Թուրքիայի ԱԳՆ․ Թրամփի ապրիլի 24-ի հայտարարությունը ոչ մի իրավական ուժ չունի

25 ապրիլի 2020 - 10:15 AMT

PanARMENIAN.Net - Թուրքիայի ԱԳՆ-ն, արձագանքելով ԱՄՆ նախագահ Դոնալդ Թրամփի՝ ապրիլքսանչորսյան ուղերձին, հայտարարել է, որ «ներքաղաքական նկատառումներով արված այդ հայտարարությունը չունի ոչ մի իրավական ուժ»:

Սպիտակ տան ղեկավարը Հայոց ցեղասպանության 105-րդ տարելիցին նվիրված իր ուղերձում օգտագործել է «Մեծ եղեռն» ձևակերպումը և այն անվանել 20-րդ դարի ամենասարսափելի վայրագություններից մեկը։

«Մենք մերժում ենք այդ հայտարարության մեջ արված պնդումները», - ասվում է հայտարարության մեջ, գրում է Ermenihaber-ը։

Թուրքիայի ԱԳՆ-ն Թրամփի հայտարարությունը գնահատել է որպես «հիմնված այն սուբյեկտիվ ընկալումների վրա, որոնք հայերի կողմից փորձ է արվում դարձնել դոգմա»։

Թուրքիայի ԱԳՆ-ի հայտարարության մեջ նաև նշվում է, որ դեռևս ուժի մեջ է 1915-ի դեպքերն ուսումնասիրելու նպատակով պատմաբանների համատեղ հանձնաժողով ստեղծելու իրենց առաջարկը։

«Հավատում ենք, որ եթե ստեղծվի նման հանձնաժողով, ապա փաստերն իրապես կբացահայտվեն»,- ասվում է հայտարարության մեջ:

Հիշյալ հանձնաժողովի ստեղծումն օրակարգից դուրս մղելու համար Թուրքիայի ԱԳՆ-ն մեղադրում է հայերին՝ նրանց անվանելով ծայրահեղականներ։

Ըստ Անկարայի՝ ԱՄՆ ղեկավարությունը պիտի նկատի դա ու գործի համարժեք։

Թուրքիայի ԱԳՆ-ի հայտարարության վերջնամասում ասվում է. «Մենք ոգեկոչում ենք Օսմանյան կայսրության անկման շրջանում իրենց կյանքը կորցրած մահմեդական, քրիստոնյա և հրեա քաղաքացիական անձանց հիշատակը»։

2019-ի դեկտեմբերին ԱՄՆ Սենատը միաձայն ընդունել է Հայոց ցեղասպանությունը ճանաչող բանաձևը։Հոկտեմբերի վերջին Ցեղասպանությունը ճանաչող բանաձևն ընդունել էր Կոնգրեսի Ներկայացուցիչների պալատը։ Սակայն Սենատում բանաձևը վետոյի էր հանդիպել: