«Գազպրոմ Արմենիա». Գյումրիում տարածված հոտը չափաքանակից ավելի օդորանտի ներարկման հետևանք է

PanARMENIAN.Net - Հունվարի 20-ին՝ ժամը 20:00-ի սահմանում, Գյումրիում տարածված հոտը պայմանավորված է եղել գազաբաշխիչ ցանց նորմատիվ չափաքանակից ավելի օդորանտի ներարկման հետևանքով։ Այդ մասին տեղեկացնում է «Գազպրոմ Արմենիա» ՓԲԸ-ն։

Նշվում է, որ այն վտանգավոր չէ։

«Հունվարի 20-ին ժամը 20-ի սահմաններում Գյումրի քաղաքում տարածված հոտը հետևանք է «Գազպրոմ Արմենիա» ՓԲԸ Գյումրու գազաբաշխիչ կայանում տեղի ունեցած հոտատվության սարքավորման փականի ժամանակավոր խափանման, որի վերացման վթարավերականգնողական աշխատանքների կատարման ընթացքում՝ անխափան գազամատակարարման ապահովման պայմաններում, տեղի է ունեցել նորմատիվ չափաքանակից ավելի օդորանտի ներարկում գազաբաշխիչ ցանց:

Արդյունքում, բնական գազի օգտագործման պայմաններում, տեղի է ունեցել հոտի տարածում, որը կրել է ժամանակավոր բնույթ: Տեղի ունեցածը բնական գազի արտահոսք չէ, մարդկանց առողջությանն ու շրջակա միջավայրին չի ներկայացրել վտանգ, պայթունավտանգ չէ և չի հանգեցրել գազաբաշխման կամ գազասպառման համակարգի վթարային վիճակի»,-ասվում է ընկերության հաղորդագրության մեջ:

Համաձայն նորմատիվ տեխնիկական փաստաթղթերի պահանջների, «Գազպրոմ Արմենիա» ՓԲԸ գազաբաշխիչ կայաններում կատարվում է ՀՀ տարածք ներմուծվող բնական գազի հոտատվություն (օդորիզացիա):