժիմի խախտման դեպքերը: Հուսով եմ՝ հանդիպման ժամանակ այդ կապակցությամբ ինչ-որ արդյունք ձեռք կբերվի», - ասել է Մամեդյարովը:

Նա նաև նկատել է, որ արդյունքներին հասնելու համար պետք է աշխատել, քննարկել որոշ հարցեր:

«Ռուսաստանը ամրապնդել է իր դիվանագիտությունը՝ շարունակելով սատարել ԱՀԿ-ի Մինսկի խմբին:Սերգեյ Լավրովը ժամանել էր Ադրբեջան, իսկ ես եղել եմ Մոսկվայում: Կձգտենք արդյունքների հասնել, սակայն նախօրոք խոսել ինչ-որ բանի մասին դժվար է», - հավելել է Մամեդյարովը:

Ադրբեջանում ԱՄՆ դեսպան Ռոբերտ Սեկուտան՝ մեկնաբանելով Լեռնային Ղարաբաղի հակամարտության կարգավորման ուղղությամբ միջնորդների հետագա քայլերի հարցը սեպտեմբերի 15-ին հայտարարել է, որ ՄԱԿ-ի Գլխավոր ասամբլեայի շրջանակում հանդիպմանը միջնորդները նախարարների հետ կքննարկեն տարեվերջին Հայաստանի և Ադրբեջանի նախագահների հերթական հանդիպման հնարավորությունը: Դեսպան Սեկուտան նաև տեղեկացրել է, որ Մինսկի խմբի համանախագահները մտադիր են տարածաշրջան այցելել այս աշնանը:

ԵԱՀԿ Մինսկի խմբի համանախագահներ Ջեյմս Ուորլիքը (ԱՄՆ), Պիեռ Անդրյուն (Ֆրանսիա) և Իգոր Պոպովը (Ռուսաստան) հուլիսի վերջին Հայաստանում էին, ապա մեկնել էին Ադրբեջան: Նրանց այցի նպատակն էրնախապատրաստել Ադրբեջանի և Հայաստանի նախագահների հերթական հանդիպումը։

Սարգսյան-Ալիև վերջին հանդիպումը 2014-ի հոկտեմբերի 27-ին էր՝ Փարիզում: Այդ ժամանակ նախագահները հանդիպել էին ԵԱՀԿ Մինսկի խմբի համանախագահների հետ, ինչպես նաև կայացել էր Սարգսյան-Օլանդ-Ալիև եռակողմ հանդիպումը։

Վերջին շրջանում իրավիճակը հայ-ադրբեջանական սահմանին ու ղարաբաղա-ադրբեջանական շփման գծում լարված էր: Սեպտեմբերի առաջին օրերից հակառակորդը կրակի տակ էր պահում Տավուշի մարզը:

Սեպտեմբերի 2-ին հակառակորդի գնդակից այնտեղ պայմանագրային զինծառայող է զոհվել՝ Հայկ Դևոյանը: Զոհեր էր տվել նաև ԼՂՀ ՊԲ-ն՝ամսի 4-ին հակառակորդի ձեռնարկած գործողության արդյունքում մարտական խնդիր կատարելու ժամանակ զոհվել էին պայմանագրային զինծառայողներ Մարատ Խաչանյանը և Արման Ստեփանյանը:

Հղումներ թեմայով.

Մամեդյարով․ Նախարարների հանդիպումը` սեպտեմբերի 24-25-ը Նյու Յորքում. Azatutyun.am

Sputnik Азербайджан: Главы МИД Азербайджана и Армении могут встретиться в Нью-Йорке

Ղարաբաղա-ադրբեջանական հակամարտությունը

Ղարաբաղա-ադրբեջանական հակամարտությունը սկսվեց 1988 թվականին: Ի պատասխան Լեռնային Ղարաբաղի ինքնավար մարզի (ԼՂԻՄ) բնակչության 80% կազմող հայերի խաղաղ պահանջներին, Ադրբեջանը ագրեսիա ծավալեց խաղաղ բնակչության դեմ: 1991-1994թթ. ազգային-ազատագրական պատերազմի արդյունքում հռչակվեց Լեռնային Ղարաբաղի Հանրապետությունը: ԼՂՀ պաշտպանության բանակը նաեւ ԼՂՀ շուրջ անվտանգության գոտի ստեղծեց, որը 7 շրջաններ է ներառում: 1994թ. մայիսի 11-ին հրադադարի մասին համաձայնություն ձեռք բերվեց (Բիշկեկյան արձանագրություն): Ներկայումս հակամարտության կարգավորմամբ զբաղվում են ԵԱՀԿ Մինսկի խմբի համանախագահները` Ֆրանսիան, ԱՄՆ-ն եւ Ռուսաստանը: