Իրանի նախկին գեներալ. Եթե Իրանը չօգներ Ադրբեջանին, հայերը կհասնեին Բաքու

PanARMENIAN.Net - Իրանի հետախուզության նախկին գեներալ Մանսուր Հաղիղաթպուրը Azariհa.org լրատվական գործակալությանը հայտարարել է, որ ժամանակին «եթե Իրանը չօգներ Ադրբեջանին, հայերը կհասնեին Բաքու»:

Հաղիղաթպուրը, որը ծառայել է Իսլամական հեղափոխության պաշտպանների կորպուսում, հայտարարել է, որ ղարաբաղյան պատերազմի տարիներին եղել է Ադրբեջանի նախագահի ռազմական խորհրդականը: Ադրբեջանի միլի մեջլիսի պատգամավոր Սիյավուշ Նովրուզովը հակադարձել է, թե այդ մարդը 1992-ին եղել է պաշտպանության նախկին նախարար Ռահիմ Գազիևի խորհրդականը:

«Իրանը փրկել է ադրբեջանցի ժողովրդին, հակառակ դեպքում հայերը կարող էին նույնիսկ Բաքուն գրավել: Մինչ օրս Ադրբեջանն Իրանին 30 մլն դոլար է պարտք: Սակայն Իրանը երբեք չի արծարծել այդ հարցը: Եթե Իրանի փոխարեն Թուրքիան լիներ, վաղուց արդեն կպահանջեր կամ գումարը, կամ կօգտվեր դրանից 10 անգամ ավելի մեծ շահ կորզելով»,-ասել է նա, հայտնում է Haqqin.az-ը:

Այնուհետև իրանցի գեներալը մեղադրել է «ադրբեջանցի պաշտոնյաներին» անշնորհակալ լինելու մեջ: Նա ասել է, որ «եթե Իրանը ժամանակին չօգներ Ռովշան Ջավադովին (որն այն ժամանակ ներքին գործերի փոխնախարարն էր, ոստիկանության հատուկ նշանակության ջոկատի հրամանատարը), հայերն այլ տարածքներ էլ կգրավեին: Այն օրերին մենք Բաքվում 6500 զինվոր պատրաստեցինք»,-պնդել է պաշտոնաթող իրանցի գեներալը:

Ադրբեջանցի պատգամավոր Սիյավուշ Նովրուզովն իր հերթին Հաղիղաթպուրին խարդախ է անվանել՝ պնդելով, թե «1992-1993թթ. վերջինս տվյալներ է փոխանցել հայկական հետախուզությանը Ղարաբաղում ադրբեջանական բանակի ստորաբաժանումների տեղակայման մասին»:

Նովրուզովը հավելել է, որ Հաղիղաթպուրի դեմ Ադրբեջանում քրեական գործ է հարուցվել: «Այդ մարդն Իրանի հետախուզության գեներալ է և հայկական հետախուզության գաղտնի գործակալ: Նա հսկայական վնաս է հասցրել Ադրբեջանի անվտանգությանը: Նրան որոնում է Ինտերպոլը, հուսով եմ, նա արժանի պատիժ կստանա»,-ասել է Նովրուզովը: