Վարչապետ. Նպատակ ունենք ՀՀ-ում կայուն և անվտանգ էներգետիկ համակարգ ձևավորել

PanARMENIAN.Net - ՀՀ կառավարությունում նոյեմբերի 4-ին շարունակվել են Հայաստանի էներգետիկ համակարգի վիճակի, մարտահրավերների և երկարաժամկետ զարգացման վերաբերյալ քննարկումները:

Մասնավորապես, քննարկվել են էներգետիկ համակարգի երկարաժամկետ զարգացման ուղիները` մշակված ոլորտի համալիր ուսումնասիրության արդյունքների հիման վրա:

Վարչապետ Հովիկ Աբրահամյանն ընդգծել է, որ Կառավարության նպատակը Հայաստանում երկարաժամկետ կայուն և անվտանգ էներգետիկ համակարգ ձևավորելն է: Նա կարևորել է պատասխանատու գերատեսչությունների համատեղ աշխատանքը և հանձնարարել ՀՀ էներգետիկայի և բնական պաշարների նախարարությանը լրամշակել ներկայացված փաստաթուղթը՝ հաշվի առնելով հնչած առաջարկությունները:

Արծարծվել են Հայաստանի էներգետիկ անվտանգության ապահովմանը, նոր ենթակառուցվածքների ներդրմանը վերաբերող հարցեր, ներկայացվել են մի շարք առաջարկություններ:

ՀՀ վարչապետ հովիկկ Աբրահամյանը 2015-ի հունիսին հայտարարել է, թե Համաշխարհային բանկի և ԱՄՆ Միջազգային Զարգացման գործակալության հետ Կառավարությունը պատրաստել է 2016-2036 թթ. էներգետիկ համակարգի ռազմավարական զարգացման ծրագիրը, որը շուտով կդրվի լայն մասնագիտական և հանրային քննարկման: