Փաշինյան․ ՌԴ-ն ԼՂ-ում հակաահաբեկչական գործողությունների պատճառներ ունի

PanARMENIAN.Net - Ռուսաստանի Դաշնությունը լեգիտիմ իրավունք ու պատճառ ունի արձագանքելու Լեռնային Ղարաբաղում ադրբեջանական կողմից կռվող սիրիացի ահաբեկիչներին, քանի որ նրանք սպառնալիք են ներկայացնում ՌԴ-ի համար, հայտարարել է վարչապետ Նիկոլ Փաշինյանը, փոխանցում է ՏԱՍՍ-ը։

Փաշինյանն ուշադրություն է հրավիրել այն հանգամանքի վրա, որ արաբական մի շարք երկրների լրատվամիջոցներ գրել են այն մասին, որ ահաբեկիչները մարտի դաշտում պարտվելուց հետո «ցրվել են տարբեր կողմեր»։

Թուրքիան ակտիվ ռազմական և մարդուժի աջակցություն է ցուցաբերում Ադրբեջանին Արցախի դեմ սանձազերծված պատերազմում։ Թուրքական կողմը տարածաշրջան է բերել նաև վարձկան ահաբեկիչների Լիբիայից ու Սիրիայից՝ կռվելու Արցախի դեմ։

«Ինձ համար ակնհայտ է, որ պարտված ահաբեկչական խմբավորումներից անհատներ կամ խմբեր Լեռնային Ղարաբաղից պարզապես տեղափոխվում են Ռուսաստան, քանի որ ՌԴ-ն ընկալում են որպես թշնամի՝ այնպես, ինչպես ԼՂ-ն կամ Հայաստանը։ Հարցն այն է՝ ինչպես է այստեղ շարունակվելու այդ գործընթացը։ Կսպասի՞ ՌԴ-ն, որ այդ տարրերը տեղափոխվեն իր տարածք, և այնտեղ նախաձեռնի հակաահաբեկչական արշավ կամ գործողություններ։ Չգիտեմ, հնարավոր է, և ՌԴ կառավարությունում կամ հատուկ ծառայություններում քննարկվում է հակաահաբեկչական գործողություններ սկսել հենց տեղում ու նաև Լեռնային Ղարաբաղում»,- հայտարարել է Փաշինյանը։

Վարչապետը հիշեցրել է, որ Ռուսաստանը հակաահաբեկչական գործողություններ է սկսել իրենից բավական հեռու Սիրիայում, քանի որ սիրիացի զինյալների ու ահաբեկիչների գործողություններն ուղիղ սպառնալիք էին ՌԴ ազգային անվտանգությանը։ Փաշինյանը նշել է, որ այժմ այդ ահաբեկիչներն ավելի մոտ են ՌԴ-ին։

«Սա արդեն բոլորովին այլ իրավիճակ է, ես կարծում եմ, որ Ռուսաստանն ունի լեգիտիմ իրավունք և հիմքեր՝ արձագանքելու այս իրավիճակին»,- հայտարարել է նա։

Ադրբեջանը սեպտեմբերի 27-ի վաղ առավոտյան Արցախի ուղղությամբ սկսել է օդային և հրթիռային հարձակում՝ թիրախավորելով թե ռազմական օբյեկտներ, թե քաղաքացիական ենթակառուցվածքներ, այդ թվում՝ Ստեփանակերտում։ ՀՀ-ում և Արցախում ռազմական դրություն է հայտարարված։