Արցախի ԱԽ քարտուղարն ազատման դիմում է գրել

PanARMENIAN.Net - Արցախի անվտանգության խորհրդի քարտուղար Արշավիր Ղարամյանն պաշտոնից ազատման դիմում է գրել։ Այդ մասին նա տեղեկացրել է ֆեյսբուքյան իր էջում։

«Ցանկանում եմ տեղեկացնել, որ ԱՀ անվտանգության խորհրդի քարտուղարի պաշտոնից ազատման դիմում եմ ներկայացրել, ինչը, իհարկե, չի նշանակում, որ ինքս ինձ «ազատում եմ» Արցախի անվտանգության ապահովման գործում ունեցած անձնական պատասխանատվությունից:

Ամբողջ կյանքս նվիրել եմ մեր հայրենիքի ազգային ազատագրական պայքարին, բոլոր հնարավորություններս օգտագործել եմ՝ մեր ընդհանուր անվտանգության պահովման գործում իմ համեստ չափաբաժինն ունենալու հարցում»,- ասվում է գրառման մեջ:

Ղարամյանը հավաստիացրել է՝ անկախ պաշտոնից, կարգավիճակից՝ շարունակելու է իր առաքելությունը:

«Մի քանի անգամ տարբեր առիթներով ասել եմ, որ ոչինչ չի խանգարում մարդուն օգտակար լինել իր հայրենիքին՝ անկախ նրանից, թե որքան հնարավորություններ ունի նա, որ ոլորտում կարող է օգտակար լինել, կամ ինչ կարգավիճակ ունի: Ես ապրել ու ապրում եմ այդ սկզբունքով: Մենք դեռ շատ անելիքներ ունենք՝ մեր պայքարն իր վերջնակետին հասցնելու և մեր հաղթանակները սերունդներին փոխանցելու համար: Ես և իմ ընկերները դա մեր կյանքի առաքելությունն ենք համարում, ապրել և ապրելու ենք այդ համոզմամբ, գործել և գործելու ենք այդ տրամաբանությամբ»,- գրել է նա։

Ղարամյանն Արցախի ԱԽ քարտուղար էր նշանակվել 2019-ի հունիսին։ Մինչև այդ նա զբաղեցնում էր Արցախի նախագահի հատուկ հանձնարարությունների գծով ներկայացուցչի պաշտոնը, իսկ դրանից առաջ երկրի Ազգային անվտանգության ծառայության տնօրենն էր:

Ազգային անվտանգության ծառայության տնօրենի պաշտոնից նա հրաժարական էր տվել 2018-ի հունիսի 1-ին Արցախում քաղաքացիների և Ազգային անվտանգության հատուկ ջոկատայինների միջև ծեծկռտուից հետո, որը բողոքի ակցիաների պատճառ էր դարձել: