ԱՀ դատախազություն․ Ադրբեջանցիների կողմից հայկական մեքենայի քարկոծման բավարար տեղեկություն չկա

PanARMENIAN.Net - Արցախի դատախազությունը հայտարարություն է տարածել՝ նշելով, որ ադրբեջանցիների կողմից հայկական ավտոմեքենայի քարկոծման դեպքով բավարար տեղեկություններ ձեռք չեն բերվել։

Խոսքը զոհված զինծառայողների մարմիններ տեղափոխող մեքենայի ուղղությամբ ենթադրաբար ադրբեջանցիների կողմից քարեր նետելու և մեքենայի դիմապակին ջարդելու վերաբերյալ ԶԼՄ-ներում արված հրապարակումների մասին է։

ԱՀ ոստիկանության կողմից կատարված դատավարական ստուգման արդյունքում պարզվել է, որ դեպքը տեղի էր ունեցել 2021թ. մարտի լույս 29-ի գիշերը, երբ Սյունիքի մարզի բնակիչ Հ.Հ.-ն իր «Ֆորդ Տրանզիտ» մակնիշի մեքենայով անցնում էր Շուշի-Գորիս ճանապարհի 8.5-րդ կիլոմետրը:

Նշվում է, որ դեպքի վայր հանդիսացող տեղանքի զննությամբ պարզվել է, որ դրա աջակողմյան հատվածում առկա է 5-6 մետր բարձրությամբ թեքվածք, որի գագաթային մասից ձգվում է մոտ 100 մետր երկարությամբ ժայռանման տեղանք` քարաթափման պարբերական դեպքերի հետքերով, որն ուղիղ թափվում է ճանապարհի երթևեկելի մասը:

«Տրանսպորտային միջոցի վարորդը գրավոր բացատրությամբ պարզաբանել էր, որ դեպքի պահին ճանապարհի երթևեկելի մասում այլ մեքենա չի եղել, մարդ չի նկատել և քանի որ մեքենայի դիմապակին վնասվել էր հենց աջ հատվածում, ինքը ևս ենթադրել է, որ դա քարաթափման հետևանք էր: Երբ Բերձոր քաղաքի մոտակայքում կանգնեցրել էր մեքենան և ստուգել դիմապակու վնասվածքի աստիճանը, հայտնաբերել է ավազի հատիկներ ու հողի մնացորդներ:

Նկատի ունենալով, որ դեպքի կապակցությամբ կատարված ստուգմամբ չեն պարզվել ուրիշի գույքը վնասելու կամ ոչնչացնելու ենթադրյալ հանցավոր արարքի մասին վկայող բավարար տեղեկություններ և ձեռք բերված փաստական տվյալները վկայել են, որ Հ.Հ.-ի տրանսպորտային միջոցի դիմապակին վնասվել էր քարաթափման հետևանքով, ուստի 20.04.2021թ. հետաքննության մարմնի կողմից որոշում է կայացվել ԱՀ քրեական դատավարության օրենսգրքի 35-րդ հոդվածի 1-ին մասի 1-ին կետով (հանցադեպի բացակայություն) նախատեսված հիմքով քրեական գործ հարուցելը մերժելու մասին»,-ասվում է հայտարարության մեջ: