Հալեպը հերթական անգամ հրթիռակոծվել է. Զոհեր ու վիրավորներ կան

PanARMENIAN.Net - Ահաբեկչական խմբավորումները հրթիռակոծել են Սիրիայի Հալեպ քաղաքի մի քանի շրջաններ, այդ թվում՝ Նոր գյուղ, Թելեֆոն Հաուայի, Սեյրաֆի, Սուլեյմանիե։ Այս մասին տեղեկացնում է Հալեպի «Գանձասար» պարբերականի ֆեյսբուքյան էջը

Ավերվել են բազմաթիվ բնակարաններ, կան զոհեր ու վիրավորներ։ Մեծ վնասներ է կրել Սիրիահայ օգնության խաչի բժշկական կենտրոնը։

Հալեպի թաղամասերը զինյալահաբեկչական խմբավորումների կողմից հրթիռակոծվել են նաև փետրվարի 13-ին: Զոհեր և վիրավորներ կան: Զոհվածների թվում է 1983թ. ծնված հայազգի Վիգեն Ոսկերիչյանը:

Փետրվարի 5-ին և 6-ին Հալեպում զինյալ ահաբեկչական խմբավորումները գազի պայթուցիկ տակառներով հրթիռակոծել են քաղաքի խաղաղ բնակչությունը, հատկապէս Նոր Գյուղի շրջանը:

Բնակարաններ են ավիրվել, հասցվել են նյութական վնասներ: Բնակչությունը զրկվել է էլեկտրականությունից: Փետրվարի 3-ին երեկոյան ահաբեկչական խմբավորումներն ինքնաշեն մի քանի հրթիռներ են արձակել Հալեպի հայաշատ թաղամասերի ուղղությամբ։Դրանցից մեկը պայթել է Հալեպի Նոր գյուղի Սբ Գրիգոր Լուսավորիչ եկեղեցին և Սահակյան վարժարանը միացնող հատվածում, իսկ մյուսը՝ ներկայիս հայկական ծերանոցի մոտ։ Վերջինիս պայթյունից բռնկվել են էլեկտրահաղորդման լարերը:

Տեղի ունեցած պայթյունների պատճառով վիրավորներ են եղել, գրանցվել են նաև նյութական մեծ վնասներ, վնասվել են բնակարաններ, խանութներ, մեքենաներ, պետական գույք։

Սիրիական բանակը փետրվարի 3-ին ազատագրել է Հալեպի հյուսիսիային շրջանում գտնվող Նըպպոլ և Ալ Զահրաա ավանները, որոնք ավելի քան 3 տարի շրջափակված էին ահաբեկչական խմբավորումների կողմից:Բացվել է Ազեզեն-Հալեպ ճանապարհը: Ահաբեկիչները փախուստի են դիմել դեպի թուրքական սահման:

Փետրվարի 3-ին հայտնի է դարձել, որ Սիրիայի բանակը աշխարհազորայինների աջակցությամբ մեկուսացրել է գլխավոր ուղիները Հալեպի հյուսիսում, որոնք ահաբեկիչներին կապում էին Թուրքիայի հետ:

Բանակը հունվարի 25-ին Դարաա նահանգում զինյալներից ազատագրել է ռազմավարական նշանակություն ունեցող Շեյխ-Միսքին քաղաքը: Նույն օրը Սիրիայի կառավարական զորքերը հսկողություն են հաստատել Լաթաքիայի Ար Ռաբիա քաղաքում: Գրոհին մասնակցել են նաև ռուս սպաներ, ռուսական օդուժի աջակցությամբ: Դա Բաշար Ասադին սատարող ուժերի համար ելք է բացել մինչև Թուրքիայի սահման:

Ավելի վաղ հայտնի դարձավ, որ բանակն ազատագրել է Լաթաքիայի շրջանի մի քանի գյուղ, այդ թվում նաև հայաբնակ Ղնեմիե գյուղը, որի բնակիչները հեռացել են 4 տարի առաջ՝ զինյալ ահաբեկչական խմբավորումների ներխուժելու պատճառով:

Սիրիայի բանակը հունվարի 12-ին իր հսկողության տակ է առել Լաթաքիայի մոտ գտնվող Սալմա գյուղական ավանը: